مش عارف تعمل علاقة؟.. اعرف العمايل تبقى إزاي
لو بتواجهك مشكلة إنك مش عارف إزاي تبني علاقة مع اللي حواليك وتكون ليك دايرة معارف، في الموضوع ده هنقولك إزاي من خلال تجارب واقعية، وكلام الدكتور محمد هاني استشاري الصحة النفسية.
أصل المشكلة
أصل مشكلة إنك مش عارف تبني علاقة مع اللي حواليك بيرجع لأنك شخص انطوائي، من صغرك وأنت بتميل للعزلة والسبب في ده إن الأسرة مكنتش بتخليك تشارك في المناسبات الإجتماعية ويكون في احتكاك مع الناس.
الحل
في البداية لازم تقرب من ربنا جامد لأن الشخصية السوية نفسيًا مبتجيش إلا من خلال الثبات الديني. والثبات ده هو اللي هيخليك تقدر تمشي على روشتة دكتور هاني اللي هنقولها ليك دلوقت.
ابني جدار من الثقة مع نفسك وخد قرار إنك هتتفاعل مع المجتمع عشان تقدر تحقق ذاتك وأهدافك وطموحاتك وتسعى لتحقيقها وفي وسط ما أنت بتعمل كدة هتلاقي نفسك بتتفاعل مع الناس وبتبني ليك دايرة معارف وصداقات.
وأهم حاجة في الشخص اللي هتتعرف عليه إنه يكون شخص كويس يأثر في حياتك بالإيجاب مش بالسلب. ولازم يكون عندك فكرة تقبل الرأي والرأي الأخر ويكون ليك قرارات ورأي سليم يأثر في الناس حواليك بالإيجاب مش بالسلب.
الإيجاب هيحبب الناس فيك وهيقربوا منك، والسلب هيخليهم يبعدوا عنك. وعليك برضه إنك تمارس أي هواية إنت حاببها لأنه هتخليك تتفاعل مع الناس.
قد يهمك أيضا:لو انتي انطوائية.. اتحدي نفسك بالوظائف دي
دي كانت روشتة دكتور هاني اللي هتخليك تعرف إزاي تبني علاقة مع اللي حواليك. أما في الجزئية التانية من الموضوع حبينا نسأل بعض الأشخاص وإدونا حلول كتير تقدر تستفيد منها.
سارة توفيق بتقول «الكورسات بأنواعها بتغير الموضوع ده بشكل كبير عشان بيكون فيه شغل في جروب واحد مش كل واحد لوحده وكمان بيكون فيه تدريب إنه الواحد يطلع ويتكلم قدام الناس فهيتعلم إزاي يتفاعل مع الناس ويبني علاقات مع اللي حواليه».
أما كرولوس ويلسون بيقول «اللي يقدم محبة وعطاء للي حواليه دول أكتر حاجتين يخلوا اللي حواليه يحبوه وكمان يكون لسانه حلو. في ناس بتعمل حاجات حلوة كتير بس لسانها بيبوظ كل حاجة».
ويتابع «كمان يهتم بإهتمامات اللي حواليه. يعني أنا أعرف حد بيحب الورد علشان أقرب منه ممكن أجبلوا ورد في وقت معين وهكذا، بس في نفس الوقت مبقاش رخم مدلوقش نفسي الناس بتكره الشخصية دي حتي لو أحسن شخصية. لازم أكون وسط ولا مدلوق ولا متكبر ومعتقدش حد بيعمل كل ده و مش هيعمل علاقة مع حد».
أما نرمين علاء الدين بتقول «يحاول يشارك في الحوارات اللي بيتكلموا فيها اللي حواليه ميبقاش معزول كده بس مش معني كدة إنه يتكلم في حوارات تافهة مش عاجباه».
اسراء عماد شايفة إنه «هو يبدأ يحب نفسه الأول بس قبل ما يقرر يخرج للناس. لازم يتعود يعرف يفرح نفسه يروح ملاهي وكافيهات وبعد كده يبدأ يزور دور أيتام أو مسنين وعندها هيتكلم ويفرض شخصيته بأسلوب لبق لما يبدأ يساعد الغير وده غالبًا مفتاح دخوله للعالم الاجتماعي ومفيش مانع لو دور على النت إزاي تكون اجتماعي؟ وياخد الطرق اللي تريحه ويبدأ يطبقها».
وتضيف اسراء إن «دايمًا بداية أي إحتكاك بتبدأ بكلمة لو سمحت؟ بمعنى مثلًا لو نفسه يتعرف على حد ومكسوف، يتلكك ويسأل مثلًا عن ساعة عن مكان يقول لحد اعدل التيشرت بتاعك مش مظبوط حتى لو معدول كده يعنى وكله بيجر كله».
