الفشل ليه فوايد.. متزعلش أنت كسبت
فشلت في حاجة كنت عايزها والدنيا ضلمت في وشك؟ متزعلش مش دي النهاية لأن فشلك ده ليه فوايد عليك، أيوة زي ما بقولك كدة :)
في التقرير ده هتعرف إزاي من كلام الدكتور النفسي محمد مزيد، وأستاذ علم النفس بجامعة الأزهر دكتورة هدي أبو شهدة، وتجربة الشاب حسام محمد الرسام المعماري.
«مزيد» بيقول إننا لازم نتعرض في حياتنا للفشل عشان نقدر نتعلم، وإن أي شخص ناجح اتعرض في حياته للفشل والأمثلة على كدة كتير توماس إديسون وأينشتاين ونيوتن، والفشل هيخليك تعمل لنفسك عملية عصف ذهني.
قصص نجاح تنقذك من الفشل.. 7 فيديوهات من «TEDx»
«مزيد» بيقول إن بعدها هتستحضر قوتك وثقتك بنفسك وهيكون عندك صبر في إن اللي جاي هيكون أحسن وهتكون قد التحدي في إنك تخوضه وتكمله وأهم حاجة إن يكون عندك إيمان بالله وتعرف إنه هيكتبلك الخير وإن أي تجربة فاشلة مريت بيها هو عايز يعلمك منها حاجة.
وبتتفق دكتور «هدى» مع «مزيد» في نقطة إن أي تجربة فاشلة في حياة الواحد بتخليه يكتسب خبرة.
وبتقول كمان إنه يقرب من ربنا أكتر لأنه مكنش قريب منه بالشكل الكافي. وعليه إنه يحول خبرته اللي إكتسها من شيء فاشل سلبي لخبرة يحطها في شيء إيجابي.
وكمان ميكررش تجربة فاشلة مرة تانية ويعرف يتعلم ويكتسب منها خبرة وده بيرجع لبناء الشخص النفسي إذا كان بناء سليم أو غير سليم لأنه لو غير سليم وضعيف هيكرر الفشل مرة تانية، فعليك إن يكون بناءك النفسي سليم وتاخد خبرة من أي تجربة فاشلة تمر بيها وتعرف إنها مش نهاية الدنيا.
كيف تتعلم من الفشل؟.. نصائح من رواد الأعمال
حسام محمد الرسام المعماري بيحكي تجربته وبيقول :
مرت عليا كذا تجربه سيئة من ساعة لما بدأ معايا موضوع الرسم. كنت في الأول بتعلم من فيديوهات وبقلد رسومات وناس كتير أحبطتني وقالتلي اني لازم ابتكر ومنقلش، مع اني لسة في بداية مشواري.
وقعدت فترة طويلة مبرسمش بسبب كلام الناس وفي مرة حسيت وفهمت إن كلام الناس طول عمره بيرجع لورا ومبيقدمنيش لقدام ومن ساعتها بقيت اعمل اللي يريحني واللي بحبه أنا مش الناس.
وبردو مبقللش من رأي الناس لا بالعكس بسمع الحلو والوحش الحلو بيشجعني اني اكمل والوحش بيساعدني اني اطور من نفسي اكتر.
رسمة حسام محمد
