7 أمور غير منطقية في إعلان فودافون (مقال)

مقال بقلم- ميرال عزت

إعلانات رمضان السنادي كان فيها حاجات مش منطقية كتير، ومن أبرز الإعلانات غير المنطقية إعلان «فودافون» اللي يعتبر واحد من أبرز إعلانات رمضان السنادي.

بوتاجاز بروحين

بغض النظر عن لون التاكسي، اللي كان جاي فيه الفنان أحمد السقا، فرن ومفاتيح البوتاجاز في مشهد ليلى علوي وأحمد السقا، مش ناحية  البنت اللي بتجهز الأكل.

والغريب إن ليلى علوي، طلبت من واحدة من البنتين اللي معاهم «تطفي البوتاجاز ع الشربات»، والبنت تظاهرت بانها بتطفي البوتاجاز فعلا من الناحية التانية ! وده غير منطقي ويخلينا نسأل فين البوتاجاز ده اللي ليه مفاتيح من الناحيتين؟

يطلع إزاي؟

بعدين فيه حاجه غريبة الفنانة منة شلبي بتنادي «يا سمير يا قصير اطلع يا ابني فين الرموت» وده مش منطقي خالص لإن واضح جدا لما سمير جالها بالفانوس هو وصاحبه إنهم ساكنين في الأرضي، فازاي هيطلع يعني؟

الحشري

دخول الفنان حكيم على الخط مع الفنانة درة اللي بتسأل عن «علي» اللي بيزوغ كل عزومة، وطلبه من «قدري» إنه يشوف جاره مش منطقي على الإطلاق.

المفروض ان حكيم «جاي ماشي ومفيش تكاسي» فالمفروض يروح يلحق يفطر عند الناس اللي رايحلها، مش يتدخل في أمور خلق الله.

الفار الطباخ

الفنان شريف منير، بقي كلامه في الإعلان غير منطقي بالمرة، يعني هو إزاي عرف إن الأكل شمال وهو لسه بيتحط  على السفرة.

بعدين شريف منير شكله هو اللي عامل الأكل مش منال، بجوانتي المطبخ اللي طالع بيه ده، فلو الأكل شمال يبقى هو اللي مبيعرفش يطبخ، أو الأكل ده وراه الفار الطباخ مش هو ولا منال.

حجر إسعاد

الأستاذ اللي كان بيقعد على حجر الفنانة إسعاد يونس وبيعملها وهو صغير، مش منطقي خالص يفضل لحد ما بقي زي ضلفة الباب بيلس لبس أطفال.. مش منطقي خالص.

زلابيا وأرقام

والغريب وغير المنطقي كمان بقى إن الفنان أشرف عبد الباقي طالع بطبق زلابية وفيه طبق كبير بره ع الترابيزة. كان ممكن يعني يطلع بطبق كنافة بالمانجة ولا هي غالية على الفنانة إسعاد يونس.

أخيرا.. مش طبيعي ترقيم الأطفال عشان سمير غانم يقول «يا منه ده سابع عيل.. م كفاية عيال يا منيل».. المشاهدين بيعرفوا يعدوا برضو والله.