بعد الانفصال.. هل تداوي هذه الأغاني قلبك؟
بعد كل قصة حب لم تكتمل، مجموعة أغاني بتتسمع، ليه وإيه السر في ده؟ يا ترى ده دليل على حب لسه معشش جوه القلب، ولا مجرد مواساة للواحد على وجع فراق وجرح لسه مأثر فيه؟
فيه دراسة بريطانية بتقول إن الأغاني بتساعد على تخطي الأزمات، وإن المشاعر الحزينة اللي بتنتج عن الاستماع للموسيقى ذات الطابع الحزين قد تؤدي في نهاية الأمر إلى شعور الإنسان بالمواساة والسلوى.
والسؤال هنا ليه بنلجأ لإننا نسمع الأغاني الحزينة؟ في الموضوع ده هتعرف ليه من خلال تعقيب الدكتور النفسي محمد مزيد على بعض من الأغاني دي.
اعذريني يوم زفافك
من الأغاني اللي أثرت في شباب كتير إتعرض لموقف إنه شاف حبيبت عمره بتتجوز بعد لما كان بيحلم إنهم يبنوا عش حبهم مع بعض.
لجوء الشاب إنه يسمع النوع ده من الأغاني بيرجعه «مزيد» إلى إن المرحلة العمرية بتاعته كشاب بتقول إن لو كان تفكيره عاطفي مش عقلاني ده هيخليه يهرب من مشكلته.
والهروب هنا بمعني إنك تهرب من الواقع اللي حاصل فيه المشكلة وتنقل المود بتاعك لسماع الأغاني أو مثلًا تحب جديد تبعًا لمقولة «وداوني بالتي كانت هى الداء».
أما لو كان تفكيره عقلاني فده هيخليه يعرف إزاي يتصرف ويواجه الموقف ويدواي جرحه ويبدأ صفحة جديدة مع نفسه.
وافتكرت
محمد حماقي في الأغنية دي فكرك بكل مكان كنت بتروحوا مع حبيبتك اللي محفور فيه تفاصيل حبكوا. دكتور «مزيد» بيقول إن الحالة المزاجية هي السبب في أنك أول ما روحت المكان إفتكرت اللي كان وسمعت الأغنية دي. وسماع الأغنية دي أوغيرها من الأغاني اللي بتدور في نفس القصة سببه إن كلامها كان صادق وإحساسها لمس روحك المجروحة.
باينه ضاع
إزاي بالسهولة كدة حب عمر بحاله يخلص إزاي سيبناه يخلص ووقعنا في فخ الفراق؟ سؤال سألته لنفسك أكيد، وتوترك النفسي وأنت بتسأل السؤال ده بيرجعه دكتور «مزيد» لسمة من سماتك الشخصية بتخليك تلجأ لما تقع في ضغط نفسي جامد لسماع أغاني من النوعية الحزينة دي.
مش همنعك
وفي أغنية مش همنعك لما بتسمعيها وتقول «عايز تسبني سيبني مش همنعك بس إبقى إفتكرني»، ليه مفكرتيش بقى إنك تواجهي الموقف ومتهربيش منه؟ «مزيد» بيشرح لينا السبب إنه راجع للتنشئة الإجتماعية بتاعتك، إنك من الشخصيات اللي إتعودت من صغرها تهرب من المشكلة.
وبتهرب بإنك تعمل أي حاجة؛ تسمع أغنية أو أي حاجة تبعدك عن التفكير في المشكلة ومتعودتش إنك تواجه الموقف وتبدأ صفحة جديدة مع نفسك وتطلع من التجربة دي بدروس مستفادة.
العلاج
كل حاجة ليها علاج وإنك تلجأ لسماع أغاني حزينة مش علاج أبدًا لأنه على الرغم من إن سماع الأغاني الحزينة بيخفف حزن البعض، زي ما قولنا في الدراسة البريطانية إلا إن البعض التاني سماعه للأغاني الحزينة بيقلب عليه المواجع.
و«مزيد» بيدينا علاج للشخص اللي لما بيسمع الأغاني الحزينة بتقلب عليه المواجع.
وأول حاجة حاجة في العلاج بتاعك، هي التقرب لربنا واللجوء ليه. اتقرب لربنا جامد لأنه هو الوحيد اللي قادر يطمن روحك ونفسك ويخليك في حالة طمـأنينة وسكينة وسلام .
حوّل طاقتك السلبية من حزن وسماع أغاني بتزيد عليك مواجعك وبتأذيك نفسيًا إلي طاقة إيجابية يعني مثلًا مارس رياضة حقق خطوة أولى في حلم نفسك تحققه إعمل أي حاجة تحول بيها إنتباهك من الموضوع الحزين اللي بتفكر فيه لموضوع تاني إيجابي.
⇓نرشح لك⇓
