عشان ميضّحكش عليك.. اعرف اللي ليك وعليك في الجواز

الجواز في مضمونة واحد، لكن في طريقته بيختلف من بلد لبلد ومحافظة لمحافظة، ويمكن من قرية لقرية تاني، وممكن النصيب يأخدك للارتباط من مكان وبلد غير اللي أنت عايش فيها. وعشان كده لازم قبل أي خطوة تعرف عادات وتقاليد البلاد المختلفة في الجواز.

ايه اللي على العريس والعروسة محافظات القاهرة الكبرى والأسكندرية

• الاتفاق على التزامات العريس والعروسة

كل حاجة بين أهل العريس والعروسة بتبقى بالاتفاق، والمفروض أنها مقسمة عليهم، البعض بيقسم حاجة الشقة بالنص، وفيه ناس تانية بتراعي أن العريس جايب شقة ومشطبها، وبيأخد بعض الحاجات الخفيفة، مثلا زي الستاير أو السجاد.

لكن السائد أنه بيجيب «الخشب» اللي هو أوضة النوم والسفرة والأنتريه، وبتتحمل العروسة كل الأجهزة الكهربائية وباقي الفرش. وأي حاجة غير دول بتبقى على حسب الاتفاق بين الطرفين.

• القايمة يتكتب فيها ايه

المقصود بيها إثبات كل حاجة، من دهب الشبكة والجهاز، وأي شيء يدخل الشقة ويعتبر ملك للزوجين. وده عشان يكون ضمان لحقوق كل واحد فيهم في حالة الانفصال، لا قدر الله.

فيه ناس بتصر على أنها يتكتب في القايمة الحاجة اللي جابتها العروسة مع الدهب. وفي أماكن تانية زي الصعيد بيحطوا مبالغ تقديرية في القايمة ملهاش علاقة بالواقع، المهم أنهم اتفقوا عليه.

الأفضل واللي المفروض يتعمل بيه، وهو أن كل حاجة دخلت الشقة تتكتب بالتفصيل؛ سواء اللي جابها العريس أو العروسة، وتتعمل قايمة واحدة بتضم كل ده مع تحديد كل واحد جاب إيه بالظبط. كده أضمن وبتغني كتير عن الدخول في مشاكل وجدالات ونقاشات بخصوص القايمة.

• العفش والأجهزة الكهربائية والمطبخ والخشب

الراجل في الاتفاق على العفش، بيبقى معروف لأنه هيتحمل كل شغل الخشب في الشقة، مع بعض الاختلافات البسيطة؛ زي المطبخ والأنتريه، وبيكون مخيّر أنه يجيب واحد منهم، وفيه ناس بتجيب الاتنين. والستاير بتبقى على حسب الاتفاق، ولكن الغالب بتتحملها العروسة.

أما العروسة بيبقى عليها الأجهزة الكهربائية وأدوات المطبخ والسجاد، والموضوع بيتم بين الاتنين على حساب تراضيهم مع بعض.

واجبات العريس والعروسة في الصعيد

في الصعيد الموضوع بيختلف تماما، لأن العريس تقريبا بيتحمل كل حاجة، وبتزيد كمان عن المعقول، عشان العيلة وبنت عمي وبنت خالي وابن العيلة التانية، جايب بكام وكده.

• القايمة بيتكتب فيها ايه

الغالب هناك أن مفيش قايمة بيسجل فيها الحاجة اللي في البيت أو اللي جابوها. الموضوع بيبقى تقديري بين أطراف العيلتين، يعني ممكن يقولك هنكتب قايمة 100 ألف، رغم أن كل الحاجات اللي جات متساويش غير 80 ألف بس. هو ده الوضع المتفق وأبو العروسة بيبقى هو وشطارته في الموضوع ده.

• قيمة الذهب

ده الحاجة الأساسية اللي بتسبب المشكلة هناك في الجواز، بعض الناس بتحدد قيمة الدهب نقدي، ودلوقتي هتلاقي المتوسط من 25 وبيوصل لحد 70 ألف جنيه. والبعض التاني بيحدد عدد جرامات الدهب، ويتفقوا عليها وزي ما تطلع قيمتها المادية. يعني أنت رايح تخطب يبقى تجيب 100 جرام دهب، مالهمش علاقة دول بكام، المهم أن بنتهم تلبسهم.

• العفش

هناك الشقة كالعادة في مصر كلها على العريس، وبيتكفل بالخشب كله وده الطبيعي. لكن في غالب الصعيد بيتعامل الراجل على أنه صاحب ومالك كل حاجة، وبيتحمل الأجهزة الكهربائية. الغريب أنه مش هو اللي بيجيبها، لأ بيدي تمنها لأهل العروسة عشان يشتروها.

التزامات العريس والعروسة في الشرقية والقناة

الدهب بمتوسط من 15 إلى 20 ألف جنيه، وعلى حسب مقدرتك والعيلة اللي أنت هتتجوز منها. تقريبًا نفس الحاجات اللي بتخص القاهرة الكبرى والأسكندرية، مع اختلاف إنهم بيزودوا بعض الحاجات في الاتفاق.

يعني السجاد والستاير والنجف بتتقسم بين الاتنين. ده غير أن العروسة لازم تجيب 3 غسالات وتلاجة وديب فريزر، وبتتكفل بهدايا لأهل العريس، بتكون غالبًا ملابس للبيت.

وفي الآخر كل مكان وله عاداته وتقاليده، والحاجات دي مش قوانين ملزمة ليك، قبل ما تروح أي مكان تخطب منه اسأل الأول، عشان متلبسش يا عريس.