سر الكوكاكولا.. حاجات متعرفهاش عن المشروبات الغازية
طبعًا معظمنا بيحب يشرب المشروبات الغازية سواء البيبسي أو الكولا.. بس في حاجة كنا بنسمعها عن إن تركيبة البمشروبات الغازية سرية وخصوصًا الكوكاكولا وكمان مضرة وإن لو إتحطت على اللحمة بتدوبها وإنها بتستخدم للتنضيف.
طب الكلام ده كله إيه صحته؟ ده اللي هنعرفوا في الموضوع ده من «شبابيك» :)
السر
تركيبة كوكاكولا عملها صيدلاني سنة 1866 اسمه جون بيمبرتون وكان مدمن مورفين والتركيبة دي تعتبر أكبر سر في العالم خاص بالمنتج.
وتمت كتابتها سنة 1919 يعني بعد مرور نص قرن من عمل التركيبة، وفي سنة 1919 اشترت مجموعة اسمها «إيرنست وودراف» شركة كوكاكولا وكوكا كتبت التركيبة وسلمتها ليهم.
وراحوا حطوا الورقة اللي فيها التركيبة في أحد بنوك أتلانتا سنة 1920 وبعد 86 سنة من التاريخ قررت الشركة تنقل الورقة المكتوب فيها التركيبة من البنك وحطته جوا قلعة كبيرة شبه اللي بتطلع في الأفلام.
وكان حوالين القلعة كاشف للرنين المغناطيسي وبرضه حوالينها أسوار حديد محدش يقدر يفتحها غير بتركيبة معينة من الرموز وكان ورقة التركيبة محطوطة جوا علبة حديد جوا صندوق كبير.
والشركة دايمًا كانت بتقول إن العلبة موجود فيها أكبر سر تجاري محروس في العالم. ولسة لغاية دلوقت الشركة مصرحتش عن السر ده.
وطبعًا كان فيه ناس بتقول إنها معاها التركيبة لكن الشركة كانت بتنفي وبتقول مفيش غير تركيبة واحدة حقيقية بس.
الضرر
المشروبات الغازية أي دكتور مش بينصح إنك تشربها وده لأن التركيبة اللي جواها بيبقى فيها ضرر على صحة الواحد يعني كونها بتحتوي على كميات عالية من السكر فده هيخليك عرضة إن وزنك يزيد.
وحمض الفوسفوريك اللي فيها بيعمل هشاشة و ضعف للعظام وبرضه ليها تأثير مضر في إنها بتمتص الكالسيوم من الأمعاء بسبب وجود حمض الفوسفوريك و الستيريك.
وكمان وجود مادة الكافيين بيأثر بالسلب على إمتصاص الحديد وده بيؤدي لفقر الدم. والدكاترة بينصحوا دايمًا إنك تقلل شربها وتستبدلها بالعصاير الطبيعية.
تجربة اللحمة
كان فيه حكايات بتتقال إن لو حطينا مشروب غازي سواء بيبسي أو كوكاكولا على اللحمة لمدة يوم أو يومين.اللحمة هتدوب وده من كتر ما درجة الحموضة عالية في المشروب ده.
لكن تجارب الناس مع الموضوع ده أثبتت إن الصودا مبتخليش اللحمة تدوب. هى كل الفكرة إنها بتديها نكهة لذيذة لما تيجي تطبخ.
لكن مش معنى انها مدوبتش اللحمة يبقى متأثرش على عظامنا. لأن المشروبات الغازية زي ما اتكلمنا فوق فيها أحماض بتأثر على عظام الإنسان زي حمض الفوسفوريك اللي بيؤدي لتآكل الكالسيوم من العظام وبيخليها هشة وكمان فيها أحماض بتأثر على الأسنان وبتاكل المينا.
الاستخدامات
بدل لما تشرب المشروبات الغازية تقدر تستخدمها في التنضيف. ولو بتسأل إزاي هنقولك :)
- تنضيف كابينيه الحمام كل اللي عليك إنك تحط المشروب في الكابينيه وتستنى ساعة كدة وبعدين تمسك الفرشة وتنضف.
- كمان تقدري تستخدمي المشروبات الغازية في تنضيف الإزاز وده بسبب وجود حمض الستريك في المشروب الغازي. اللي بيساعد على تنضيف الإزاز بشكل كويس.
- التخلص من أي صدأ. املأ طبق بالمشروب وحط الحاجة المصدية فيه وهتلاقي الصدأ راح لأن المشروب بيحتوي على حمض الفوسفوريك اللي بيعمل على التأكل.
- كمان بعض المزارعين في الهند بيستخدموا الكوكاكولا بدلا من المبيدات عشان يقضوا على الأفات في الحقول.
- كوكاكولا كمان مشهورة بإنها تستخدم لإزالة بقع الدم من الملابس، والأثاث، والسجاد والجدران والأرضيات. وبتشيل كمان بقع الزيت والدهون من الهدوم وبعد كدة بتغسلي حاجتك بالماية.
ولو فيه لبانة لزقت في شعرك حطي شوية بيبسي عليها لمدة دقايق وبعد كدة اغسلي شعرك وهتلاقي اللبانة فكت.
