لو مش لاقيه لبس يعجبك.. التفصيل سهل وأدي القماش وأدي الترزي

لو كارهة اللبس اللي في المحلات ونفسك تلبسي حاجة على ذوقك بس مش عارفة تعملي إيه، الحل بتاعك بقى هو إنك تفصلي لبسك لأن ده ليه فوايد بيقولها ليكي أحمد زين صاحب إحدى محلات الترزية.

فوايد تفصيل لبسك

لو المحلات كلها منزلة لبس مش عاجبك مش هتقعدي تستني لما ينزلوا كوليكشن جديد، لأ ده أنتي هتشوفي إيه الحاجات اللي كنتي عايزة تشتريها وهتفصليها عند أي ترزي بالشكل اللي تحبيه.

رحرحة في المقاس

أكيد ساعات كتير بتنزلي تشوفي لبس تلاقيه مش على مقاسك وطبعًا ده بيقلب مودك 180 درجة، لكن في حالة بقى إنك هتفصلي لبس فأنتي هتعملي المقاس اللي يريحك وبالشكل اللي في دماغك.

لبس الحجاب مش مشكلة

مشكلة إنك تلاقي لبس يناسب الحجاب في أي محل مش هيكون ليها وجود لما تيجي تفصلي لأن هتبقى جاتلك الفرصة إنك تعملي اللبس اللي حباه بأشكال مبهجة.

أفكار للتفصيل

صفحات ومواقع على الإنترنت، ومجلات الأزياء، وبرامج عروض أزياء، سؤال واحدة صاحبتك ذوقها حلو في اللبس، كل دي وسايل ممكن تطلعي منها بفكرة لبس تفصليه عشان متكونيش واقعة في حيرة تعملي إيه لما تروحي عند الترزي لأن الترزي بيكون عنده ناس كتيرة فبيكون عايز اللي رايح ليه محدد هو عايز إيه.

أماكن تشتري منها قماش

«زين» الترزي بيقولك إن المكان اللي هتقدري تلاقي فيه كذا محل قماش هو شارع الأزهر اللي في الحسين، وبينصحك إنك تخديه من أول تقاطع شارع بورسعيد لغاية جامع سيدنا الحسين وهتلاقي وإنتي ماشية فيهم محلات على الجنب اليمين والشمال موجودين وفيهم أشكال وألوان من القماش.

أسعار القماش

«زين» بيقولك إن أسعار متر القماش «القطن» بتبدأ من 50 جنيه، ومتر «البوليستر» بيبدأ من 25 إلي 30 جنيه ومتر «الدانتيل» بيبدأ من 50 لي 75 جنيه.

ولو هتفصلي «بنطلون» هيكون سعره في حدود 60 جنيه و«القميص» هيبقى 50 جنيه أما «الكارديجان» أو الجاكيت الطويل هيكون سعره مابين 75 و100 جنيه.

المكر في الشراء

بصي على كل محلات القماش ومتستعجليش في إنك تشتري حاجة ولو فيه قماش عجبك وكان غالي فاصلي مع الراجل.

و«زين» بيقولك خلي عندك حتة مكر بمعنى إنك تقوليلوا: «ده القماش ده شوفته في الحتة الفلانية بسعر رخيص وأنت مغلي علينا وإحنا حابين نبقى زباينك وأنا جاية على سيرة ناس راحولك قبل كده» وكدة يعني.