النصائح دي هتمنع عنك مشاكل الجلد في الصيف.. باي باي التهابات

فترة الصيف صعبة على جلدك لأنه بيتعرض فيها لمشاكل كتير، وعشان تحمي نفسك من مشاكل الجلد في الصيف والمصيف جبنالك نصايح من رئيس المركز القومي للبحوث السابق والأستاذ بقسم الأمراض الجلدية بالمركز دكتور هاني الناظر.

البس قطن

البس دايمًا الملابس القطن البيضاء عشان بتمنع احتفاظ الجلد بالحرارة لأن الملابس الغامقة بتخلي الجسم يسخن ويعرق ويحتفظ بالحرارة والاحتفاظ بالحرارة ده هيخليه يحصله التهابات زي الحمونيل والفطريات. والفانلة القطن بتمتص العرق.

اشرب مية

كتر من شرب المية وأكل السلطة والفاكهة لأنها بتمد الجسم بالمعادن والفيتامينات اللي بتحافظ على الشعر وبتمنع إنه يتساقط ويتقصف.

اقرأ أيضًا: خلي بالك.. حاجات متستغناش عنها وأنت رايح المصيف

ابعد عن الشمس

حاول متتعرضش لأشعة الشمس ولا تقف تحتها في الفترة من 10 الصبح لحد 4 العصر لأن فيها أشعة فوق بنفسجية بتأثر على الجسم واحمي نفسك منها باستخدام شمسية، أو برنيطة، والبس حاجة بكم طويل عشان تحمي الجلد، كريمات واقية من الشمس.

استحمى بمية باردة

الرطوبة مع الحرارة بتصيب بالحمونيل وعشان تحمي نفسك منه استحمى بمية باردة بدون ليفة واستخدم صابون الجلسرين ومتستحماش بمية فاترة عشان بتسخن الجسم.

ادهني شعرك

عشان تحمي شعرك من كلور البسين ادهني شعرك بالزيوت النباتية الطبيعية زي زيت اللوز الحلو عشان بيعمل طبقة بتحمي الشعر.

استعمل بودرة للفطريات

استعمل دايمًا بودرة مضادة للفطريات بين صوابع القدم وثنايا الجسم يعني بين الفخذين وتحت الإبطين وده عشان تمنع أي فطريات تصيب جسمك. وده لأن الفطريات بتسبب مرض التينيا.

متكتريش من الميكب

متحوطيش ميكب كتير لأن الميكب بيكون فيه مواد كيماوية بتسيب بقع سمرا على الوش.