هو إيه مكعب «روبيك» اللي ممكن تحله في 26 سنة؟
عارفين المكعب اللي مليان ألوان ده اللي كل لما نجيبه منعرفش نحله ونرتب الألوان المتشابهة فيه جنب بعض؟ المكعب ده بقى اسمه «روبيك» وهنقولكوا على قصته في الموضوع ده.
المخترع
اخترعه «إرنو روبيك» وده نحات وأستاذ هندسة معمارية من أصل مجري، وعمله سنة 1974 عشان يستخدمه في الشرح للطلبة عنده. وقعد شهر بحاله عشان يعرف يحله ومكنش متوقع إنه هيبقى المكعب الأشهر في العالم. وكان اسم المكعب في البداية المكعب السحري .
مكعب «روبيك»
يتكون من 26 مكعب صغير بألوان مختلفة وفكرة وجود ألية داخلية جواه تسمح بتحريكه كويس جات من ملاحظة «روبيك» لحواف الحصى الموجودة في نهر الدانوب اللي شاف إنه ممكن يعمل في المكعب من جوا فتحات صغيرة زي اللي شافها في حواف الحصى ويحط فيها محاور تمسك القطع وتسمح إنه يتحرك في كل اتجاه.
سنة 1980
المكعب وصل للعالم الغربي سنة 1980 وبدل تسميته بالمكعب السحري بقى اسمه مكعب «روبيك» على اسم مخترعه وفاز في فترة ظهوره في الغرب بلعبة العام الأكثر مبيعًا.
300 مليون مكعب
إتباع أكتر من 300 مليون مكعب «روبيك» حول العالم وده من كتر ما إنها لعبة تستفز عقل الواحد إنه يحلها ولو معرفش يجرب تاني وهكذا.
زي ما هتشوفوا في المشهد ده من فيلم The pursuit of happiness إزاي مكنش عارف الراجل صاحب الشغل اللي عايز يروحه ويل سميث إنه يحلها وعمال يحاول وفي الأخر «سميث» أخدها وحلها قدامه.
مباريات لحل المكعب
من كتر ما اللعبة اتشهرت بقت في سنة 2003 تتعمل بطولات Speedcubing في أمريكا وفي كل العالم وهي عبارة عن مباريات بيقوم بيها بعض الأشخاص وفكرتها إنهم يحلوا مكعب «روبيك» في أقصر وقت ممكن.
20 حركة
فيه فريق عالمي في سنة 2010 شاف إن عشان تحل مكعب «روبيك» محتاج تعمل 20 حركة أو أقل. وفي سنة 2013 حقق ماتس فالك الرقم القياسي بحله لمكعب روبيك في 5,55 ثانية. أما جراهام باركر اللي كان بيحب جدًا الحاجات المعقدة قعد 26 سنة يحاول يحل فيه وفي الأخر حله ?
جيب بقى اللعبة من أي محل 2,50 جنيه ? وشوف الفيديو ده وجرب تحلها
