في البيت والشارع والشغل.. إزاي تتغلب على الحر؟

المنظمة العالمية للأرصاد الجوية، اتوقعت إن صيف 2016 هيكون أشد حرارة من السنة اللي فاتت.. وللأسف توقعها من الواضح إنه هيكون حقيقة وواقع.

لو عايز تتغلب على الحر في (البيت، الشارع، الشغل) ومتحسش بالكسل، اقرأ التقرير ده، واعرف إزاي تواجه الصيف بحرارته وعرقه وسلاطاته وبابا غنوجه.

في البيت

لو كنت في البيت فالتغلب على الحر سهل جدا في الحالة دي.. كل اللي عليك هو اتباع الخطوات دي:

معروف إن درجات الحرارة في الليل ولحد الساعات الأولى من الصباح بتكون منخفضة، عشان كده تهوية البيت في الفترة دي بيساعد على دخول تيار هوا بارد هيحافظ على درجة حرارة منخفضة جوه البيت.. خد بالك مهم جدا تقفل النوافذ قبل الضهر، ويفضل قبل 10 صباحا.

The-new-loose-white-clothes-meditation-new-yoga-clothes-men-suit

لون الملابس ونوع القماش اللي مصنوعة منه بيأثر بشكل كبير على إحساسك بالحرارة، فمهم إنك تكون لابس ملابس فضفاضة ألوانها فاتحة لو مكنتش بيضة، وتكون قطنية مش مصنوعة من الألياف الصناعية والبوليستر والنايلون.. الملابس القاتمة بتمص الحرارة وبتزيد من حرارة جسمك.

عشان تبرد جسمك وتحافظ على الشعور بالانتعاش، لازم تاخد حمام بارد «دُش» مرتين على الأقل، عشان تتخلص من آثار العرق وتحافظ على ترطيب جسمك.

ولو عندك «بانيو» في البيت هيكون لطيف جدا إنك تغطس فيه ساعة في نص اليوم لما يكون الحر شديد، ده هيجدد نشاطك بشكل كبير وهيقضي على حالة الخمول اللي ممكن تحس بيها بسبب الحر.

Watermelon-slices1

فيه مجموعة من الأطعمة هتقفلك في الصيف وهتخليك تحس بالحر بعكس أطعمة تانية.. يعني أكل زي «السجق» و«البرجر» و«البطاطس المحمرة»، هضمها بيحتاج كمية كبيرة من الدم، اللي هيؤدي لتراجع معدل تدفق الدم للمخ، وده هيزود من فقدان  التركيز.

من الأفضل في الأيام اللي درجات الحرارة بتكون فيها مرتفعة إنك تاكل خفيف، زي إنك تاكل جبنة وبطيخ :D .. م الآخر في الحر كتر من الفاكهة والخضروات، وخصوصا البطيخ اللي بيحتوي على نسبة مياه تبلغ 92%، وده بجانب منتجات الألبان الخالية من الدهون والأسماك، وتناول الأطعمة الحارة اللي بتساعد في تبخر العرق من الجلد، وده هيخليك تتخلص من الحرارة اللي يتخرج مع العرق وتحس بالبرودة.

خد بالك.. مهم إنك تحط كميات إضافية من الملح على الطعام عشان تعوض الأملاح اللي بيفقدها الجسم بسبب العرق.

تعرف إن اللبمة الواحدة بيطلع منها حرارة بتعادل 85 وحدة حرارية، وده بيساهم في تسخين جو الأوضة اللي انت فيها، ده بجانب أجهزة التليفزيون والكمبيوتر والهواتف.. لو عايز تخفف درجة الحرارة شوية، افصل أي حاجة من دول انت مش محتاجها.

في الشارع

لو إنت مضطر إنك تخرج من البيت والجو حر، يفضل إنك تلبس ملابس فاتحة وفضفاضة اللي قولنا فوق أهميتها، بجانب ارتداء الأحذية المفتوحة والمريحة وبالنسبة للبنات بلاش «كعب عالي».

ويا سلام لو فيه إمكانية تنزل بشبشب أو صندل ومتلبسش شراب.. أو تلبس شرابات قطنية هتساعد على ترتطيب القدمين، وهتخليك حاسس براحة أكتر، لإن تبريد القدمين بيساهم في تبريد الجسم بالكامل.

لو معاك شنطة ضهر، حاول تستغلها وتنزل بيها في الحر، بعد ما تكون حطيت فيها المؤن اللي هتحتاجها وأنت في الشارع :D زي:

ميه: الجسم بيفقد كتير من السوائل والأملاح المعدنية نتيجة الحر الشديد، وعشان كده إزازة الميه ضروري جدا تكون معاك في الشارع لما يكون الجو حر، خاصة إن الأطباء بينصحوا في العادي بشرب من 6 إلى 8 أكواب يوميًّا.

0

عصير: عشان متفقدش نشاطك وانت في الشارع، العصائر هي الحل بجانب الميه.. يُفضل طبعا إنها تكون طبيعية وخالية من السكر عشان تحافظ على نشاطك ومزاجك الجيد رغم الحر.

حاول وانت ماشي في الشارع، تمشي في الشوارع اللي فيها خضرة وأشجار ظل، لإنها بتساهم في التغلب على حرارة الصيف.. الأشجار بتحجب أشعة الشمس وبتكون بمثابة مكيفات، لإنها بتاخد الرطوبة من التربة وبتطلعها من خلال الأوراق، ومن ثم بتحصل على تبريد بالتبخير.

جسم الإنسان فيه نظام تبريد طبيعي، إلا إن كتير مننا للأسف بيقفل التكيف ده باستمرار، عشان كده في عز الحر متمسحش عرقك.

العرق بيساهم في تخفيض درجة حرارة الجسم بشكل كبير.. يعني لو اتبخر كمية لتر من ماء العرق على سطح الجلد فده كفيل بتخليص الجسم من كمية بتبلغ حوالي 600 سعر حراري من الطاقة الحرارية.

وصلت الشغل

مبدئيا.. لو شغلك مفهوش تكيف، فحاول انت وزمايلك تتبعوا فكرة التهوية اللي تكلمنا عنها فوق، بجانب ارتداء شبشب لو فيه إمكانية لده. وبالنسبة للأكل بلاش الوجبات التقيلة، وخليك في الفاكهة أفضل.

7c7c6db461ea017c886f06cfe5793979

لما بترتفع درجات الحرارة لتسري السخونة في جميع أنحاء جسمك، وعشان كده لازم تعرف إن فيه أجزاء معينة بتكون أكتر حرارة من غيرها، ودي بيتقال عليها «نقاط النبض» وبتشمل (المعصم، ظهر العنق، والجبهة).

وبما إنك في الشغل مش في البيت فمش هتقدر تاخد حمام، بارد، فانت هتركز على النقاط دي كل ساعة من خلال تعريضها للماء البارد، وده هيساهم بشكل كبير في خفض درجة حرارة جسمك.. ممكن كمان تستعين بمنديل أو قطعة قماش مبللة وتحطها على الرقبة وانت شغال.. متتكسفش الجو حر :D

شبابيك

منصة إعلامية تخاطب شباب وطلاب مصر

ميكس ميديا