للولاد.. 7 أسباب هتخلي شريكة حياتك تتخلى عنك
يخطئ كثير من الرجال في فهم المرأة، ويظنون أنه حينما تفتح أبواب قلبها للحب لن تتخلى عنه أبدا، إلا أن هذا غير حقيقي على الإطلاق.
الواقع يقول إن هناك بعض الصفات التي إذا اكتشفتها المرأة في حبيبها لن تستمر معه، وذلك وفقًا للاستبيان الذي قام به «شبابيك» لمعرفة الأسباب التي تُجبر المرأة على التخلي عنك.
قد يعجبك أيضًا⇐«انسى أبوك وأمك».. اختيار شريك حياتك بهذه الطريقة خاطئ
عدم التفاهم
مهما بلغ الحب بين الطرفين، فلن يستمر طويلًا مادام كان التفاهم غائبًا؛ لأن كلمات الحب ليست كفيلة وحدها على شرح وجهات نظرنا وما نعنيه بحق من كل كلمة.
تقول «أماني محمد»: «مفيش سبب ممكن يخلي البنت تتخلى عن شريك حياتها زي عدم التفاهم اللي مبيعوضهوش أي حب، ده غير إن الحب محتاج تفاهم علشان يعدي أي صعوبات فمبالك بقى لو مفيش تفاهم يبقى الحب عمره ما هيستمر».
الإهمال
الحب في كافة مراحله يحتاج منك الرعاية، فإذا اهملته وشغلتك الظروف، فلا تنتظر منه العودة مرة أخرى.
أما «رضوى شحاتة» فترى: «علشان العلاقة بين أي اتنين تستمر، لازم يعرفوا إزاي يراعوا حبهم وميكتفوش بس بالكلام لإن الحب كلام واهتمام بمجرد ما يختفي الاتنين هتلاقي العلاقة بتنهار».
الخيانة
تُعد الخيانة واحدة من أهم الأسباب التي تُعجل بانتهاء العلاقة مهما كانت قوتها، سواءً كانت خيانة جسدية أو عاطفية.
بينما توضح هاجر أحمد أن: «مفيش حاجة توجع مشاعر البنات زي إن حبيبها أو خطبيها، جوزها أيًا كان، يخونها مع حد تاني، مش مهم عندها شكل الخيانة إيه هي في كل الأحوال بتبقى خيانة وفي الوقت ده الحياة بتبقى مستحيلة».
الكذب
حينما يختلط الكذب بالحب، تصبح الكلمات بلا أي معنى، فالمشاعر زائفة والعلاقة أيضًا ليس لها أي وجود.
أما «مروة سعد»: «طول ما الكذب موجود في أي علاقة مستحيل إنها تستمر؛ لإن الكذب هيجيب معاه شك والشك هيجيب عدم ثقة، وهتفضل الدائرة توصل لبعضها في النهاية لحد ما تقفل على خيانة وإهانة».
عدم الثقة
إذا كانت الصداقات تقوم على أساس من المودة، فأعلم جيدًا أن العلاقات إذا اختفت منها الثقة ستتربع الشكوك على عرشها.
تقول سمر أمين: «بالرغم من سهولة زرع الثقة عند الطرف التاني إلا إنها بتكون محتاجة حد صادق مش بس في مشاعره لا كمان مع نفسه، علشان كده لو جه في مرة كذب وهي عرفت في الوقت ده الثقة مستحيل ترجع بيهم وهتفضل الشكوك محاصراهم».
البخل
إذا كنت تعتقد أن البخيل بخيل فقط في أمواله، بالطبع لا فالبخيل بخيل في كل شىء حتى في مشاعره، وهو لم لم تستطع المرأة تحمله أيًا كانت الظروف.
ترى ياسمين مجدي: «من أكتر الأسباب اللي بتنهي العلاقة بين أي اتنين مرتبطين، صفة البخل اللي بتحس البنت معاها إنها مش متقدرة، ده غير إن البخيل بيبقى عايش حياته علشان نفسه وبس والحب مبيعرفش أنانية».
اصطناع الحب
مهما بلغت قدرتك على إظهار مشاعر ليست حقيقة، فحتمًا ستأتي اللحظة التي تنكشف فيها الحقيقة لتظهر مشاعرك دون أي تزيف.
بينما ذهبت بسمة محمد لسبب آخر: «في ولاد كتير بتعرف تمثل إنها بتحب البنت وده بيكون إما علشان في غرض معين هما عاوزينه أو إنه مجبر أصلًا عليها من البداية فبيضطر إنه يبين حاجة عكس الحقيقة، طبعًا مفيش مبرر للأسباب دي لإن الموضوع لما بيدخل في جواز بتبقى عواقبه أكتر وممكن جدًا ينفصلوا في النهاية».
قد يهمك أيضًا⇐لعلاقة متجددة مع شريك حياتك.. اتبع هذه الخطوات
