الدهب غِلي.. بس البنات عايزة شبكة ولا لا؟
وسط حملات ومبادرات إلغاء الشبكة بعد ارتفاع أسعار الدهب، سألنا البنات لو ممكن يستغنوا عن الشبكة أو لأ. تعالوا نشوف إجاباتهم كانت إيه في التقرير ده من «شبابيك».
المهر هو الشبكة
سارة مجدي بتقول «طبعًا معروف إن الزوجة ليها حقوق منها المهر، والمهر على حد علمي حسب العرف دلوقتي هو الشبكة، والمهر ده الشرع وحقها».
وتضيف «سارة» إن «فكرة تنازل البنت عن المهر، ده حقها تاخده متخدوش براحتها هي وأهلها.. أنا معرفش الحل إيه بس أعتقد إن الحل مش إننا نتنازل عن الدهب ونمسك في الفضة لأن هتقابلنا نفس المشكلة».
هدية تفرح قلبها
أمنية عادل شايفة إن العريس «مش لازم يجيب شبكة بس لازم يكون فيه هدية، يعني ممكن يجيب حاجة بسيطة جدًا تبسطني وتبسطه. ممكن متكونش دهب اصلًا».
وبتكمل كلامها «الأوضاع الاقتصادية صعبة حاليًا والجواز مش كله شبكة أهم حاجة يكونوا عاوزين بعض ويتقوا ربنا في بعض. ومش يتصور الولد لمجرد إن الأهل أو البنت وافقت إن بلاش شبكة، فهي كده بنت سهلة وممكن يعمل اللي هو عاوزه فيها لإنه لو اعتبر إنها رخيصة بالشكل ده هو اللي تفكيره يكون رخيص ومش فاهم يعني إيه جواز».
الشبكة رأس مال ثابت
أما مريم الشاعر شايفة إن «الشبكة أساسية ومهمة كمان لسببين: أولًا إنها راس مال ثابت لو حصل حاجة لا قدر الله مضمون إن في فلوس وقيمتها بتعلى، وثانيًا إنها الحاجة الوحيدة اللي البنت لو لا قدر الله فشلت في الزواج بتطلع بشوية الدهب دول تتسند بيهم».
وتضيف «مريم» أن «مصر هي الدولة العربية الوحيدة اللي البنت بتشارك في الجهاز وكمان إيه النص بالنص، يعني دي الحاجة الوحيدة اللي بتحس إنها هديتها من جوزها وكمان عايز يسترخص ويجيب فضة ولا دهب صيني».
غير الشبكة.. مصاريف ملهاش تلاتين لازمه في الجواز
شكليات
لكن مي شوقي بتقول إن «دي كلها شكليات وعادات وتقاليد وبرضوا الشبكة بالذات دي هدية العريس للعروسة يعنى مينفعش الكلام اللي الناس بتقوله زي أنا بنتي ميجيلهاش شبكة أقل من مبلغ معين عشان محدش بيحدد تمن الهدية».
وتضيف أن «الموضوع في الأول وفي الأخر بيبقى متعلق باختيارك للشخص وياما ناس جالها شبكة بمبلغ كبير وحاجات تانية كتير واتبهدلت بعد الجواز وطلع بني أدم مش كويس».
وتنصح «مي» بأن: «لو اخترتي بني آدم محترم يصونك ويحطك جوه عينيه ويتقي ربنا فيكي مش هيفرق معاكي كل ده، ولما ربنا يفتحله أبواب رزقه عمره ما هيستخسر فيكي حاجة وهيجبلك من غير ما تطلبي».
عدم المغالاة
ورنا عزت بتقول «أنا مع عدم المغالاة، بس مش مع التساهل والتنازل. ممكن يجيب شبكة بسيطة لكن متقولوش شبكة لأ، أو هيجيبها فضة لأن مش أي حد بيقدر وللأسف في مجتمعنا احنا بيقولوا دي ما صدقت يجيلها عريس وبيسترخصوها. صحيح مش كل الناس كده بس للأسف معظمهم».
للولاد.. 5 مقترحات تغنيك عن «الدهب» في الجواز
