وإيه يعني الامتحانات اتأجلت.. 6 نصائح عشان نفسيتك بالدنيا
طلبة الثانوية العامة زعلانين جدا عشان الامتحانات اتأجلت، وامتحان الديناميكا اتلغى، بس احنا بنقولكم في التقرير ده نفسيتكم بالدنيا يمكن تكون جت بفايدة، يا راجل ارمي ورا ضهرك :)
في التقرير ده 6 نصايح هنقولك فيها إزاي تقدر تخفف التوتر اللي حاصل ليك بسبب تأجيل وإلغاء الإمتحانات ومتخلهوش يأثر عليك نفسيًا. والنصايح دي مقدمة من الدكتور النفسي جمال فرويز و الدكتور أحمد عبدالله.
التعامل بهدوء
عليك إنك تتعامل بهدوء تام مع فكرة إن الإمتحان اتلغى أو اتأجل ومتخودش الموضوع على صدرك وتعامل مع امتحانات الثانوية العامة على إنها امتحانات عادية زي أي إمتحان متبصش عليها إنها بعبع.
اقرأ أيضا:تعرف على أفضل نظام غذائي للتركيز في المذاكرة
إتعامل معاها على إنك هتعمل اللي قادر عليه وتحل الإمتحان بأفضل أداء. وحاول بقدر الإمكان متتأثرش بتهويل أهلك والإعلام للموقف وده لأن توترك ملهوش لازمة لأنه هيضرك وهيزيدك إرتباك.
فرصة للمراجعة
بص على تأجيل الإمتحانات إنها فرصة ليك تراجع تاني وتالت حتى لو أنت متأكد إنك مراجع على كله كويس وده عشان تكون واثق ثقة تامة إنك هتجيب المجموع اللي إنت عايزه وتدخل الكلية اللي عايزها.
قد يهمك أيضا: للطلاب.. حاجات تبعد عنها عشان متنساش في اللجنة
مشروبات هادية
كتر من شرب المشروبات المنعشة زي الليمون، والكركدية، والبرتقال. أي مشروب أنت حابه لأنه هيساعد على إنه يهدي أعصابك ويخليك فريش.
النوم بانتظام
نام بانتظام وبعدد ساعات كافية لأن النوم هيريح أعصابك وهيخليك في حالة إرتخاء وكمان قبل الإمتحان نام كويس جدًا لأن النوم هيساعدك إنك تكون مركز وفايق وأنت بتحل الإمتحان.
خروجات وسفر
لو فيه وقت قدامك قبل إعادة الإمتحان حاول تسافر في أي مكان وتغير جو عشان تحسن نفسيتك وكمان بعد الإمتحان اخرج في نفس اليوم واعمل أي نشاط تاني غير المذاكرة لأن الدماغ بتستريح لما بتعمل حاجة تانية.
الحق راجع
بص على إن إلغاء وتأجيل الإمتحان رجّع حقك اللي كان هيضيع وهيتساوى مع اللي مذاكرش حاجة والإمتحان اتسرب ليه وكان هيجيب مجموع عالي زيه زيك وكان بكده هيبقى فيه ناس بتاخد حق مش حقها، وإن الدولة باللي عملته من تأجيل الإمتحانات هترجع الحق للناس.
