اهدي يا منار.. دليلك للتعامل مع حبيبتك العصبية
بتحبها جدًا ومتقدرش تستغنى عنها بس للأسف هي طبيعتها من النوع العصبي فمش عارف إزاي تتعامل معاها. في الموضوع ده هنقولك إزاي تتعامل معاها عشان الحب بينكوا يكمل لأخر العمر.
الحب
الدكتور النفسي جمال فرويز بيقولك لو بتحبها خدها بحلوها ومرها وساعدها إنها تتجاوز الإضطراب ده وحط في دماغك إن العصبية مبتتغيرش فعليك إنك تتكيف معاها وتحاول بحبك ليها تخليها تتجاوز حدة عصبيتها.
أنواع العصبية
وبيقسم «فرويز» العصبية لنوعين «عصبية مرضية»، و«عصبية نتيجة الاستثارة»، وبيشرح لينا النوعين دول عشان تخلي بالك وتعرف إزاي هتتعامل.
- العصبية المرضية
لو عصبيتها مرضية وبيكون نتيجته ردود أفعال مش كويسة، وهي حاسة إنها تعبانة من اللي بتعمله ده. ففي الحالة دي عصبيتها هتكون محتاجة إنك تاخدها وتخليها تتعالج علاج سلوكي عند أي دكتور نفسي.
- العصبية الناتجة عن الاستثارة
أما النوع ده من العصبية فهو نتيجة الاستثارة بموقف ما حصل وخلى رد فعلها عصبي لأن الفعل اللي حصل كان فعل مستفز ليها. وعليك إنك تقولها لازم يكون عندك ثبات انفعالي متخليش أي حاجة تستفزك.
وأنت كمان عليك دور في إنك تبعد عن استفزازها، أو إنك تحطها في مواقف عشان تختبر رد فعلها زي مثلًا إنك تختبر مدى حبها بإنك تكلم بنت فتشوف مدى غيرتها عليك وده طبعًا هيستفزها وهيخليها تتعصب.
- العصبية مرتبطة بالغيرة
استشاري العلاقات الأسرية أسماء مراد بتشوف إن العصبية 90% منها بتكون مرتبطة بالغيرة والشك وفي حالة إنها كانت غيرانة عليك وشكها قتلها فالمفروض إنك تتكلم معاها في الموضوع وأنت مركز عينيك في عينيها بكل ثقة. ومتتنرفزش عليها عشان متعصبهاش أكتر.
«العصبية» آخرها الندم.. تعلم كيفية التغلب عليها
خطأ التبرير
وكمان اوعي تقع في خطأ إنك تبرر ليها اللي حصل وتحلف إن ده محصلش وتجبلها شهود لأن التبرير ده هتعتبره هي إنك فعلًا غلطان وبتحاول تداري وتقول أي حاجة رغم إنك صادق في اللي بتقوله.
واللي مفروض تعمله إنك تقولها بكل هدوء وبحب لو أنتي مغلطاني فأنتي حرة أنا قولتلك اللي حصل وأكيد مش هكدب على حد بحبه، وأنت بكده هتخليها تحس إنها غلطانة وعصبيتها مش في محلها.
ومن ناحية تانية «مراد» بتقولك إنك تنصحها في العموم إنها تقلل من عصبيتها وتقولها إنك لو قللتي من عصبيتك هتثبتي ليا إنك بتحبيني لأن الحب الحقيقي هو اللي بيغير للأحسن.
الهرمونات دي هتخليك «صاحب السعادة»
مفاتيح مساعدة
وتضيف «مراد» إن في مفاتيح مساعدة ليك في إنك تخليها تحد من عصبيتها، وأولها إنك تخلي عندها حسن ظن بالناس وتبعد عنها فكرة سوء الظن لأن سوء ظنها باللي حواليها وشعورها إنهم بيكرهوها وبيقصدوا إنهم يضايقوها ده بيخليها في حالة استثارة عصبية.
ثقة بالنفس
تاني حاجة إنك دايمًا تديها ثقة بنفسها وتساندها في اللي بتعمله ولو أي حد استحقر حلمها أو قلل منه فهمها إن: في الحياة هتقابلي ناس سلبية وإيجابية بس لازم تكون عندك ثقة بنفسك وواثقة في اللي بتعمليه وأنا واقف جمبك، لأن عدم ثقتها بنفسها واحساسها إن الناس بتقلل منها وباصين ليها من فوق لتحت ده بيخليها يحصلها برضة حالة استثارة عصبية.
ازاي تتعاملي؟
زي ما قولنا لخطيبك إزاي يتعامل مع عصبيتك سواء كانت عصبية في العموم أو عصبية عليه. هنقولك بقى دلوقت إزاي أنتي تتخلصي من العصبية واللي التخلص منها لازم يجي بقرار من جواكي بمعنى إنك لازم تنوي تتخلصي من عصبيتك لأن العصبية هي أسوأ صفة في المرأة.
فحاولي تدربي نفسك على إنك مش عصبية واحدة واحدة، وتهدي مش أي حاجة تستفزك ولازم يكون عندك حسن ظن بالناس وثقة بالنفس ودي نصيحة استشاري العلاقات الأسرية أسماء مراد ليكي.
أما الدكتور النفسي جمال فرويز فبيقولك نقطة مهمة قوي وهي إنك لازم تكوني على دراية تامة بنقط ضعفك ومتخليش أي حد يستغل نقطة الضعف اللي فيكي لصالح حاجات احنا مش عارفينها زي إنو يستغل كرهك لحاجة فيعملها أو أي شيء تاني لأن ده هيكون سبب في إنك تتعصبي. فخلي عندك ثبات انفعالي قصاد أي حد يستغل أي نقط ضعف جواكي.
