دليلك للسحور السليم في رمضان
«رمضان جانا وفرحنابوا بعد غيابوا وبقالوا زمان غنوا وقولوا شهر بطوله غنوا وقولوا أهلًا رمضان، رمضان جانا» :)
رمضان جانا. وكل سنة وإنتوا طيببن, وعشان سحورك يبقى مثالي فيه من غير عطش هنقولك في الموضوع ده على نصايح بيقدمها ليك دكتور مجدي نزيه ودكتورة ملك صالح من المعهد القومي للتغذية.
عادات غلط وتصحيحها
فيه حاجات كدة بنكون متعودين إننا نعملها في السحور لكنها متنفعش خالص وهى التربيزة اللي مليانة أكل كتير على إعتقاد إن لما ناكل كتير مش هنجوع وقت الصيام.
وده طبعًا غلط لأن كل ما هتاكل كتير هتحتاج تشرب مية كتير والمطلوب إنك تاكل الأكل المعقول. ومن العادات الغلط كمان الأكل قبل الأذان بوقت قصير جدًا والنوم بعد الأكل مباشرة وده غلط من ناحية إنك مش هتلحق تشرب ماية بالقدر الكافي.
نومك هيخلي الأكل مش هيلحق يتهضم واللي يفضل إنك تعمله هو السحور بدري عشان يكون قدامك فرصة إنك تشرب مية على قد ما تقدر. كمان من العادات ديه شرب الشاي وقت السحور وده طبعًا لازم تمنعه لأنه بيمنع إمتصاص الحديد في الجسم.
نصايح
متشربش السوايل اللي فيها كمية سكر كبيرة زي العصاير المحفوظة والمشروبات الغازية وأحسن حاجة تشربها هى المشروبات الطبيعية اللي تقدر تتحكم في معدل السكر بتاعها وتحط عليها معلقة صغيرة سكر خفيف حوالي 5 جرام على كوباية حجمها 150 جرام.
السحور المثالي
مفيش طقس سحور ثابت مفروض تمشي عليه بس الأساسي اللي لازم يكون معاك على السحور هو الزبادي والكاكاو باللبن لأنهم بيقللوا الإحساس بالعطش واللي لازم تبعد عنه نهائي الأكل اللي فيه ملح وتوابل وشطة لأنه بيزود إحساسك بالعطش وده اللي مش عايزينه لأن المشكلة مش في جوعك، لأ ده في عطشك.
اقتراح لسحور مثلًا يكون فيه زبادي وكاكاو باللبن وبيض بس ميتسلقش قوي عشان يبقى فيه التغذية الكاملة ليك وجبنة قريش اللي بتحتوي على كالسيوم وبروتين حيواني ومش دسمة. وعيش وعمومًا أي أكل متاح إنك تاكله في السحور بس بشرط إن الأكل ميكونش فيه ملح وتوابل وشطة.
