هتسافري لجوزك برا مصر؟..7 فوايد مستنياكي
اتجوزتي حد طبيعة شغله برا مصر وخلاص مضطرة تجهزي شنطتك عشان تسافري ليه بس حاسة إنك مش عايزة تبعدي عن بيتك و أصحابك.
في الموضوع ده هنخليكي تسافري وإنتي حطة في بطنك بطيخة صيفي، لأن في فوايد كتيرة مستنياكي.
سند لبعض في الغربة
لما تحصل مشكلة بينك وبينوا لو كنتي في بلدك كان زمانك رايحة لأهلك تشتكي وممكن تباتي عندهم وهما يدخلوا بينكوا ويحاولوا يصلحوا لكن في الغربة الموضوع هيختلف في كون أهلك مش حواليكي فمفيش فكرة إنك تروحي لأهلك وتشتكي.
وهتعودي نفسك إن أي مشكلة تحصل ما بينكوا تحليها على طول وهتبصي على الموضوع من ناحية إنك في غربة ولازم تكونوا سند لبعض فيها ومتزعلوش بعض. وكمان هتبصي إن مكالمتك لأهلك هتكوني عايزة فيها تطمني عليهم وعلى أحوالهم مش في الشكوى.
تحمل المسؤولية
السفر هيخليكي تعتمدي على نفسك وتكوني مسئولة عن البيت من A to Z زي ما بيقولوا. مفيش بقى حد هيعملك أكل ويجبهولك أو حد يساعدك في تنضيف البيت لأ إنتي اللي هتنضفي وهتنزلي وتجيبي الحاجة وتعمليها ووصفات الأكل هيفيدك فيها طبعًا التدوير على الإنترنت.
ممارسة لغة
على حسب الدولة اللي إنتي رايحة ليها هتضطري إنك تمارسي اللغة بتاعتها عشان تعرفي تتعاملي مع ناسها يعني مثلًا الإنجليزي عقدتنا كلنا طبعًا ده بقى لما تسافري وتلاقي الناس كلها بتتكلمه قدامك هتكسري رهبتك منه وهتتكلمي وهتمارسيه لحد ما يبقى عادة في حياتك زي ما بتتكلمي عربي بالظبط.
التعرف على النفس
كان في بوست نشره محمد كمال على صفحة No Fixed Address. البوست ده كان بينقل حاجة مهمة استفادها «كمال» من تجارب سفره حول العالم.
وهي التعرف على نفسك وقال «وأنت مسافر بتبتدي تعرف نفسك علي حقيقتها وأنت لوحدك محدش يعرفك وبعيد أوي ممكن تعمل أي حاجة ومحدش هيعرف كل حاجة متاحة الصح والغلط وبتبتدي تعرف أنت عايز إيه فعلًا.
وهل شخصيتك دي شخصيتك الحقيقية، ولا شخصية اتحطيت فيها بسبب الناس اللي حواليك؟ هتشوف إنت حقيقي ولا لأ، هل بتاع القاهرة هو هو نفس البني آدم بتاع باريس، هو هو نفس البني أدم بتاع بكين، ولا أنت عايش تحت قناع أنت نفسك مش شايفه.
بتبتدي تبص لنفسك في مرايات الشارع والفتارين بشكل مختلف لأن كل الناس شبه بعض انت الوحيد اللي مختلف انت اللي أجنبي في المكان بتبتدي تاخد ثقة في نفسك إنك سالك في كل مكان.
وعارف تندمج مع الناس و بتاخد ثقة إن عمرها ما هتقفل لأن الدنيا كبيييييييرة أوي صعب تقف علي مكان أو شغلانة أو حد. أنت بتتخيل إنك كل ما تسافر بتعرف أكتر عن العالم بس الحقيقة انك بتعرف أكتر عن نفسك ».
وكمان هتستفادي من تجربة «كمال» دي إنك لما تسافري هتتعرفي على نفسك كويس قوي، ومش بس نفسك ده إنتي كمان هتتعرفي على جوزك أكتر. صحيح إنتي عارفاه كويس بس في السفر بتتعرفي عليه أكثر.
ومش بس هتتعرفي على نفسك ده إنتي كمان هتتعرفي على ثقافة مختلفة. الثقافة اللي أكيد هتغير فيكي حاجات معينة وهتخليكي تبصي للحياة بنظرة مختلفة يعني هتلاقي إن ممكن ولد يكون والده في منصب عالي وشغال ديليفري عشان يعتمد على نفسه ويصرف على دراسته.
وده هيخليكي تبصي إنك حتى لو كان جوزك شغال في منصب كويس فمش عيب إنك تعتمدي على نفسك وتشتغلي في أي حاجة ويكون ليكي فلوسك الخاصة اللي تصرفي بيها على إحتياجاتك.
تكوين صداقات جديدة
هتتعرفي على أصحاب جوزك وزوجاتهم وهتلاقيكي واحدة واحدة بقى ليكي مجتمع صغير بتخروجوا مع بعض وبتتفسحوا في أماكن جديدة وبتزوري معاهم معالم سياحية كتيرة، وممكن كمان تعملوا أنشطة سوا زي إنكوا تشتركوا في جمعية مختصة بحقوق الإنسان مثلًا أو أي حاجة تانية وهتبني معاهم ذكريات جديدة زي الذكريات اللي عملتيها مع أصحابك.
حبك عند الناس
سفرك هيعرفك معزتك عند الناس عاملة إزاي وهتلاقي حبايبك كلهم بيعبروا ليكي عن حبهم وإنك واحشاهم قوي. وكل يوم هتلاقيهم بيسألوا عليكي وعلى أحوالك فهتحسي أكنهم حواليكي وده هيكسر عندك إحساس الغربة عنهم واحدة واحدة.
⇓نرشح لك⇓
