الكيراتين والبروتين بيعملوا إيه في شعرك؟.. الإجابة مفاجئة

كوافيرات كتير أول ما تروحي ليهم تلاقيهم بيقولوا ليكي مفكرتيش تعملي كيراتين أو بروتين.

متفكريش بقى، لأن دكتورة إستشاري الأمراض الجلدية وتجميل الجلد بالليزر بجامعة القاهرة هدى الشوربجي بتقولك إن الكيراتين والبروتين ليهم أضرار على الشعر.

الكيراتين والبروتين

دكتور «هدى» في البداية بتوضح إن الكيراتين والبروتين حاجة واحدة بمعني إن الكيراتين برضه فيه بروتين وكتر الأسامي المختلفة ما بين إن فيه كيراتين وبروتين ده مجرد شو إعلاني.

عبارة عن إيه

الكيراتين والبروتين عبارة عن مواد معينة بتتحط على الشعر من برة عشان تحافظ عليه وتغذيه وتديه لمعان.

في الباطن مشاكل

لكن المشكلة إن المواد دي بتعالج الشعر من برة مش من الجذور، ولو واحدة بتعاني من تساقط الشعر مينفعش تستخدم الحاجات دي أبدًا عشان تعالج شعرها لأنها هتوقع اللي باقي منه ولازم تلجأ للدكتور يعالجها.

الكيراتين والبروتين بيتحطلهم كمان مادة الفورمالين بنسبة كبيرة، ودي مادة عامة بيتم استخدمها لحفظ الجثث لكن مع الشعر بتخليه مفرود جامد وأي منتج بيفرد الشعر بنسبة 100 % بيأذي الشعر جدًا.

حتى الكيراتين والبروتين العلاجي رغم إن فيه نسبة قليلة من الفورمالين لا تتعدي الـ 2% لكن النسبة دي بتعمل للشعر تمويجة خفيفة مش بتفرده.

بالإضافة إلى أن طريقة وضعه على الشعر بتكون طريقة مجهدة وبتوقع الشعر لأنهم بيثبتوه عن طريق الحرارة يعني الكوافير بيمسك الخصلة يقعد فيها كتير عشان يثبت الكيراتين أو البروتين فيها بالحرارة.

99,9 %

الطبيعية

دكتور «هدى» بتنصحك إنك تستخدمي الوصفات والزيوت الطبيعية زي زيت الزيتون والصبار وجوز الهند وزيت الخروع بس تكون مضمونة المصدر أهم حاجة.

الزيوت دي بتغذي الشعر وبتخليه طري بالإضافة إلى إنك لازم تاكلي أكل سليم وتشربي مية كتير عشان تقدري تغذي الشعر من جذوره.

وكمان ابقي روحي قصي أطراف شعرك كل شهر ونص عشان ده بيمنع التقصف وبيخلي الشعر يطول  بشكل كويس بدون تقصف. وطبعًا لو واجهتك أي مشاكل في شعرك لازم تلجأي للدكتور عشان يديكي العلاج الصحي السليم.

قد يهمك أيضا: للبنات.. تعرفي على أسرع تسريحات الشعر