طالع من رمضان وأنت خاسس؟.. طرطقلي ودانك
لو طالع من رمضان وأنت خاسس وعايز تحافظ على وزنك ده بعد رمضان هنقولك في الموضوع على روشتة تمشي عليها بيقدمهالك أستاذ ورئيس وحدة التثقيف الغذائي بالمعهد القومي للتغذية ورئيس المؤسسة العلمية للثقافة الغذائية دكتور مجدي نزيه.
التغذية الصحية
دكتور «نزيه» بيبدأ كلامه معانا وبيقول إن التغذية الصحية لها قواعد تطبق على الجميع سواء وزن الشخص زائد أو ناقص وده عشان يقدر يحصل على احتياجاته الغذائية الصحية طبقًا لوضعه القائم من حيث الطول والجنس والسن والنشاط اليومي المبذول.
وإذا كان الشخص وزنه أقل من الطبيعي عليه إنه يزود من أغذية الطاقة اللي هي النشويات، والسكريات، زي العيش والمكرونة والعجائن ثم الحلويات، وإذا كان الشخص وزنه زايد عليه أنه يزود من أغذية الوقاية اللي هي السلطة ويقلل من أغذية الطاقة اللي اتكلمنا عنها فوق.
النظام الغذائي الصحي
عشان تحافظ على وزنك لازم تعرف إن الأكل كله في العالم بيكون من 6 الصبح لـ6 بليل، قبل 6 الصبح لأ وبعد 6 بليل لأ. يعني طول ما الشمس طالعة كل براحتك وأول ما الشمس تغيب متاكلش أي حاجة.
ولازم تنظم مواعيد أكلك على أساس إن الفطار يكون الساعة 6 الصبح والغدا الساعة 12 الضهر والعشا الساعة 6 المغرب وده النظام الصحي اللي ماشي عليه العالم.
وعشان تمشي عليه جهز في بيتك علبة فيها الأكل اللي أنت عايزه عشان تعرف تاكل في المواعيد المحددة دي في أي مكان كنت فيه.
بهذه الطريقة.. ستخسر الوزن دون الشعور بالجوع
النوم المنتظم
ومع التزامك بالمواعيد اللي قولناها، عليك كمان إن يكون نومك منتظم. لأن النوم المنتظم شيء أساسي في النظام الغذائي الصحي اللي هتمشي عليه.
وبعد لما عرفت النظام الغذائي الصحي عليك إنك تنسى تمامًا الأنماط الغلط اللي كنت متعود عليها من إني هاكل لما أفضى في أي وقت أو إنك هتسهر بليل كتير لأن كل ده هيعمل خلل في نظامك الصحي وبالتالي هيأثر على وزنك.
لا افراط ولا تفريط
ألف باء تغذية صحية هي الجملة دي اللي عليك إنك تاخدها قاعدة في حياتك كل براحتك لكن متكترش في الأكل خليك معتدل ووسطي في أكلك متمنعش نفسك من حاجة لأن الحاجة اللي بتمنع نفسك منها جسمك بيكون محتاجها.
أنظمة التخسيس
وعلى ذكر منع الأكل دكتور «نزيه» بيحذر من إنك تمشي ورا كلام أي دكتور من اللي مسمي نفسه دكتور تخسيس وبيديك نظام غذائي بيدمرلك صحتك مش بيحافظ عليها.
يعني لما دكتور يديك نظام غذائي إنك تاكل موز طول اليوم ده هيأثر عليك إن جسمك مش هيمتصها لأن المادة الغذائية الفرط اللي بتتاكل لوحدها لا تمتص ومحتاجة أكل جنبها عشان يمتصها والدكتور كمان اللي بيقولك متاكلوش لا رز ولا مكرونة ده هيأثر بالسلب على الكبد وهكذا.
حان وقت التخلص من الكرش.. إليك النصائح
العمليات
دكتور «نزيه» بيحذر كمان من إنك تلجأ للعمليات اللي بيقولوا عليها زي تكميم وتدبيس وبالون المعدة. لأن فكرة جزء من المعدة بيتكمم أو بيدبس ده بيأثر على نظام حياتك بالسلب. وبيحولك من إنسان طبيعي لمريض مزمن محتاج تمشي على أدوية وترجع تقول ياريت اللي جرى ما كان.
والصح
الصح إنك تدور على الغلط فين وتروح تصلحه يعني لما وزنك يزيد ده بيكون كتر أكل وقلة حركة وأي مشكلة لا تعالج إلا بزوال أسبابها يعني ظبط أكلك وإتحرك.
بينها «حمية 5:2 السريعة».. أنظمة «ريجيم» لم تسمع عنها
التغذية والجيم
ولو واجهتك مشكلة عليك إنك تتابع مع دكتور تغذية ومتروحش أبدًا لدكتور تخسيس لأن المشكلة بتكون إنك عايز نظام غذائي يساعد إن جسمك يكون وزنه كويس.
والنظام الغذائي ده اللي متخصص فيه هو دكتور التغذية لأنه عارف تركيبة الجسم محتاجة إيه. والعامل المساعد مع دكتور التغذية هو الجيم اللي عن طريقه هتحرك جسمك وهتعمل رياضة.
وحتى لو مفيش مشكلة واجهتك تابع مع دكتور التغذية من الحين للأخر عشان تطمن على صحتك الغذائية.
ونصيحة للي وزنه زايد وعايز في شهر يخس 15 كيلو، أنت وزنك زاد على مدار سنين من عمرك فمش صحي إنك تنزل وزنك بإستخدام طرق غير صحية في شهر، والصحي إنك تخس 2 كيلو شهريًا أونص كيلو أسبوعيًا وهي دي الحاجة الصحية المعقولة.
