إلى كل موزمازيل.. الدلقة وحشة والتقل صنعة (مقال)

هي: عامل إيه؟

هو: تمام

بعد 10 دقايق

هي: هتيجي بكرة خروجة الدفعة؟

هو : لسة مش عارف

هي: طب حاول تيجي دي الدفعة كلها هتكون موجودة.

هو : حاضر :)

هي: إيه يابنتي إنتي فين؟

هو : ؟؟

هي: إيه ده أنا أسفة  الكلام جه غلط. عامل إيه؟ (هي قاصدة إن الكلام يجي غلط أصلًا)

بصي بقى لو كنتي أنتي «هي» اللي بتعمل حوار مع «هو» هنا، يبقى اقري الكلام اللي هقوله ده كويس قوي.

أنتي هنا بتعملي تبديل للأدوار بمعنى إن الراجل هو اللي المفروض يكون ملهوف على البنت وعايز يفتح معاها حوار لأنه بيحبها وعايز يتعرف عليها مش البنت هي اللي تكون مدلوقة عليه وعمالة تفتح معاه حوارات وهو بيرد على قد الجواب وخلاص لأنه مش حاسس ناحيتها بحاجة معينة.

هتقوليلي أنا بحبه جدًا وعايزة أوصله ده عشان يحس بيا. هقولك تمام أنا كبنت عارفة شعورك ده لكن هو كولد بيوصل ليه إنك مدلوقة عليه وهو في الغالب بيكون عارف على فكرة إنك حباه وحابة تتعرفي عليه لأننا احساسنا بيبان على طول.

للبنات فقط.. هتوقعيه في حبك إزاي؟

فأسهل طريقة ليه إنه يقفل معاكي في الكلام ويتكلم معاكي زي ما بيتكلم مع أي حد علاقته بيه سطحية. والشخص اللي زي ده بيكون كويس في فكرة إنه مش حاسس حاجة وعارف إنك حباه فبيقصر المسافات وبيعاملك بطريقة تخليكي تقفلي منه وتنسيه عشان متتعشميش بحاجة من ناحيته.

ده بخلاف الشخص اللي ممكن يضحك عليكي وميكونش حبك أصًلا بس حابب طريقة إهتمامك فيقولك تعالي نرتبط وفي الأخر يقولك بونسوار يا روحي معطلكيش.

كوني بكلمك في الموضوع ده بقى هو إني عايزة أقولك كرامتك وعزة نفسك فوق كل شيء بمعنى إنك طول ما إنتي متحكمة في مشاعرك وتقيلة هتكوني مصدر إعجاب من ناس كتير ومش هتقلبي الآية بمعنى إن الراجل هو المفروض يعترف للبنت بحبه ويلمح ليها عن مشاعره مش العكس.

لأن لو حصل العكس وإنتي اللي بينتيله ووصلتي لأنك تعترفي ليه بحبك ممكن يرفض اللي إنتي بتقوليه ده وساعتها كرامتك هتنجرح جدًا والموقف ده هيفضل سايب أثر سيء جواكي.

وفي النهاية بقى عايزة أقولك يا أميرة الأميرات يا ست الستات اتقلي تاخدي حاجة نضيفة :D متستعجليش إنك ترتبطي أو تستهلكي مشاعرك في حب حد هو مش حاسس بيكي عيشي حياتك وابني نفسك والحب سيبيه يجي وقت ما ربنا يريد :)

لطلاب سنة أولى «حب».. هكذا تكون «المقابلة العاطفية»

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا