صور| مقهى لضحايا الهجمات الحمضية في الهند
رغدة جلال الدين
وأنا بقلب على صفحة الفيس بوك لقيت صفحة "Being women" منزلة بوست خلاني أحس قد إيه إن الإرادة أقوى من أي شيء حاسس إنه بيقيدك ومواجهة الشيء ده بيخليك تكسر القيد اللي جواك وتنجح في حياتك وتخلي الناس كلها تاخدك قدوة في حياتها
البوست بيتكلم عن أول كافيه اتفتح في "أغرة" وهى مدينة في الهند أصحابه من اللي نجوا من هجوم الأحماض، وده شكل من أشكال العنف إني أرمي على الواحد حامض بغرض التشويه والتعذيب والقتل ومن الأحماض المنتشرة المستخدمة في الهجمات ديه حمض الكبريتيك والنيتريك أما حمض الهيدروكلوريك فبيتم استخدامه في بعض الأحيان ، الأحماض ديه على المدى الطويل بتصيب الواحد بالعمى و بيبقى في ندبات في الوش والجسم.
كافيه "Sheroes" مكانه جمب تاج محل وتأسيس المكان كان بالتعاون ما بين الناجين والمنظمات غير الحكومية ومؤسسة "chaanv" اللي مقرها دلهي هى اللي اختارت اسم الكافيه "shearoes" كتحية منهم لشجاعة الناجيين .
بتقول "Ruba" أحد الناجيين إن السكان المحلييين دعموهم، وإنها اتعلمت حاجات كتيرة عن إزاي تشغل المكان وكمان الناس اللي كانت بتبص لينا بإستغراب دلوقتي بتيجي تشجعنا وده بيخلي معنوياتنا ترتفع..
أما "Sapna Bhavnani" عضوة حملة إيقاف الهجمات الحمضية في افتتاح الكافيه فقالت إن الناجيين أظهروا إنهم مش أقل من أي شخص تاني .
أي حد من السياح بينزل تاج محل بيشدوا ديكورات الكافيه اللي عملتها واحدة من الناجيين
زي ما بتقول "Alisha Nangia" وهي مواطنة هندية زارت المكان بتقول إن الموسيقى والتصميم الداخلي للمكان عظيمة جداً وإنها مبسوطة إنها جات هنا بالصدفة وإن البنات دول "نساء شجعان"
وقال "Harshit Raj" سائح من كيرلا إنه فرحان جداً بالفكرة و إن زيارته للكافيه عمره ما هينساها؟
كافيه "Sheroes" هو البداية بالنسبة ليهم لأن قدام هيتفتح كذا كافيه في أماكن مختلفة زي دلهي وكنبور وأماكن تانية كتير وده اللي قاله "Alok Dixit" مؤسس حملة وقف الهجمات الحمضية.
أخيرا.. المصدر صحيفة تايمز الهندية. ولو حابب لو حابب تشجعهم روحلهم في أول سفرية ليك في الهند
