7 نصائح للتعامل مع الشخص «العصبي»

«هو عصبي بس طيب».. الجملة دي تقريبًا بنسمعها كتير من ناس حوالينا عن شخصيات بنفتكر إن هما من أسوأ الناس اللي ممكن نتعامل معاهم في حياتنا كلها، بس الواقع بيقولنا بعد كده إن الشخصيات دي مستحيل تقابل حد في حنيتها.

كل الحكاية إنك محتاج تعرف الطريقة الصح اللي لازم تتعامل بيها معاه وخصوصًا لو كان حد قريب منك، علشان كده «شبابيك» بيقدملك 7 نصائح لو نفذتها هتعرف تتعامل بيها صح مع الشخص العصبي.

ابعد عن كلمة «اهدأ»

الكلمة دي بتحسس الشخص العصبي إنه في حالة مش طبيعية في الوقت اللي بيبقى شايف نفسه هاديء وإن كلمتك دي هي اللي عصبته وزودت من غضبه أكتر من الموقف اللي بيتكلم عليه في الأساس.

علشان كده بالرغم من حسن النية الظاهر في معنى الكلمة إلا أن التعاملات البشرية أكدت إنها بتزود عصبيته أكتر ومش بيهدأ في النهاية.

بلاش تنفعل مع انفعالاته

مينفعش تكون مضايق من انفعاله وأنت نفسك بتنفعل معاه، أنت كده هتتعب معاه ومع نفسك، حاول لما تحس إنه متعصب أو هيتعصب إنك تكون هادي مش بارد لإن ده هيزود عصبيته أكتر.

لما يلاقيك هادي هيحاول تلقائيًا يسيطر تاني على أعصابه، بس لو قررت أنت كمان ترد بعصبيه مش هتوصلوا لنتيجة غير الخناق وممكن في لحظة عصبية تافهة تخسروا صداقة أو علاقة دامت سنين.

متعملش اللي بيعصبه

لما تعرف إن الشخص اللي قدامك بيضايق مثلًا من الإحراج، مينفعش تيجي قدام حد سواء غريب أو قريب وتحرجه وتزعل بعد كده لما يعاملك بعصبية.

بمعنى تاني ابعد عنه أي مؤثرات بتخليه عصبي، وشوف بعد كده إذا كانت العادة دي هتقل ولا لأ. مدربة التنمية البشرية «هانية سنجاب» قالت خلال استضافتها على قناة «سما» الفضائية إن العصبية عادة يقدر أي إنسان يتخلص منها بالتدريج.

اختر الوقت المناسب للكلام

مش كل الأوقات مسموح فيها بالكلام، متجيش في الوقت اللي الشخص ده راجع من الشغل ومش قادر يتكلم أو متخانق مثلًا وتصمم تتكلم معاه.

متستناش منه هنا إنه يكون مركز معاك ومهتم بكلامك أو حتى ميسفهش من موضوعك ويتعصب عليك، علشان كده عامل الوقت مهم جدًا.

متحاولش توقف عصبيته

لو حاولت توقف عصبيته هتستخدم كلام هيعصبه أكتر زي «اهدأ»، أو «أنت متعصب دلوقتي»، علشان كده لما تلاقيه هيبدأ يتعصب سيبه يقول كل اللي جواه مهما قال كلام ضايقك.

لما يهدأ شوف وقت مناسب للعتاب وقول فيه كل اللي ضايقك بمنتهى الهدوء، في الوقت ده لو ليك مكانة عنده عمره ما هسيبك زعلان أو ممكن تلاقيه بيعتذر لوحده على الإسلوب على اللي اتعامل بيه معاك.

متاخدش قرار عشان ترضيه

للأسف لو عودته إن عصبيته بتخليك تأخد أي قرار يرضيه لمجرد إنه يهدأ، هتدخل نفسك في دوامة إنت مش قدها.

لإن بعد كده هتلاقيه دائمًا بيستخدم العصبية مع أي قرار عاوزك توافق عليه وبالتالي مش هتعرف تسيطر على غلطة أنت اللي بداتها في الأساس.

خليك متعاطف معاه

زي ما في كلام بيعصبه في كلام تاني بيهدي أعصابه زي «أنا فاهمك»، و«حاسس بيك».. الكلام ده حتى لو غلطان هيهدي منه وهتلاقيه ممكن يقولك تعرف أنا بردوا كنت غلطان في كذا، لكن لو فضلت تقول أنت غلط هيقاوح وهيتعصب أكتر.

ولو فعلًا كان غلط فميش مشكلة إنك تقول «أنا فاهمك» بس لو كنت اتصرفت بشكل كذا كان هيقى أفضل ليك، لام تعرف إن خناقك معاه مش هيوصلك لنتيجة إيجابية.​​​​​​​