لو مش عايز تخرج.. 6 أفكار تقضي بيها العيد في البيت
لو مش عايز تخرج في العيد وعايز تقضي الاجازة وانت قاعد في بيتك، في الموضوع ده هنقولك على شوية أفكار تعملها وكل سنة وانت طيب :) لمة صحاب
اتصل بأصحابك وخليهم يجوا اليوم ده ويجيبوا معاهم أي لعبة واتسلوا سوا بيها وكمان طلع ذكرياتك معاهم من صور وفيديوهات أيام الطفولة وطبعًا وجود الحاجات ديه في أي قاعدة بيهلك من الضحك وعليك بقى إنك تجهز القعدة من أكل وحلويات.
بس أهم حاجة إنك تشترط عليهم يقفلوا موبايلاتهم ويبعدوا عن الفيس بوك وتويتر يوم واحد ويستمتعوا باللمة.
أفلامك
حمل أفلام نفسك تشوفها سواء أجنبية أو مصرية أو هندية. بس حملها قبل العيد عشان يكونوا جاهزين عندك إنك تتفرج عليهم على طول في أول يوم العيد.وضلم أوضتك وجيب فيشارك وعيش أجواء السينما في بيتك.
قراءة مع موسيقى
اشتري كل الروايات اللي نفسك كنت تقراها وخلي العيد فرصة إنك تقراها ومع القراية شغل موسيقى بتحبها عشان تدخلك جوا حالة الرواية.
لعب مع العيلة
استغل العيد بقى إنك تلعب كوتشينة ودومينو وطاولة مع عيلتك واسمع حكاويهم واتكلم معاهم في كل اللي نفسك فيه أو غني وطبل وخليهم يغنوا وياك أي أغنية وهتلاقي البيت بقى مليان بهجة والضحكة مالية وشكوا :)
فرجة على مسلسلات فاتتك
مسلسلات رمضان كانت كتيرة ومتنوعة بس فيه أكيد كام مسلسل قولت هتشوفهم بعد لما يخلص رمضان وأهو رمضان خلص والعيد جاي وأهو فرصة إنك تتفرج على المسلسلات اللي عايز تشوفها.
وفيه مواقع كتيرة تقدر تتفرج من عليها على المسلسلات اللي حابب تشوفها.
تأمل
أو ممكن إنك تقضي فترة أجازة العيد في إنك تبعد عن دوشة السوشيال ميديا وتتأمل في الملكوت وتتكلم مع نفسك وتديها حقها شوية وتجدد طاقتك عشان ترجع بحماس تمارس حياتك تاني بعد الأجازة.
