البطولة الجماعية في أعمال رمضان.. نجحت ولا إيه؟
روح العمل الجماعي اللي بيضم كذا نجم كانت موجودة بوضوح في أعمال رمضان 2016. والوضوح ده خلانا نسأل الناقدة الفنية ماجدة خير الله: هل فكرة العمل الجماعي ثبتت نجاحها أكتر من العمل اللي بيعتمد على فكرة النجم الواحد؟
الجماعي والبطل
«خير الله» بتقول إن مش بالضرورة العمل الجماعي يكون أنجح من العمل اللي بيعتمد على فكرة النجم الواحد لأن فيه أعمال بتعتمد على فكرة البطل الواحد وبتكون ناجحة برضه، ومن زمان موجودة الأعمال اللي بتعتمد على ده وده.
المقياس النص
وبتكمل «خير الله» كلامها وبتقول إن المقياس هنا بيكون النص اللي مفروض يتكتب بحرفية بحيث لو العمل قايم على نجم واحد يكون متوقع ليه النجاح ولو عمل بيعتمد على وجود كذا نجم يكون كل نجم محطوط في مكانه مش مجرد إن المسؤول عن العمل بيلم ناس وخلاص ويلا نعمل عمل جماعي.
قد يعجبك أيضا: 10 مشاهد لن تنساها من دراما رمضان 2016 (فيديو)
أعمال جماعية أعجبتني
و«خير الله» بتقول إن من الأعمال الجماعية اللي عجبتها في رمضان 2016 مسلسل «أفراح القبة» عن رواية نجيب محفوظ، وبطولة إياد نصار، ومنى زكي، وجمال سليمان، وصبري فواز، وصابرين، ودينا الشربيني، ومحمد الشرنوبي، وصبا مبارك والموسيقى التصويرية لهشام نزيه أما الإخراج لمحمد ياسين.
ومسلسل «جراند أوتيل» بطولة عمرو يوسف، وأمينة خليل، وأحمد داوود، ومحمد ممدوح، ودينا الشربيني، وأنوشكا، ورجاء الجداوي، وشيرين، والكتابة لتامر حبيب والموسيقى التصويرية لأمين بو حافة، أما الإخراج لمحمد شاكر خضير ومساعد مخرج تاني شادي الكردي.
ومسلسل «ونوس» بطولة يحيى الفخراني، ونبيل الحلفاوي، وهالة صدقي، وحنان مطاوع، ومحمد شاهين، ونيقولا معوض، ونهى عابدين، وكتابة عبدالرحمن كمال، والموسيقى التصويرية لأمين بو حافة، أما الإخراج لشادي الفخراني.
قد يهمك أيضا: الأسطورة.. دراما الواقع وموضة العام
