داخل 3 ثانوي؟.. اعمل الصح عشان مصلحتك

كتبت- ندى عثمان

بما إنك داخل على أهم سنة دراسية في حياتك التعليمية وهي 3 ثانوي، أو «عنق الزجاجة»، نحب نبشرك إن ده عنق من زجاجات كتير جاية.

طبعاً أنت متابع الحاجات اللي حصلت في الثانوي السنة دي، من تسريبات امتحانات، وتظلم في الدرجات، وإغلاق بعض سناتر الدروس الخصوصية، وعشان تضمن أنك تجيب درجة عالية وتدخل الكلية اللي نفسك فيها إليك بعض النصائح:

فلوس الدروس

أنت هتبقى أغنى واحد في اخواتك. من مميزات الثانوية أنك طول الوقت هيكون معاك فلوس، ولكن حاول أن لا تخون ثقة أهلك بك وتضيع الفلوس على الخروجات والبلاستيشن وغيره، وهذا على الاغلب سيكون سببه أصحابك اللي بيروحو نوادي البلاستيشن.

وغالباً الدروس هي الحاجة الوحيدة اللي هتنزل من البيت عشانها، لدرجة إن الناس اللي شغالين في السناتر التعليمية هيبقوا عشرة عمر ومش هتنساهم.

المذاكرة هتبقى ازاي؟

من أول يوم في المذاكرة لازم تعمل جدول مذاكرة خاص بك يتفق مع جدول دروسك، وحاول أن لا تعدّل في هذه الجداول كثيراً لان هذا سيشتت طريقة مذاكرتك.

وحدد ساعات معينة من اليوم تبعاً لقدراتك على التركيز والفهم، وإذا كنت من محبي المذاكرة ليلاً، ظبّط نفسك على المذاكرة في الصباح، لأن انسب وقت للمذاكرة هو عند شروق الشمس، لأن المخ سيتعود تدريجياً على التركيز في هذا الوقت وهو الانسب لأنه وقت الامتحانات.

واختار أسهل المواد وابدأ بها مذاكرتك، لان هذا سيعطيك الحافز لمذاكرة باقي المواد.

وخلي المكان اللي بتذاكر فيه نظيف دايما عشان نفسك تتفتح على المذاكرة، وعلّق ورق قدامك مكتوب فيه حلمك أو الكلية اللي عايز توصلها، لأن ده هيعطيك الحافز أكثر للمذاكرة.

المدرسين

اختار المدرسين الذين يبسطون المعلومات التي توجد في الكتاب المدرسي، وليس اختصاراها أو حذف بعضها، ولهذا عليك من وقت لآخر النظر في الكتاب المدرسي وحل أسئلة الوزارة.

من الأفضل أن لا تغير المدرسين كثيراً، لأن هذا سيضيع عليك بعض الدروس بجانب تشتيت أفكارك بسبب اختلاف طريقة الشرح.

ابعد عن الأصحاب الفاشلة

ابعد عن الأصحاب الكارهين للمذاكرة، لأنهم سيعملوا بطريقة سلبية على مذاكرتك، وهذا ليس معناه أن تبعد عنهم تماما أو تقطع علاقتك بهم ،ولكن لا تفتح معهم مواضيع تخص المذاكرة، وهناك موضوعات أخرى ترفيهية كثيرة تتناقش معهم فيها.

التليفون والنت

من الأفضل أن تذاكر بعيداً عن الأشياء المغرية التي تبعدك عن المذاكرة كالتليفون والنت والتليفزيون، لأنك في الغالب هتحب الحاجات دي أكتر من أي وقت.

البيت والعائلة

في البيت هيبقوا عايزينك تجيب مجموع أكبر من ولاد خالتك. والام خصوصاً هتعمل مقارنات بغيرك سواء من العائلة أو من خارج العائلة، من وجهة نظرها كنوع من التحفيز، ولكن من وجهة نظرك هتكره كل الناس اللي دخلت ثانوية عامة وجابت مجموع عالي ودخلوا كليات قمة، أما الناس اللي فشلوا في الثانوية «ملناش دعوة بيهم».

أما الاب فطوال الوقت هيقولك إنه «بيتعب عشانك أنت بالذات وعشان ترفع رأسه»، ومفيش مانع من شوية تهزيق إذا لاحظ أنك مقصر في مذاكرتك ودروسك أو كلم أحد من مدرسينك وقاله أنك مش بتعمل اللي عليك.

النهاية

ولكن تذكر هذه الكلمة بالتحديد لما تدخل جامعة هتشتاق ليوم من أيام ثانوي، وتفكيرك كله هيتغير تماماً، وهتحس أنك كنت طفل صغير وكبرت.