أستاذ جامعي للطلاب: «بلاش لف ودوران في الإجابة ورقتك بـ5 قروش»
نصح المتحدث باسم نقابة أعضاء هيئة التدريس المستقلة والأستاذ بجامعة بني سويف، الدكتور محمد كمال، طلاب الجامعات بـ«عدم اللف والدوران وإعادة الكلام والرغي بعيد عن السؤال الذي يطرحه دكتور المادة» خلال إجابات الأسئلة بامتحانات نهاية العام، مشددًا «بلاش الألوان الفسفوري اللى بتعمينا لان نظرنا ضعف وقريب هنشوف حد ياخد بايدينا، وبلاش الاجابة العايمة وحزر فزر يا دكتور علي العناوين وكأنك بتختبرني، كمان بلاش اجابات خزعبلية وكأن ورقة الاجابة لن تقرأ».
وكتب عبر صفحته الشخصية على موقع التواصل الاجتماعي، «فيس بوك»، «لو تعرف سيادتك احنا بنعاني اد ايه علشان نقرا ورقة الاجابة ولا نظلم طالب وكل ده وسط عدم تقدير لان سيادتك قيمة تصحيح الورقة بتاعتك عند الحكومة 100 قرش.. اه والله بالقرش مستغرب ليه؟ الحكومة عاملة مكافأة تصحيح ورقة الاجابة بالقروش».
وأضاف: «مع ملاحظة حاجة مهمة ان مهما زاد ولا قل عدد الدفعة هم أول عن اخر 100 جنيه لكل مادة قبل خصم الضرايب وبعدها بتوصل 79 جنيه، يعني لو الدفعة 500 طالب هما الـ 79 جنيه لو الدفعة الف طالب هم 79 جنيه يعني ممكن في الكليات الكبيرة زي حقوق وتجارة ورقة التصحيح تبقي بـ 5 قروش.. فيا ريت بلاش تتعبنا في فك لوغاريتمات الاجابة بتاعتك علشان تاخد حقك اما حقنا احنا في التصحيح فعند ربنا بجملة اللي بتعمله فينا الحكومة».
