لو عايز تجيب مجموع عالي في الثانوية.. 6 أخطاء يجب تجنبها

المرحلة الثانوية تتطلب بذل جهد للحصول على مجموع يؤهلك للالتحاق بالكلية التي ترغب فيها، إلا أن هناك أخطاء يمكن أن تحول بينك وبين تحقيق التفوق. يوضح لك «شبابيك» في هذا التقرير هذه الأخطاء التي ينصحك طلاب الجامعة بتجنبها، بعد أن ندموا على فعلها، لأنها حالت بينهم وبين الحصول على «مجموع عالي».

المواد السهلة

يمكن أن تبذل مجهود كبير في المذاكرة منذ بداية العام إلا أنك لا توزع هذا المجهود على جميع المواد، بحيث تهتم بمواد معينة وتتجاهل أخرى، لتُفاجئ بعد ذلك أن العام أوشك على الانتهاء إلا أنك لم تتمكن من الإلمام بهذه المواد السهلة، أو تكتشف وجود موضوعات بها تحتاج لوقت وجهد لفهمها وحفظها.

وبعدما وقعت إسراء رزق، في هذا الخطأ، تنصح طلاب الثانوية بتجنبه: «حاول على أقد ما تقدر إنك تذاكر من بداية السنة، ومتستهترش بالمواد السهلة، وتقول مش هتاخد مني حاجة، المفروض تدي كل مادة حقها.» وتضيف: «ظبط لنفسك جدول من الأول كده، وحاول تمشي عليه، ولو عايز تعديل عدله».

يومك بيضيع بسرعة؟.. هكذا تستغل وقت المذاكرة بشكل أفضل

المحبطين

الأصدقاء لهم دور كبير في تشجيعك على المذاكرة من عدمه، وإذا شعرت أنهم يبثون فيك طاقة سلبية، ويشدوك للخلف كلما أردت أن تأخذ خطوة للأمام، فيجب أن تبتعد عنهم فورا، فلا تضحي بمستقبلك من أجلهم.

وتؤكد «إسراء» ذلك بقولها: «ممكن صحابك يحاولوا يشغلوك بحاجة غير المذاكرة، لكن حاول إنت في السنة دي تخلي علاقتك بيهم في حدود، لأنهم بيطلعوا الطاقة السلبية اللي جواهم فيك، وهيحسسوك إن المواد صعبة وتقيلة».

نصائح «هترجعك لمود المذاكرة» بعد الإجازة؟

عدم وضع أهداف محددة

يقول محمد طه، طالب جامعي، إن الخطأ الذي يقع فيه كثير من الطلاب في الثانوية هو بذل جهد كبير في المذاكرة دون معرفة الهدف من ذلك.

ويضيف «مينفعش يكون هدفك إنك تجيب مجموع كبير بس، المفروض تكون محدد إنت عايز تدخل أيه وليه، ومتستناش لحد ما تمتحن والنتيجة تظهر وبعدين تفكر في الكلية اللي عايز تدخلها، المفروض إنك تحط في دماغك هدف وبعدين تذاكر وتجتهد على أساسه، مش العكس».

ركز شوية.. 5 نصائح لاختيار مكان مناسب للمذاكرة

الاعتماد على الدروس بشكل أساسي

يلجأ كثير من طلاب الثانوية إلى أخذ دروس خصوصية في جميع المواد، بل وأخذ أكثر من درس في نفس المادة، ما يؤدي إلى إهدار وقت كان من الممكن الاستفادة منه.

ويؤكد «مصطفى فراج، طالب جامعي، ذلك قائلا «طبعا كنت باخد دروس في كل المواد، وفيه مواد كنت باخد فيها أكتر من درس، زي الرياضة، لكن ده جاب نتيجة عكسية، لأني اتلخبطت أكتر ما فهمت، لأن كل مدرس كان ليه شرح وطريقة حل مختلفة.»

ويستكمل حديثه: «عشان كده الأفضل إنك تاخد مع مدرس واحد بس، خصوصا في المواد العلمية، وده هيوفرك وقت تقدر تذاكر المادة فيه واتابع مع المدرس.»

نصائح هتزود تركيزك في «الدروس الخصوصية

المبالغة في الخوف

لا تبالغ في خوفك من الثانوية أو من بعض المواد الدراسية، فيمكن أن تبذل جهد كبير في المذاكرة إلا أنك لم تتمكن من الحصول على المجموع الذي ترغب فيه، لأن شدة الخوف من امتحان مادة ما، أو من المرحلة الثانوية بشكل عام، يؤدي إلى خسارة الكثير من الدرجات.

بهذا الدليل.. «متخليش حاجه تطلعك بره مود المذاكرة»

تقول حفصة منصور، طالبة جامعية «عايز تتفوق ابعد عن التوتر تماما، متاخدش كل حاجة على أعصابك لأن نص السنة ضاع مني في المستشفيات، كنت ببان من برا باردة لكن الضغط كله كان داخلي».

وتحكي مي كريم، تجربتها في امتحان مادة الفيزياء: «أنا كنت تعبت في مذاكرة الفيزيا أكتر من أي مادة، ومع ذلك حليت وحش جدا في الامتحان، لأني كنت رايحة وأنا منهارة عياط وخايفة جدا، وده خلاني أجيب فيها درجة وحشة، أثرت على مجموعي كله».

في ثانوية عامة وبتكره المذاكرة.. والحل؟

الكبت

تحذر «نورهان الشريف، طالبة جامعية، من بذل مجهود كبير في المذاكرة في بداية العام لأن ذلك يُحدث نتيجة عكسية في النهاية: «غلطتي لما بدأت أول السنة جد أوي وضاغطة نفسي وأنا عارفة إني مش هتحمل، وفعلا قبل الامتحان بشهر مكنتش مستجيبة لأي حاجة نهائي لا دروس ولا مذاكرة ولا أي حاجة أبدا، عشان كده بلاش الكبت».