لو اتخرجت متتفاجئش.. الشغل «حمادة» تاني خالص

بنتخرج من الجامعة ونتفاجئ أن كل اللي درسناه في الكلية "حمادة" والشغل "حمادة" تاني خالص، وسنين كتيرة بتضيع واحنا لسه بندور على شغل بعد التخرج ونبدأ ناخد دورات تدريبية وكورسات وحاجات كتير، لحد ما نلاقي ناس اتخرجت معانا وسبقتنا وحققت نفسها واحنا لسه بنبتدي، وعشان تتفادى كل ده جهز نفسك من دلوقت وانت لسه بتدرس وخليك مستعد.

حدد هدفك

حط لنفسك هدف عاوز توصله وأعرف ازاي تقدر تحققه صح، يعني ببساطة أعرف انت عايز ايه بالظبط وايه الخطوات اللي لازم تاخدها عشان تحقق هدفك وتحس بطعم النجاح، وكل ما أمنت بهدفك أكتر هتقدر توصله وتكون متميز

خطة قبل التخرج

ما تخليش فرحة التخرج والأجازة ومفيش مذاكرة ودرجات تسرقك، خليك واعي وحط لنفسك خطة قبل ما تتخرج، ابحث عن الشركات والمكاتب اللي شغالة في مجالك وقدم عندهم وجهز نفسك للانترفيو كويس، وطبعا خليك مميز عن المتقدمين اللي معاك، كمان لو بتفكر في السفر دور على فرص ومنح للسفر بره، حط لنفسك خطة سنوية وشوف حققت ايه وما حققتش ايه

دورات الأجازة

ما تضيعش وقتك في النوم والخروج والفسح في أجازة أخر السنة، وتركن كتبك تحت السرير لحد السنة الجديدة، انزل دور على كورس مفيد لك في مجالك، مش بس عشان تاخد شهادة معتمدة من مكان له اسم، لا دور على كورس يفيدك بجد وينميك ويطورك في دراستك وشغلك

دائرة الأصدقاء

خلي حواليك أصدقاء من نفس مجالك، العلاقات مهمة جدا في سوق العمل، ممكن حد يرشحك لوظيفة معينة أو يفيدك بمعلومة أو يساعدك تعمل حاجة، الأهم من ده أن أصدقائك يكونوا إيجابيين ويدفعوك ويشجعوك مش سلبيين ومحبطين وخلاص

الأنشطة التطوعية

اشترك في شوية أنشطة تطوعية وأنت في الجامعة وحتى بعض التخرج يعني، ما تبصش للموضوع على أنه من غير فلوس وتضييع وقت وجهد بالعكس أنت بتتعرف على ناس جديدة وفي مجالات مختلفة وبتاخد خبرة في العمل وهتتعلم حاجة جديدة كمان

سيرتك الذاتية مميزة

أنا لسه متخرج ازاي يبقى عندي CV؟ واكتب فيه ايه؟ كتير من الطلبة والخريجين بتسأل السؤال ده، مش لازم تكون اشتغلت في كذا شركة يعني ولا تكون محترف مثلا، انت لسه خريج وصاحب العمل فاهم ده كويس، لكن كفاية تكون اشتركت في كذا دورة تدريبية لها علاقة بمجالك أو أنشطة تطوعية أو مهارات معينة سواء مهارات كمبيوتر أو لغة أو حتى مهارات شخصية، كل ده بيقوي السيرة الذاتية بتاعتك وتكون فرصتك أكبر في الحصول على شغل مناسب وبسرعة