للولاد.. 5 مقترحات تغنيك عن «الدهب» في الجواز

من واحنا صغيرين كنا بنسمع دائمًا من أهلنا إن الشبكة في الجواز أهم من الجواز نفسه، يعني مش مشكلة أبدًا إنك تقعد تحب بنت 10 سنين، ولا مشكلة إنك تحس إن حياتك كلها وقفة على شوية فلوس، المهم الناس متقولش إنك اتجوزت من غير «دهب».

طبعًا المشكلة دي موجودة من زمان، بس مع ارتفاع سعر جرام الذهب، بقى مستحيل الشباب يفكر في الخطوة دي، طيب إيه الحل؟ أكيد الحل مش في العزوبية، وعلشان كده «شبابيك» قرر إنه يقدملك مجموعة مقترحات ممكن تفيدك كـ«بديل الذهب».

فضة أو ألماس

من أكتر الحلول العملية اللي ممكن تلجأ ليها إنك تستبدل الذهب بالألماس، خصوصًا وإن سعره بيبدأ من 2000 جنيه للخاتم، يعني ببساطة لو مش معاك غير 8 آلاف جنيه ومش عارف تعمل إيه، تقدر تشتري خاتم بالفلوس اللي معاك، وفي الوقت ده هتلاقي كل الناس منبهرة بالشبكة اللي إنت جايبها.

ده غير إنهم هيفتكروا إن الشبكة اللي بـ 8000 آلاف جنيه، سعرها مش أقل من 20 ألف جنيه لإن تقدير سعر الفص بيبقى محتاج خبير محترف، وبالتالي محدش هيعرف الثمن الحقيقي.

أما بقى لو حابب تبقى شبكتك فضة، ليه متفكرش في الفضة الإيطالي أو السويسري؟ وطالما أهلها موافقين ممكن تقولوا لأي حد إنها ذهب أبيض.

حساب في البنك

ولو لقيت أهلها مصممين على موضوع الشبكة اللي سعرها على الأقل 15 ألف جنيه، ممكن تقترح عليهم إنك تفتح لبنتهم حساب في البنك وتحط فيه الـ10 آلاف اللي معاك، وبعد فترة من فتح الحساب تقدر تضيف الـ5 اللي فاضلين.

وبكده حقها هيكون مضمون بالعكس ده هيبقى فيه أرباح في البنك زيه زي الذهب اللي سعره بيغلى كل يوم، وعلى الأقل لما هي هتحب تتصرف في الفلوس هتقدر تعمل ده بعكس اللي بيحصل في الوقت الحالي من محلات الذهب اللي بيرفض عدد كبير منها الشراء طالما في ركود في عملية البيع.

الشبكة × المؤخر

الاقتراح ده بديل كويس ليكو إنتوا الاتنين، يعني لما تطلب من أهلها إنك تحط ثمن الشبكة اللي معاك على المؤخر اللي هتتفقوا عليه، في الوقت ده لا هتكون هي مظلومة ولا أنت هتبقى مضطر تزود سعر الشبكة علشان تقدر تجيب حاجة محترمة.

ولو قلقان من كلام الناس، ممكن تجيبوا الفضة الإيطالي أو حتى الذهب الصيني اللي محد بيفرقه خالص عن الشبكة الحقيقة.

الأحجار الكريمة

البديل ده من أجمل البدائل خصوصًا لو خطيبتك بتحب الألوان، ده غير إن اللي هيشوفها لابساه ومش عارف في الأحجار هيحس إنه غالي جدًا مع إن سعره بيبدأ من 50 جنيه وده بالنسبة لنوع الفيروز.

ولو حابب يكون Opal فده سعره زي الألماس يعني ممكن تستخدمه كبديل للألماس لو حابين حاجة فيها ألوان.

دخل فلوسه في العفش

بدل ما تصرف الفلوس في الشبكة، ممكن تطلب إنك تشيل حاجة أساسية عندها في الجهاز زي مثلًا زي الغسالة والثلاجة وده طبعًا بيكون حسب الفلوس اللي معاك، بس اعمل حسابك يكون مثلًا في 500 جنيه فاضلة.

بالفلوس دي تقدر تروح أنت وهي تشتروا (ذهب صيني، فضة إيطالي…) علشان شكلكم قدام الناس طالما مهتمين بالشكليات.