مش عايز مراتك تشتغل.. اقرأ الأول وبعدين قرر
لو مبتدخلش دماغك فكرة عمل المرأة وإنه مهم بالنسبة ليها، في الموضوع ده بقى هنقولك على فوايد إنها تشتغل لأن ممكن في يوم من الأيام تخطب بنت بتشتغل وحابه إنها تكمل شغلها بعد الجواز.
تحقيق الذات
الدكتور النفسي محمد مزيد بيقولك إن الشغل بالنسبة للبنت هو تحقيق ذات في المقام الأول. هي عايزة تثبت نفسها وتحقق أحلامها وطموحتها ويكون ليها بصمة في المجتمع. وأكيد هي هتزرع ده في ولادها وتخليهم يعرفوا إزاي يحققوا ذاتهم ويكونوا ناس نافعين في المجتمع وبيأثروا فيه بالإيجاب مش بالسلب.
ثقة بالنفس
«مزيد» بيقول إن شغل المرأة بيديها ثقة بنفسها وبيخليها قادرة إنها تتخذ قرار وتتحمل المسؤولية وتكون أكثر نضوجا. وكل ده طبعًا بيزود وبيقوي خبرتها في الحياة. وهيخليها في المستقبل تعرف تشيل مسؤولية زوج وأطفال.
للولاد.. 7 أسباب هتخلي شريكة حياتك تتخلى عنك
المرونة
وهتكون مرنة وعارفة إزاي تتصرف لو اتحطت تحت أي ضغط لأن الشغل بيعلمها ده ومش هتبقى سلبية تجاهه أو تتواكل على حد إنه يتصرف بدلها. وهتكون قادرة إنها تحل أي مشكلة تواجهها. وفي المستقبل هتعرف إزاي تمشي البيت مهما كانت ظروفه المالية وهتعرف إزاي تحل المشاكل معاك عشان تعدوا أي أزمة.
تنظيم الوقت
وهتعرف إزاي تنظم وقتها لأن الشغل أكيد بيظبط المواعيد بحكم إنك لازم تصحى في وقت محدد وتنام في وقت محدد. وده طبعًا هيخليها في المستقبل عارفة ازاي تظبط نظام البيت اليومي.
متقولهاش بحبك.. الحاجات دي هتدوبها أكتر
مفيش فراغ
كمان مش هيكون عندها وقت فراغ لأنها ملياه بشغلها وبإهتمامتها وفي المستقبل هتملاه أكتر بجوزها وولادها وهتعرف إزاي توفق بين شغلها وبين بيتها. وده طبعًا جزء مهم في إنها لو عندها وقت فراغ لما تتجوز هتركز معاك في اتأخرت ليه، وأنت كنت فين وسايبني لوحدي، وممكن ده يسبب خلاف بينك وبينها بحكم إنها خنقاك.
صحيح في بنات شغل البيت بيملى وقت فراغها بس فيه بنات تانية شغل البيت بالنسبة ليها مش بيملى فراغها فبتكون عايزة تشتغل عشان تملى الفراغ ده.
الاستقلال المادي
هتكون مستقلة ماديًا ودي حاجة في المستقبل كويسة من ناحية أنها لو عايزة تجيب حاجة هتجيبها مش كل شوية هتقولك هات فلوس أجيب الحاجة الفلانية لأن ممكن أنت في الوقت ده تكون فلوسك على قد مصروف البيت ومش عايز تصرف كتير عشان ميزانية البيت متخرمش منك.
كل الفوايد دي بقى دكتور «مزيد» بيقولك إنها هتنعكس عليك في المستقبل بالإيجاب وهتخلي الأسرة بتاعتكوا ناجحة وهيكون فيه استقرار نفسي ما بينكوا وكل ده هيحقق ليكوا السعادة الزوجية J لأنها زي ما اهتمت انها تحقق ذاتها في شغلها هتهتم على الجانب التاني إنها تحقق كيانها كزوجة وأم.
