أول مسلسل اتعرض على التليفزيون المصري.. اسمه إيه؟
التليفزيون المصري من أول ما تم افتتاحه في 21 يوليو 1960 ابتدى يبث مجموعة كبيرة من المسلسلات، بس يا ترى إيه أول مسلسل اتعرض على التليفزيون المصري؟ ده اللي هتعرفه في الموضوع ده.
هروب
المخرجة إنعام محمد علي بتقول إن في أثناء الاحتفالية بافتتاح التليفزيون في يوم تم عرض أول تمثيلية تليفزيونية تحت عنوان «هروب»، وكان مدة عرضها نص ساعة فقط، وكانت بطولة زهرة العلا، وعمر الحريري، وإخراج محمود السباع، اللي بجانب إنه مخرج متميز فهو كان نجم تميز بتقديم دور الشرير في عدة أعمال فنية أبرزها دور التاجر المفلس في فيلم «الفتوة».
منها «تتجوزيني يا بسكوتة؟».. حكايات من مسرح فؤاد المهندس
الخاتم الماسي
أما المخرج محمد فاضل بيقول إن «أول ما افتتح التليفزيون المصري كان فيه عدة أعمال ولكن مسبتش صدى عند الجمهور عشان كده منقدرش نحدد أول مسلسل في التليفزيون المصري كان إيه، لكن اللي نقدر نحدده هو أول عمل ساب بصمة عند الجمهور».
مرزوق أول من قدم فكرة المسلسل البوليسي
«فاضل» بيقول إن العمل اللي ساب بصمة كان المسلسل البوليسي «الخاتم الماسي» اللي اتعرض سنة 1961، ومخرج العمل سعيد مرزوق هو أول من قدم فكرة المسلسل البوليسي في التليفزيون من خلال مسلسله ده اللي كان عبارة عن سباعية بمعنى إنه كان بيتعرض في 7 حلقات، وكانت المسلسلات في الوقت ده عبارة عن سباعيات.
هارب من الأيام
وبيكمل «فاضل» وبيقول إن مسلسل «هارب من الأيام» يعتبر تاني مسلسل ساب بصمة كبيرة عند الجمهور، وشدهم يتابعوا حلقاته أول بأول ويعتبر أول مسلسل تليفزيوني طويل فكانت حلقاته عبارة عن 13 حلقة بخلاف السباعية.
والمسلسل اتعرض سنة 1962 وهو مأخوذ عن قصة قصيرة للأديب المصري ثروت أباظة تحمل نفس الاسم «هارب من الأيام»، وحصل ثروت أباظة عند نشرها سنة 1958 على جائزة الدولة التشجيعية للرواية.
والمسلسل بيتكلم عن عمدة بيستخدم سلطته ونفوذه في إخضاع أهل القرية اللي ماسكها واللي من خلالهم بنشوف واقع القرية المصرية اللي بتتعرض لحوادث سرقة وتخريب بفعل حاكم ظالم.
والمسلسل كان البطولة الأولى لعبد الله غيث، على حد قول «فاضل» اللي تمكن فيه من تمثيل شخصيتين الأولى كانت أبله القرية والتانية كانت «كمال» الطبال. و«غيث» كان بدأ مشواره الفني في أواخر الخمسينات ومثل أدوار صغيرة في عدد من الأفلام منها فيلم رابعة العدوية.
وانطلاقة «غيث» الحقيقية كانت من خلال المسرح اللي عرض فيه مجموعة من المسرحيات منها صفقة مع الشيطان، ومصرع كليوبترا. وبعد المسرح جت تجربة بطولة مسلسل «هارب من الأيام».
علي عبد الخالق.. سينما الحرب والفلسفة والـ«بهججة»
وكان بيشاركه بطولة المسلسل النجم حسين رياض، وتوفيق الدقن، ومديحة سالم، وكمال ياسين، وعادل المهيملي، ومحمود الحديني، ومحمود عزمي، وعلي الزرقاني. وكان بيمثل في المسلسل سعيد صالح وكان يعتبر في بدايته التمثيلية.
والمسلسل كان من تأليف الكاتب والروائي ثروت أباظة اللي بيعتبر من أعلام محافظة الشرقية، مركز الزقازيق، قرية غزالة، وله اسهاماته العديدة في الأدب.
والسيناريو والحوار كان لفيصل ندا، اللي بالنسبة ليه كان أول عمل يشارك بكتابة السيناريو والحوار بتاعه، والاخراج لنور الدمرداش اللي بيعتبر أحد رواد التليفزيون وعمل بمناصب فنية مهمة فيه أخرها إنه كان نائب رئيس التليفزيون.
وطبعًا منقدرش ننسى موهبته التمثيلية اللي ظهرت في عدة أعمال أشهرها فيلم «صغيرة على الحب» مع النجمة سعاد حسني. والدمرادش هو زوج النجمة كريمة مختار ووالد الإعلامي معتز الدمرداش.
كلمات تتر مقدمة المسلسل كانت للشاعر عبد الرحمن الأبنودي وده بناءً على طلب «الدمرداش» منه إنه يكتبها، ومع المسلسل ده كانت بداية كتابة النص الغنائي لمقدمة المسلسلات.
كتب الأبنودي وقال:
يا شاب يا صغير يا ماشي السكة
الحزن ليه بكى عيون الضحكة
تضل.. وتلاقي مكان.. وتضل
عطشان لحتة شمس.. ندعة ظل
ويا شمس ياللي بتزرعي الأحلام تحتك ولد
في سنة 1965 اتعمل فيلم بنفس اسم المسلسل وكان من بطولة فريد شوقي، ومحمود المليجي، وسميرة أحمد، وصلاح قابيل، ووداد حمدي، وصلاح منصور، وكان من تأليف ثروت أباظة، وإخراج حسام الدين مصطفى، وكان مساعد المخرج أحمد السبعاوي. ولو عايز تتفرج عليه اضغط هنا.
