رغدة جلال الدين تكتب: والغيرة بوريه منها بوريه
الغيرة.. موجودة جوا كل واحدة فينا ومش بتيجي من فراغ، بتيجي لما نكون بنحب حد حب ملوش نهاية ومنقدرش نتخيل إنه ممكن يكون موجود مع حد غيرنا لأن مجرد التخيل ده يموتنا بالبطيء، وللغيرة نسب متفاوتة في حد غيرته ممكن توصله إنه يقتل حبيبه وفي حد لما بيغير بيفضل كاتم في قلبه وفي اللي يسكت ويتعامل عادي جداً ولا كأن حاجة حصلت بس فجأُة تلاقيه بعد عنك في سكوت وعشان كدة تعالوا نشوف مع بعض نماذج مختلفة من الغيرة :)
الأجنبية لما بتغير قول على نفسك يارحمن يارحيم
بعضنا واخد فكرة عن الأجنبية انها جامدة في مشاعرها مش بتغيير زينا وتتشحطف كدة :D بس هوريكوا فيديو دلوقت كنت اتفرجت عليه امبارح هيوريكوا ان الأجنبية والمصرية ايد واحدة في الغيرة :D
FUNNY! (ladies are gonna love this) Posted by MC Magic on Monday, September 15, 2014
ومن الحب ما قتل
في فيلم صراع في الميناء اللي كان بطولة عمر الشريف وفاتن حمامة وأحمد رمزي كان فيه مشهد مفروض عمر الشريف بيضرب أحمد رمزي ضرب جامد ويوقعه على الأرض وعشان مخرج الفيلم يوسف شاهين كان عايز المشهد ده احساسه يطلع حقيقي على الشاشة.
"شاهين" قال للمساعد بتاعه عاطف سالم يروح يقول لعمر الشريف انه حاسس إن أحمد رمزي بيحب فاتن حمامة وشافه بيبصلها وطبعاً الكلام ده خلى غيرة عمر الشريف تشعلل وفعلاً ضرب رمزي ضرب جامد في المشهد، وهنا نقدر نقول ان الراجل برضو لما بيغير الدنيا بتطربق :D
قالوا عن الغيرة
أيا داعياً بذكر العامرية إنني أغار عليها من فمي المتكلمي أغار عليها من ثيابها إذا لبستها فوق جسم منعم أغار عليها من أبيها وأمها إذا حدثاها بالكلام المغمغم وأحسد كاسات تقبلن ثغرها إذا وضعتها وضع اللثم في الفم
This is my Man don't touch
في يوم وداع نيلسون مانديلا رئيس جنوب أفريقيا، كان الرئيس أوباما وزوجته موجودين وفي نص اليوم زوجة أوباما بينت قد ايه هى مفروسة وغيرانة من واحدة كانت قاعدة جمب أوباما ولما تشوفوا الفيديو هتعرفوا قد ايه ان كيدنا عظيم :D
زوجة بيكهام وما أدراك ما زوجة بيكهام
فيكتوريا وهي بتتفرج على ماتش مع بيكهام خدت بالها انه بيبص على حد فقلبت وشها قلبة بتفكرني بقلبة نجمة ابراهيم في فيلم ريا وسكينة :D ، ليه كدة يا بيكهام يا حبيبي :D
م الاخر الغيرة موجودة في كل واحد فينا وده شئ طبيعي، بس الغيرة الزيادة عن الطبيعي هي اللي بنقول "بوريه منها بوريه".
