عايز تدخل «إعلام».. صحصح للمعلومات دي هتبقى برنس

لو حابب تدخل كلية الإعلام أو لو دخلتها علشان مجموعك جبها، في شوية حاجات كدة لازم تعرفها أو أسئلة لازم تسألها لنفسك، واحنا هنجاوبك عليها في التقرير ده:

إيه هي تخصصات الكلية؟

تخصصات الكلية 3  وهي: إذاعة وتلفزيون، صحافة، وعلاقات عامة وإعلان.

ومتشغلش نفسك أوي أنك تحدد من دلوقتي أنت حابب انهي تخصص فيهم استني بعد سنة أولى.

ادخل قسم عربي ولا إنجليزي؟

كلية إعلام بتتميز زي بعض الكليات الأخري إن فيها قسم إنجليزي وقسم عربي. وفي شوية اختلافات بسيطة كدة هتحتاج تعرفها، زي:

• في عربي أنت بتدرس كل مواد بالعربي ماعدا مادة الإنجليزي.

• التخصص بتاعك بيبقى من بعد سنة أولي.

• بيبقي عندك فرصة أنك تختار المواد والدكاترة ومواعيد جدولك.

• المصاريف بتبقى من 340 لـ 400 جنيه.

أما الشعبة الإنجليزي فبتبقى كالتالي:

• بتدرس كل المواد بالإنجليزي ماعدا العربي طبعا.

• التخصص بيبقى من بعد سنة تانية.

• في تخصص عام بالنسبة للشعبة الانجليزي اللي هو بتبقي متخصص في الصحافة والعلاقات والإذاعة مع بعض وده مش موجود في الشعبة العربي.

• المصاريف بتتراوح من 12 إلي 13 ألف وممكن تقسمهم علي قسطين لو تحب.

• بينزلك جدول إجباري للسنة بتاعتك مش زي الشعبة العربي.

• عشان تدخل الشعبة الانجليزي بيعتمد على دراجتك في الانجليزي وامتحان انجليزي بتمتحنه بـ 100 جنيه تقريبا.

هدرس إيه في أول سنة؟

في أول سنة هتدرس 6 مواد في الترم منهم عربي وإنجليزي وده أساسي الترمين، والعربي هتاخد فيه بعض النصوص بطريقة مبسطة أوي وبعض الأخطاء اللغوية اللي بتقع فيها عشان مينفعش تبقي صحفي أو إعلامي وبتكتب وتنطق غلط، ومتقلقش مادة العربي سهلة أوي.

أما الإنجليزي فهو من أكتر المواد الي هتفيدك وهتتعلم منها تعمل إعلان وتسويق وتكتب عنوان للخبر.

بعد كده في أربع مواد إجباري بيتقسموا على الترمين، وهما: إذاعة وعلاقات عامة وصحافة وإعلان، وأنت اللي بتحدد أنهي منهم تاخده الترم الأول، وانهي الترم التاني ومفيش فرق اختار اللي تحبه ودول بتدرس فيهم مباديء عامة لكل مادة.

وآخر مادتين دول إختياري بينزلك جدول في مثلا 12 مادة وأنت بتختار منهم مادتين أنت حابب تدرسهم: زي إعلام علمي، وتاريخ، وجغرافيا، ومدخل نفسي للإعلام، إلخ. ودايما اسأل الدفعات الأكبر منك عن أحسن المواد اللي تاخدها.

يعني إيه الكلية بنظام ساعات معتمدة؟

يعني ليك عدد ساعات معينة لكل مادة في الأسبوع وإن لكل مادة أكتر من دكتور بتختار منهم الي يناسب جدولك ومواعيدك اللي تحبها.

لما هتخرج هلاقي شغل؟

من وأنت في الكلية عندك فرصة أنك تتدرب في مواقع الكترونية كتير وجرايد ورقية ولما تثبت نفسك في التدريب كويس هتلاقي نفسك بتشتغل في أماكن كتير.

كلية إعلام صعبة؟

كلية الاعلام كلية سهلة وسهل جدا أنك تجيب فيها امتياز بس اشتغل على نفسك.

وفي شوية معلومات كدة هتحتاج تعرفها:

• كلية إعلام أغلب اللي فيها بنات فمتعمليش حسابك تلاقي عريس من أول سنة.

• كلية إعلام فيها نسبة نظري كتير بذات سنة أولي بس هتتعود.

• كلية إعلام مفيهاش حفلات كتير زي ما أي حد بيقولك. موضوع الحفلات ده متشدد عليه شوية بس جامعة القاهرة بتعمل حفلات عامة.

• لو عاوز تبقي إعلامي وصحفي شاطر متعتمدش على اللي بتدرسه في الكلية دور دايما على التدريبات في المجالات الصحفية ودي هتلاقيها كتير بس أنت دور.

• الجزء العملي في الكلية هي تكليفات بيطلبها كل دكتور ممكن بحث أو تنزل تغطي مؤتمر أو تعمل إعلان أو مسرحية.. الخ.

• لو بتحب المسرح هتلاقي فريق مسرح ممتاز موجود في إعلام وممكن تشارك فيه.

• المدرجات مكيفة متقلقش من الحر.

وفي النهاية الكلية دي أجمل سنين حياتك حاول تستمتع بيها واشتغل على نفسك.