من غير كسوف.. 6 خطوات للتحدث أمام الجمهور
أوقات كتير بنضيع فرص مهمة في حياتنا من غير ما نعرف السبب الحقيقي للي عملناه؟ ومع كل يوم بيمر بنلاقي نفسنا بنرجع لورا خطوات مش عارفين نعوضها تاني.
ولما بنسأل نفسنا عن السبب بيكون الكسوف هو أول الأسباب دي. آه هو، الخجل هو اللي بيرجعنا لورا وهو بردوا اللي بيضيع مننا فرص كتير.
علشان كده أنت النهارده محتاج تتغلب عن خجلك ده، مش بس لإنك طالب وهتحتاج تواجه زمايلك في العروض العلمية والمسابقات، لا وكمان كخريج هتكون محتاج ثقة تخليك تعرف تقنع اللي قدامك بكلامك ومهاراتك علشان يقبل بيك أنت ومش أي شخص تاني.
ودلوقتي دي مجموعة من النصائح اللي اتكلمت عنها المدربة الكويتية المعتمدة ومؤسسة برنامج «حياتك» على اليوتيوب حنان السماك، واللي هتساعدك في الكلام بدون إحراج أمام الجماهير.
التحضير الجيد
الخطوة دي هتساعدك إنك تتغلب على مشاكل كتير بعد كده، لإنها لو اتعملت صح هتديك ثقة مهمة في نفسك. اقرأ أيضًا⇐استرجل.. دليلك للتعامل مع المواقف المحرجة هنا
بمعنى إنك لو كنت طالب وعندك «بريزنتيشن» مهم فأنت هنا لازم تجمع معلومات كويس، ولو في صور هتستعين بيها فده عنصر ضروري.. وهكذا.
أما بقى لو أنت خريج وعندك «إنترفيو» بس خايف من المقابلة ومش عارف تعمل إيه، فلازم هنا إن الـ«سي في» اللي كاتبة يبقى في مخك علشان لما تتسأل عن أي حاجة تعرف ترد كويس من غير أي لخبطة ممكن تقلل ثقتك وتخليك متعرفش تكمل المقابلة.
التدريب
إيه فايدة إنك مجمع مثلًا المعلومات كلها أو حافظ اللي هتقوله مع الـ HR وأنت مش مدرب كويس عليه.
التدريب ده هيخليك تحس إنك بتتكلم قدام الشخص اللي هتقابله سواء كان فرد أو مجموعة، خلي المحاولات دي تكون قدام المراية علشان لو حاسس بمشكلة في لغة جسدك تصلحها وتشوف الأنسب ليك.
التواصل بالعين
في ناس بتواجه صعوبة كبيرة في موضوع التواصل بالعين، بس مهما كانت الصعوبة أنت محتاج النوع ده من التواصل علشان اللي قدامك يقدر يتفاعل معاك بشكل إيجابي.
لو اللي قدامك شايف إنك مش مهتم بيه وباصص في مكان تاني، انتباهه هيروح لمكان تاني وهيمل منك ومن المقابلة على طول وبالتالي مش هتوصله أي حاجة أنت بتقولها.
غير نظرتك تجاه الجمهور
طالما أنت بتتعامل مع الجمهور على أساس إنك في امتحان وإن الناس الموجودة هما المراقبين، عمرك ما هتوصلهم أي حاجة صح. اقرأ أيضًا⇐لتجنب الإحراج في المحاضرة.. متعملش كده
خلي نظرتك للي قدامك سواء كان فرد أو جماعة عادية بمعنى إن دول بني آدمين زيك بالعكس أنت هنا اللي متميز عنهم بالكلام اللي هتقوله، وحتى لو كان الشخص ده هو مديرك بلاش تشوفه أحسن منك واثبتله إنك أفضل ما هو متوقع.
تعرف أكثر على جمهورك
معرفتك بالجمهور اللي هتتكلم قدامه هيساعدك في التغلب على التوتر؛ لإن ببساطة المعرفة دي هتخليك تتوقع الأسئلة اللي ممكن تتعرضلها وبالتالي هتكون جاهز للرد على أي شىء.
طيب لو كنت في «إنترفيو» ودخلت لقيت نفسك قدام 5 كل واحد بيحاول يوترك من ناحية، هنا بقى معرفتك بطبيعة المكان اللي أنت رايحله هيساعدك في إن كلامك يبقى مظبوط.
بمعنى إن مهم إنك تعرف أسماء أهم المسؤولين هناك، طبيعة شغلها علشان لما تتكلم عن نفسك تعرف تسوق نفسك بالشكل اللي هيفيدهم.
استمتع
مهما اتدربت كويس واشتغلت وحضرت، كل ده ملهوش أي أهمية طالما أنت مش مستمتع باللي بتعمله.
لازم تعرف إن استمتاعك بشغلك ده جزء مهم من نجاحك علشان تقدر تخلي اللي قدامك يستمتع هو كمان باللي بتقدمه وميحسش بالملل.
المصدر: 1
