ع الصبح.. 10  دقايق هتغير يومك

الروتين الصباحي اليومي بيعمل فرق كبير في يومك وحياتك عامة، ومعظم الأشخاص الناجحين عندهم مجموعة عادات صباحية مفيدة.. ليه متجربش عادة من العادات دي؟

العادات صعبة في البداية لكن بالاستمرار والمداومة هتتعود عليها لحد ما تعملها تلقائيًا.

ممكن تفتكر أن مفيش وقت الصبح عشان تعمل أي حاجة، لكن دي قايمة مش هتاخد أكتر من 10 دقايق، ممكن تختار منها حاجة أو حاجتين تعملهم.

الدقيقة 1: معقلة عسل

لو معندكش وقت تحضر فطار صحي، ممكن تاخد معلقة أو معلقتين عسل. العسل ليه فوايد كتير وهينشط جسمك ويفوقك طول اليوم دا غير إنه محفز للكبد وبيساعد الجسم على التخلص من السموم.

ممكن تاكل معلقة العسل لوحدها، وممكن تدوب معلقة العسل في كوباية ميه دافية وتشربها.

الدقيقة 2: اغسل سنانك

غسل الأسنان مهم لسببين، الأول أنك ممكن تتشغل طول اليوم وما تفكرش تغسل سنانك ودا مضر جدا، التاني أن دا هيخليك fresh ومنتعش طول اليوم.

الدقيقة 3 و4: هدوء لمدة دقيقتين

اقعد لمدة دقيقتين في هدوء تام، كأنك هتريح شويا بعد ما صحيت وخدت معلقة العسل وغسلت سنانك، اتنفس بعمق وأنت قاعد وحاول متفكرش في أي حاجة.

لو قدرت تزود مدة الهدوء والاسترخاء يبقى أفضل، لأن الاسترخاء مهم في اليوم اللي دايما مشحون ودايما مليان شغل أو مذاكرة.

الدقيقة 5: اتكلم مع نفسك

ممكن تستخدم مراية أو كاميرا الموبيل selfie في أنك تتكلم مع نفسك وتشجعها وتوجهلها كلام إيجابي.

فكر نفسك بأهدافك أو بإنجازاتك أو بالغلطات الي مش هتكررها والحاجات الي اتعلمتها في اليوم الي قبله.

الدقيقة 6 و7: اتحرك

قبل ما تنزل المدرسة أو الشغل، خصوصا لو شغلك بيخليك دايما في مكان واحد وقليل ما بتتحرك، اعمل تمارين بسيطة جدا بحيث يكون هدفها أنك تحرك أطرافك وضهرك ورقبتك.

الدقيقة 8: اقرأ

اقرأ حتى لو صفحة واحدة من الكتاب، صفحة مش هتاخد وقت أكتر من دقيقة.

الدقيقة 9 و10: اكتب

لو طبقت الحاجات الي فاتت دي هتبقى متحمس تبدأ يومك، ولازم تستغل حماسك دا في أنك تطلع أفكار أو حاجات عايز تعملها، اكتب اللي في دماغك أفكار، أو مشاعر، أو مشاكل عايزة تتحل، أو حاجات لازم تتعمل خلال اليوم وهكذا.

المصدر