حتى التراجيديا لم تسلم من المصريين.. هذه القفشات أصلها حزين
فيه جمل اتقالت بشكل جاد في أفلام تراجيدية وتاريخية قلبت معانا بعد فترة بضحك لما نسمعها بتتقال في مواقف تانية بس بشكل كوميدي سواء في أفلام أو مسلسلات.
وده دليل على إننا شعب دمه خفيف الجد مش بيعلم فيه :D والأمثلة على ده كتيرة جدًا.
جهاد أنتي فين يا جهاد
الجملة دي كلنا حافظينها من فيلم «وا إسلاماه» لما كان حسين رياض بينادي على «جهاد» اللي هى لبنى عبدالعزيز عشان حاسس إنها موجودة في المكان اللي هو فيه وبيقولها «جهاد إنتي فين يا جهاد» فراحت سمعته وردت عليه وقالتله «سلامة أنا هنا يا سلامة».
جه بقي محمد صبحي في يوميات ونيس وبقى لما يجي ينادي على بنته «جهاد» يقلد نبرة صوت حسين رياض في الفيلم، وبنته كانت بترد بنفس طريقة رد لبنى عبدالعزيز في الفيلم :D
ثكلتك أمك
الجملة دي كانت بتقولها قبيلة قريش في الأفلام الدينية، ودايمًا كده لما حد يقولها يبرق عينيه ويضخم صوته ويروح قايلها ومعناها فقدتك أمك.
هى كانت بتتقال في إطار مشهد جد لكن بعد كدة طبعًا طريقة قولها خلت ناس كتير تضحك لما تسمعها بتتقال في فيلم من الأفلام. زي فيلم الإرهاب والكباب لعادل إمام ويسرا.
ومش بس الإرهاب والكباب لأ ده فيه فيديوهات اتعملت عنها وفيها تصور لشكل الشخص اللي بيقولها زي ما وصفته ليكوا فوق :D
عشان كنا رجالة ووقفنا وقفة رجالة
أما بقى الجملة الشهيرة دي لمحمود المليجي من فيلم «الأرض» لما كان واقف بيتكلم مع أهله وناسه. إتقالت في كذا كوميكس كوميدي لمواقف مختلفة في حياتنا. مثلًا عن معاناة الشغل :D
جواز عتريس من فؤادة باطل
المشهد ده من المشاهد المشهورة في فيلم «شيء من الخوف» لما القرية كلها أجمعت إن جواز «عتريس» اللي هو محمود مرسي من «فؤادة» اللي هي شادية باطل واتجمعوا كلهم وراحوا لغاية عنده.
جه بقى هاني رمزي في فيلم «جواز بقرار جمهوري» وقال جواز «عمرو» اللي هو بيقوم بدوره من «ريهام» اللي هي حنان ترك باطل وده بطريقة كوميدية :D ودمج مع المشهد ده صوت أهل القرية اللي كان في فيلم «شيء من الخوف».
أنت مش ابني.. أنت لقيط
معظمنا فاكر «فيلم الخطايا» والمشهد اللي اعترف فيه عماد حمدي لعبدالحليم حافظ إنه مش ابنه وإنه لقيط لمّه من الشارع وراح مديه بالقلم، واتفاجأ طبعًا حليم وساب البيت.
أشرف عبد الباقي في فيلم «رشة جريئة» عمل المشهد ده بالظبط مع واحد تاني قبل ما يدخولوا إختبار التمثيل اللي كان رايحه «أشرف» وقلد صوت عماد حمدي في الفيلم وراح ضرب الولد اللي قدامه :D .
