لو أول رمضان ليكو مع بعض.. نصايح تسعدك وترضي جوزك
بما إن ده أول رمضان ليكي في بيت جوزك، فهنقولك على شوية نصايح تمشي عليها وكل سنة وأنتي طيبة J
المسئولية
في رمضان المسؤولية هتزيد عليكي شوية لأنك هتبقي مسؤولة عن تحضير وعمل الأكل في وقت معين لأن مش هينفع تعملي الأكل في وقت متأخر عشان هتكوني متسربعة ومدربكة وكمان تأخيرك ده ممكن يضايق جوزك.
لما تعملي الأكل من بدري ويبقي جاهز بس على التسخين قبل الفطار ده هيخلي عندك وقت توضبي فيه نفسك من ريحة الطبيخ وكده وتبقي فريش وتجهزي السفرة وتستقبلي جوزك.
العزومات
رمضان طبعًا مش بيخلى من العزومات. وأكيد هتعملوا عزومات سواء لأهلك أو أهله أو أصحابكوا وفي الـ 3 حالات دول لازم برضه نرجع للجزء الأولاني في كلامنا إنك تكوني مسؤولة إن العزومة دي تطلع عال العال والناس تكون مبسوطة منها.
- عزومة الأهل
فيه حاجة مهمة قوي بالنسبة لعزومة أهل جوزك، وهى إنك متبينيش خالص إنك مضايقة وزهقانة وإنك تعبتي من كتر العزومات لأن ده هيضايقه جدًا واعملي العزومة بنفس راضية.
ممكن تعملي حاجة إنك تتفقي معاه في الفترة دي قبل رمضان هتعزمي أهلك وأهله امتى بحيث قبلها تكوني مرتبة الدنيا وعارفة هتعملي أكل إيه.
اوزني العزومات بين أهلك وأهله يعني متعزميش أهلك 3 مرات وأهله مرتين، بحيث أهله ميضايقوش وجوزك كمان ميضيقش
- العزومة المفاجأة
ممكن يحصل إن حد معدي جنب بيتكوا فطلع قبل الفطار عندكوا مش تقل دم منه بس لأنه بيحبكوا وعايز يشوفكوا فطبعًا من الذوق إنك هتقوليلوا يقعد يفطر معاكوا وتصري على ده وفي حالة العزومة المفاجأة دي خليكي مجهزة نفسك بطبق أو طبقين إحتياطي.
هذه العادات تضيع صيامك في رمضان.. تخلص منها
الأكل
نيجي بقى لجزئية الأكل وتلاقيكي من دلوقت شايلة همه. العزومة مش بالأكل الكتير. أنتي ممكن تعملي عزومة معتبرة بمصاريف معقولة تكفي الناس ويكونوا مبسوطين جدًا يعني هديكي مثال تعرفي منه إزاي تعملي عزومة بالفلوس اللي معاكي سواء كانت فلوس كتيرة أو قليلة.
والمثال ده عبارة عن بوست كان منشور من فترة على الفيس بوك إن بنت جوزها كان عازم مامته وإخواته في بيتهم على الفطار وإداها 120 جنيه عشان تتصرف وتجيب أكل، هي طبعًا مكنتش عارفة تعمل إيه بالمبلغ الصغير ده فراحت واحدة كاتبة ليها الكومنت ده.
وحتى الحلويات من بسبوسة وقطايف وكنافة وبالذات الكنافة بالمانجة تقدري تعمليها بمصاريف معقولة يعني لو بتحبي الكنافة بالمانجة كان فيه بوست على الفيس بوك واحد بيقول طريقة سهلة ورخيصة جدًا بدل لما تجيبي كنافة بالمانجة بسعر غالي.
وكمان بالنسبة للعصاير ممكن تعملي عصاير بكمية سواء «قمر الدين»، «مانجة»، «كركدية»، «ليمون»، «برتقال»، أو أي عصير بتحبيه وتحطيه في أزايز كبيرة وبعد كدة في الفريزر على طول عشان قبل الفطار تطلعيه ويكون جاهز.
8 تطبيقات «رمضان» مينفعش من غيرها
توضيب البيت
قبل رمضان روقي البيت ووضبيه كويس وشيلي أي حاجة شايفة إنها عاملة زحمة وطلعي الأطباق والكوبايات وجهزيها ونضفيها عشان تكون جاهزة وكمان الأطباق «سيرفيس» اللي هتحطي فيها الأكل.
وفيه حاجة كمان لو في أطفال في عيلتك وعيلته هيجوا ساعة العزومة. جهزي تربيزة تحطيها لما يجوا جنب السفرة بحيث يقعدوا عليها عشان يكونوا براحتهم. وحطي تحت التربيزة زي مفرش كدة عشان لو وقعوا أكل أو عصير ميوقعش على السجادة ويبوظها.
زينة رمضان
ممكن كمان تزيني البيت كله بزينة رمضان بحيث تخلي الجو بتاعه حلو تجيبي بقى فانوس وهلال وتعلقيهم في أركان البيت. عندك مكان ممكن تروحيه اسمه منطقة الخيامية وده من المناطق اللي مليانة كل اللي هتحتاجيه عشان تزيني بيتك بسعر كويس يعني مثلًا الفانوس بـ 35 جنيه والهلال بـ 10 جنيه وفرع الزينة المتر بـ5 جنيه.
⇓نرشح لك⇓
