عايز تحول من كلية لكلية؟.. الموضوع سهل وبسيط

نتيجة تنسيقك ظهرت وبعد ما عرفت الكلية اللي جاتلك خلاص، غيرت رأيك وعايز تحول من كلية لكلية تانية مختلفة؟ أو جتلك كلية في محافظة بعيدة عنك وعايز تحول لكلية نفس التخصص قريبة منك بس مش عارف إزاي.

في التقرير ده «شبابيك» هيعرفك إزاي تحول بين الكليات - الجامعات، وإيه الشروط المطلوبة.

هتحول لكلية مختلفة

لو أنت عايز تحول من كلية مختلفة، يعني لو جتلك تجارة القاهرة وعايز تحول آداب القاهرة مثلا، أو انت من القاهرة وجتلك تجارة الزقازيق، وعايز تحول آداب القاهرة، الخطوات سهلة وبسيطة:

أولا.. بتقدم طلب في مكتب التنسيق إنك عايز تحول من كلية لكلية (داخل نفس الجامعة، أو جامعة تانية) بشرط إنك تكون جايب الدرجة المطلوبة للكلية اللي عايز تحول ليها ولو ليها شروط زي اختبار القدرات تعديها لو لسه هتتتعمل.. ولو كانت اتعملت فعلا، تكون عملتها وعديتها.

هتحول لكلية مشابهة

أما بقا لو عايز تحول لنفس كليتك بس من جامعة لجامعة، يعني لو جاتلك هندسة طنطا، وعايز تحول هندسة القاهرة، دي ليها شروط محددة لأن كل كلية ليها نسبة  10% بس من الأماكن المتاحة، وحسب قدرتها على استيعاب الأعداد وترتيبك بين اللي قدموا طلب التحويل.

هتحول إزاي؟

على الطلاب الراغبين في التحويل من كلية إلى كلية أخرى أو تحويل الكليات من محافظة لمحافظة أخرى لنفس الكلية اتباع الخطوات التالية:

• الدخول على موقع التنسيق الإلكتروني والتسجيل فيه.  

• إدخال رقم الجلوس والرقم السري الخاص بالطالب.

•  تعديل رغبات الكليات التي تم ترشيحها سواء في المرحلة الأولى أو الثانية، وفق الشروط والقواعد التي حددها المجلس الأعلى للجامعات.

لو هتحول لكلية فيها نظام الانتساب

لو هتحول لكلية بتطبق  نظامي (الانتظام، والانتساب الموجّه)، فبيراعى الحد الأدنى للقبول في النظامين عند التحويل بين الكليات.

يعني.. لو أنت في كلية تجارة الزقازيق (انتظام) وعايز تحول لكلية مناظرة لتقليل الاغتراب (تجارة القاهرة مثلا)، فالتحويل في الحالة دي على حسب المجموع إللي أنت جبته في الثانوية العامة، يعني عشان تدخل انتظام لازم تكون درجتك أعلى أو نفس درجة تجارة القاهرة انتظام.

أما بقا لو مجموع درجاتك أقل من الحد الأدني لدرجات الانتظام فبتحول من كلية تجارة الزقازيق (انتظام)، لتجارة القاهرة ولكن (انتساب).

عايز تحول لكلية تخطيط عمراني

كلية التخطيط العمراني بجامعة القاهرة كلية فريدة، ملهاش كليات مناظرة وعشان تحول ليها لازم تكون جايب مجموعها.

أما بقا لو أنت طالب في كلية مرت عليك سنة وعايز تحول لكلية تانية السنة الي بعديها:

1-    لازم تكون الكلية حسب نطاقك الجغرافي وأولوية القبول للطلاب الأعلى في المجموع بنسبة 10%.. يعني تكون هتحول لكلية قريبة من مكان سكنك مش أبعد.

2-    لو عايز تحول لكلية بس فرقة أعلى، لازم تكون ناجح ومنقول لفرقة أعلى في الكلية لي انتي فيها وتكون مستوفي شرط الإقامة والنطاق الجغرافي.. يعني لو أنت في أولى هندسة الزقازيق وناجح هيكون من حقك تنقل لهندسة القاهرة للفرقة التانية مش هتبدأ من الأول.. أما بقى لو ساقط فمش هتعرف تحول.

3-    لو هتحول من كلية لكلية في جامعة عين شمس بيبقى حسب كل كلية والتقديرات الأعلى هي اللي بتتقبل.. يعني لو أنت في تجارة عين شمس، وعايز تحول لحقوق عين شمس، فخد بالك إن أصحاب التقديرات الأعلى همه اللي ليهم الأولوية.

4-    مش هينفع تحول من كلية في جامعه القاهرة لكلية في حلوان ما عدا الحالات الاستثائية عشان الاتنين يعتبروا داخل نطاق محافظة القاهرة الكبرى.

5-    لو هتحول بكليات العلاج الطبيعي والتمريض والزراعة والعلوم لا يقل التقدير العام عن جيد جدا، وبتقدير جيد بالنسبة للكليات الأخرى، وتتم التحويلات في إطار النسبة التي يحددها مجلس كل كلية، وتكون الأفضلية في التحويل للطلاب الحاصلين على المجاميع الأعلى.

6-    أما كلية الإعلام والإقتصاد والعلوم السياسية ودار العلوم لا تقبل التحويلات بها.