للحوامل.. خلي بالك الأطعمة والمشروبات دي خطر

لو حامل خلي بالك إن فيه أطعمة ومشروبات مينفعش أبدًا إنك تاخديها طول فترة الـ9 شهور.

في التقرير ده مدرس واستشاري النساء والتوليد بكلية طب القصر العيني دكتور عمرو حسن بيقولك عليها.

الأكل النيء

أي أكل نيء، أو مش مطبوخ يعني متحطش على النار ممنوع تاكليه زي السوشي والمايونيز لأنه فيه بيض نيء واللانشون والبسطرمة. لأن الأكل الني ممكن ينقلك داء القطط عن طريق الدم ويوصل للمشيمة.

ويعمل تشوهات للجنين وداء القطط مش شرط يجي ليكي عشان عندك قطط زي ما متعارف عليه لأ ممكن يجيلك عن طريق الأكل الني وعشان كدة لازم الأكل يكون مستوي كويس ولو روحتي أي مطعم اطلبي إن الأكل يكون مستوي ومفيش أي حتة فيه نية.

الكبدة والتونة

ممنوع تكتري من أكل الكبدة خصوصًا في أول 3 شهور في الحمل لأنك بكدة بتاخدي كميات عالية من فيتامين أ اللي موجود في الكبدة و على الرغم إن الفيتامين ده ليه فوايد على الرؤية وسلامة الجلد إلا إن كتره ممكن يوصل  للمشيمة عن طريق الدم ويعمل تشوهات للجنين. ولو عايزة تاكليها يبقى مرة في الأسبوع بس.

وكمان بيحذر الدكتور من أكل التونة بكميات كتيرة لأن التونة بتحتوي على مادة الزيبق وهى من المواد الغذائية لكن كتر أكلها ممكن يوصل المادة ديه للمشيمة عن طريق الدم برضه ويحصل تشوهات لمخ الجنين. ولو عايزة تاكليها الدكتور بيقولك تاكلي علبتين في الأسبوع فقط.

الأكل الغني بالسعرات الحرارية

لازم تقللي من الأكل اللي مليان سعرات حرارية عالية زي الحلويات الشرقية والنوتيلا وغيرها وغيرها لأنها بتعمل زيادة للوزن وبتخليكي عرضة للإصابة بإرتفاع ضغط الدم والسكر.

تقليل الملح

قللي خالص من الأكل اللي فيه زيادة في الملح زي المخلل والطرشي لأنه بيخليكي أكتر عرضة للإصابة بإرتفاع ضغط الدم والملح كمان بيخزن ماية في الجسم وبيخليه يورم.

ممنوع المشروبات الغازية

ابعدي خالص عن المشروبات الغازية لأن فيها سعرات حرارية عالية جدًا والصودا اللي فيها بتوقف الكالسيوم فبتضيع فايدة اللبن اللي أنتي بتشربيه وكمان على المدى البعيد شربها هيعملك هشاشة في العظام. واستبدلي المشروبات دي  بالعصاير الفريش واللبن والماية.