محافظة الدقهلية مليانة بمجموعة كبيرة من الأماكن الفنية اللي فيها حفلات وعروض ياما، ولو أنت فيها هات ايدك بقى كده وتعالى أعرفك على الأماكن اللي هتعيش معاها أحلى الأوقات.

بداية كده هنروح مع بعض مسرح قصر الثقافة في المنصورة وده بقى هتلاقيه بيقدم عروض وأنشطة فنية مختلفة وعنوانه ميتوهش هتركب أي ميكروباص وتقول للسواق: «نزلني عند القصر يا اسطى» وهتلاقي نفسك قدامه.

مش عايز تروح القصر؟ طيب انزل بقى من الميكروباص وروح مسرح نقابة الأطباء في طلخا اللي هتلاقيه برضه بيقدم عروض هتتبسط وياها، وفي طلخا كمان فيه مسرح مصنع السماد.

زهقت ولا أكمل؟ شكلك كده متشوق وعايزني أكمل، بص يا سيدي فيه كمان مسرح سانتا فاميه، وهو مسرح فرنسي موجود في شارع المختلط بمدينة المنصورة.

وفيه مسرح برضه اسمه المجاهد حسن طوبار، وده بقى موجود في مركز ومدينة منية النصر. ده غير كمان أن فيه مسرح اسمه بيت ثقافة السنبلاوين موجود في مركز السنبلاوين. صحيح نسيت أقولك أن فيه كمان مسرح في جامعة المنصورة بيقدم عروض من وقت للتاني.

أيه رايح فين؟ لسة في أماكن تانية جميلة، زي السيرك الايطالي اللي موجود تحت كوبري جامعة المنصورة واللي بيقدم يوميًا عروض متنوعة.

ومقدرش مقولكش برضه على الكافيهات اللي بتجيب فرق غنائية تقدم أجمل الأغاني جواها زي كافيه «المريديان»، اللي موجود قدام محكمة المنصورة الابتدائية، وكافيه «لادولشي فيتا» وهتلاقيه موجود قدام حي شرق المنصورة.

ممكن يجي في بالك دلوقت سؤال وهو: هي المحافظة مفيهاش سينما خالص؟ لأ ياسيدي فيها عندك سينما جود نيوز في كورنيش المشاية، وسينما نانسي في شارع مجمع المحاكم بالمنصورة.




0
0
0
0
0
0
0