لو بتفكري في الحمل.. النصايح دي «حلقة في ودنك»
الحمل عبارة عن رحلة بتاخد منك 9 شهور، والرحلة دي عشان تعدي بسلام وفرحة لازم تاخدي بالك قوي. وفي الموضوع جبنالك نصائح من أستاذ واستشاري النساء والتوليد بكلية طب القصر العيني الدكتور عمرو حسن، عشان تحطيها «حلقة في ودنك».
لو كنتي مريضة مرض مزمن ضروري جدًا ولازم قبل ما تفكري تبقي حامل تسألي الدكتور وتقوليله على مرضك وتعرفي هل مناسب أنك تحملي في الوقت ده ولا لأ .
ولازم تكوني جاهزة للحمل بمعنى أنك لو وزنك زايد لازم تنقصيه بحيث حملك يكون سهل وميكونش فيه مشاكل.
اختبار الحمل هو الحل الوحيد اللي بتعرفي منه إذا كنتي حامل ولا لأ مش أنك تقولي إن مادام الدورة اتأخرت يبقى أنت حامل.
متخديش أي دواء غير لما ترجعي للدكتور بتاعك.
ضروري ولازم تعرفي أول يوم في أخر دورة امتى عشان اليوم ده اللي على أساسه هيتم تحديد ميعاد الولادة.
الزيارة الأولانية للدكتور بتاعك مهمة جدًا ولازم تلتزمي بعمل التحاليل اللي هيقولها ليكي زي تحاليل الدم، ،والبول، ووظايف الكبد والغدة الدرقية والـRH.
أي أعراض هتجيلك أثناء الحمل متقلقيش وتابعي مع الدكتور بتاعك أول بأول.
في حملك هتسمعي خرافات كتيرة من الناس أشهر خرافتين منهم «أنتي بتاكلي لإتنين» و«شعر البيبي بيعمل حموضة» وطبعًا لازم متسمعيش للخرافات ديه خالص لأن لو سمعتي خرافة «انتي بتاكلي لإتنين» وزنك هيزيد وهيجيلك مشاكل وأمراض ممكن تخليكي تولدي قيصري ولو سمعتي الخرافة التانية «شعر البيبي بيعمل حموضة» هتبقى غلط جدًا لأن شعورك بالحموضة ده نتيجة لأكلك الغلط فإنتي عليكي أنك تزودي الوجبات وتقللي كمية الأكل عشان متحسيش بحموضة.
ابعدي خالص عن الأكل اللي فيه ملح كتير لأنه هيزود ضغطك وهيورم جسمك وبرده ابعدي عن الأكل المسكر لأنه هيزود وزنك وهيجبلك مرض السكر. فالأصح أنه دايمًا تخلي أكلك دلع.
مارسي حياتك بطبيعية، وضبي البيت، واخرجي سوقي عربيتك والعبي رياضة ويستحب المشي واليوجا، لكن لو بتعاني من أي مرض وعندك مشاكل في ضهرك أو حصلك اجهاض قبل كدة لازم تستشيري الدكتور بتاعك قبل ما تمارسي أي حاجة في حياتك.
متلبسيش جزمة كعب عالي وجيبي لبس يكون واسع.
ركزي على منتجات الألبان وابعدي عن المشروبات الغازية لأنها بتوقف امتصاص الكالسيوم.
اخترنا لك:
