رغدة جلال الدين تكتب عن "كلام زمان": نهارك سعيد يا محترم

كل زمن بيكون ليه كلامه الخاص بيه وعشان كدة حابة اخودكوا معايا نلف في شوارع زمان ونسمع كانوا بيقول إيه ومتخفوش هعزمكوا على جيلاتي وهشربكوا حاجة سخنة في جروبي :D "صدقيني" أول كلمة جاي على بالي حالا أكتبها هى كلمة "صدقيني" وديه اللي كان بيقولها زكي رستم لفاتن حمامة في فيلم نهر الحب، أنا مسمعتهاش من حد تاني زي ما سمعتها من زكي رستم قد إيه كان بيخلص للحرف وهو بيقوله، تخيلوا بقى لو حد مكان زكي رستم دلوقتي هيقول بدلها كلمة أنا محل ثقة يا قطة "إنت راجل قليل الحيا" الجملة ديه كانت بتتقال لو راجل عاكس بنت زمان، طبعاً دلوقتي الجملة ديه متنفعش بالمرة لاننا مبقناش عندنا معاكسة.. دلوقتي الرجالة بيتحرشوا على طول ودول أصلاً معدومين الحياء. "نهارك سعيد يا محترم" واضح من الجملة إن حد بيصبح على حد بس تعالوا نقف عند كلمة يا محترم قد إيه عظيمة قد إيه بتبين إن الناس زمان كانوا بيحترموا بعض.. تعالو بينا بقى لدلوقت تلاقي واحد بيقول نهاركوا زي الزفت، يا صباح الزفت، صباحك زي وشك، طب ليه يا حج أنا عملتلك إيه ؟ معملتليش بس هو كدة إذا كان عجبك . 150 قرش "عقبال املتك كده.. انا قابض بتاع 150 قرش الشهر ده".. ده طبعاً كان مبلغ وقتها، و أنا من موقعي هذا أحب أقول للي قال الجملة ديه إن فيه ناس مش بتقبض بالشهور يا عمو دلوقت :D في جمل بقى زي " انا مبسوط على اخر ما ينبغي " و"أما حته فصل في منتهى السقوعيه " و"انا اسمي انضف من النزاهه " ، بتحس فيها إنهم بيدوا لكل إحساس عندهم حقه وبيعرفوا يعبروا عن حالهم كويس جدأً سواء سعادة أو إحراج أو دفاع عن نفسهم . كلمة ومعنى فيه بقى حبة كلمات كدة هقولكوا معناها زي "أنا إنسريت" ودي يعني أنا إتبسطت، و"بلوشي" يعني "ببلاش".. وفيه كمان "أنا صحتي بطالة" وده المقصود منها "صحتي تعبانة" . يلا هسيبكوا بقي لأحسن نينة تقلق عليا، العوافي 