اتعلم الإنجليزي من «Adele» و«Madona» و«Frank Sinatra»
الإنجليزي عقدة عند معظمنا بس سبق وقالوا إن كل عقدة وليها حلال. وحلنا جبناه ليك في الموضوع ده اللي هتلاقي فيه مجموعة من المطربين اللي الـAccent أو النطق بتاعهم في أغانيهم واضح جدًا فهيبقى سهل عليك إنك تتعلم منهم الكلام باللغة الإنجليزية.
Adele
أديل قدمت على مدار مسيرتها الفنية مجموعة من الألبومات الغنائية المتميزة وحصلت على عدة جوائز أشهرها جائزة الـ«جولدن جلوب» لأفضل أغنية أصلية. وتقدر تسمع لأديل أغاني: Hello، وSomeone like you، وSkyfall، وone and only.
وغيرها من الأغاني بس لازم تسمعها مع الـLyrics أو الكلمات بتاعتها عشان تسمع وتقرا الكلام وتتعلم النطق ودي حاجة أساسية لازم تمشي عليها مع باقي المطربين اللي هنتكلم عنهم.
Whitney Houston
و«يتني هيوستن» كانت عارضة أزياء وبعدين احترفت الغنا وكمان اتجهت للتمثيل وقدمت الفيلم الشهير «The Bodyguard» أو الحارس الخاص اللي حقق إيرادات 410 مليون دولار عالميًا. وفي الفيلم هتلاقي أغاني شهيرة زي I will always love you، I have nothing.
Frank Sinatra
بدأت شهرة «سيناترا» في أواخر ثلاثينيات القرن الماضي مع فرقة «بيج باند» الشهيرة وكان عمل حفلة قبل كده في مصر، وأغاني «سيناترا» بيغلب عليها الطابع الكلاسيكي اللي هتلاقيه مثلًا في أغنية That’s life ،Come fly with me ،My way.
Celine Dion
بدأت «ديون» الغناء في الثمانينات في فرنسا وكان أول ألبوم ليها باللغة الفرنسية أما في سنة 1990 أصدرت أول ألبوم لها باللغة الإنجليزية تحت عنوانUnison.
ومن أشهر أغانيها أغنية My Heart Will Go On من فيلم «تيتانك» واللي سجلتها سنة 1997. وسبق وأصدرت كمان أغنية فيلم ديزني «الجميلة والوحش».
Madonna
تعتبر واحدة من أنجح المغنيات في تاريخ المجتمع الأمريكي وأنتجت أول ألبوماتها الفردية سنة 1983 وبعدها عملت 3 ألبومات كمان احتلت بيهم قوائم «البيلبورد» لأكثر الألبومات مبيعاً في الولايات المتحدة، من أغانيها Live to hell، Hung up، 4 minutes.
Avril Lavigne
أفريل لافين مغنية روك وبوب موسيقاها بيسودها النمط المتمرد اللي بيعبر عن المراهقين. وبتجيد «لافين» العزف على آلات مختلفة زي البيانو، والطبلة، والجيتار، ومن أغانيها: Complicated، I’m with you، what the hell.
Justin Bieber
بداية جستن بيبر في الغناء كانت عن طريق موقع يوتيوب وأول من ساعدة للوصول إلى النجومية هو المطرب «أشر». وقدم «جستن» مجموعة من الأغاني منها: I’ll show you، Baby، sorry، Boy friend، Never say never.
