«لن أعيش في جلباب أبي» ده مدرسة.. والدروس المستفادة أهي
«لن أعيش في جلباب أبي» للكاتب إحسان عبد القدوس من المسلسلات اللي ليها مكانة عند قطاع كبير من المشاهدين، واللي كمان نقدر نطلع منه بكم كبير من الدروس اللي تقدر تستفيد بيها في حياتك، وده اللي هنتكلم عنها في الموضوع ده.
اجري ورا حبك
لو حبيتها وهي كمان حبتك اجري ورا حبك ده، ولو كانت ظروفك صعبة ومش هتقدر تتقدم ليها دلوقت، خلي حبك دافع إنك تطور من ظروفك زي ماعمل عبد الغفور البرعي عشان يقدر يتقدم لفاطمة كشري.
وكمان صارحها بحبك، وقولها أن ظروفك صعبة في الوقت الحالي، وأنك بتحبها وعايزها تديك مهلة تظبط حالك وتتقدملها على طول، وطبعًا لازم تكون راجل في كلمتك دي زي ما «عبد الغفور» كان راجل في وعوده لفاطمة كشري.
لماذا اختفت الأعمال التاريخية من الدراما؟
متسكوتش أبدًا وتكتم جواك حبك ليها وتقول لنفسك كل شيء قسمة ونصيب، ومتعلقش سكوتك أبدًا على شماعة النصيب عشان متلقيهاش مرة واحدة أهلها عايزين يجوزوها لواحد تاني وساعتها هترجع تقول ياريت اللي جرى ما كان.
وده كان اللي هيحصل لما «مرسي» اللي كان شغال مع «عبد الغفور» في وكالة «سردينة» طلب إنه يتجوز «فاطمة»، ولولا إن «عبد الغفور» صارحها بظروفه زي ما هتشوفوا هنا وإنه بيحبها كان زمانها متجوزة «مرسي» وعايشة عيشة تعيسة ومكوناش هنشوف أسطورة الحب والكفاخ بين «عبد الغفور» وفاطمة كشري :)
حط القرش على القرش
صحيح القرش ميجيش تمن لبانة في أيامنا دي طبعًا :) بس القصد من حط القرش على القرش إنك تشتغل وتكافح عشان تقدر تكون مسؤول ومعاك فلوسك اللي تقدر تكون بيها نفسك وتفتح بيها بيت ومتحبطش نفسك بأي عوامل خارجية سلبية أو تتشرط إنك لازم تبتدي شغل في مكان كبير.
وجرب إنك تشتغل أي شغلانة، لأن الشغل مش عيب، وطور فيها نفسك وخليك واثق إنك مادام بتسعى ربنا هيسعى معاك وهيوصلك للي إنت عايزه.
زي ما «عبد الغفور» كان بيحط القرش على القرش في المشهد ده وطور من نفسه لغاية ما اتحول من صبي عند وكالة المعلم «سردينة» لصاحب وكالة ومصنع وعمارة.
«حلاوته!».. تعرف على نجوم المراهقة المتأخرة في السينما
احترس من الناس المؤذية
في حياتك ممكن يقابلك شخص يحاول بكل الطرق إنه يؤذيك ويأثر عليك بالسلب لأنه شايف عندك حاجة مميزة مش عنده فنار الغيرة بتقيد جواه تجاهك زي ما قادت جوا «مرسي» وحاول بكل الطرق إنه يؤذي «عبد الغفور» زي ما هتشوفوا هنا لأنه شايف إن المعلم «سردينة» بيحبه وبيعلمه الصنعة.
وعليك إن لو قابلك الشخص ده أوعى تتهز نفسيًا قدامه وتخليه يأثر عليك بالسلب لأنه لو عمل فيك كده مش هيكون فيك حيل تبص على مستقبلك، وهتلاقي تفكيرك بيودي ويجيب في اللي عمله فيك وهتقعد زي ما بيقولوا تهري وتنكت في نفسك وطاقتك كلها هتروح في التفكير فيه، وهتقعد تسأل نفسك أسئلة من نوعية ليه عمل فيا كدة؟ هو أنا عملتلوا إيه؟
خلي عندك أمل
صحيح البعض منا ساعات بيضايق من الشخص اللي لما نشكي ليه من حاجة يقولنا خلي عندك أمل عشان بنشوف إن إزاي يكون في أمل في وسط الصعاب اللي الواحد عايشها دي بس الأمل موجود برضه.
واللي بيثبت وجوده هو نظرة الأمل اللي كانت في عيون عبد الغفور البرعي في المشهد ده واللي بتبين قد إيه إن عنده أمل إنه هيوصل لمكانة عظيمة على الرغم من الصعاب المؤلمة اللي مر بيها وعيشة الفقر اللي عاشها فخلي عندك أمل مهما مر بيك في حياتك من صعاب :)
استفيد من تجارب الأخرين
الناس الأكبر منك خبرة في الحياة عليك إنك تستفيد من تجاربهم وتقعد وتتكلم معاهم وتتعلم لأنك هتلاقي عندهم حلول لأي حاجة أنت شايفها صعبة وده من كتر التجارب اللي مروا بيها في الحياة واللي علمتهم وكونت شخصيتهم.
وده اللي عمله عبد الغفور البرعي من أول ما اشتغل مع المعلم «سردينة»، وكان بيسأله عن تفاصيل في الشغل عشان يستفيد من خبرته، واللي استفاد منها «عبد الغفور» فيما بعد في شغله الخاص. وحتى لما حب «فاطمة»، بس مكنش معاه حاجة عشان يتقدملها فنصحة «سردينة» إنه يقولها ده عشان متضيعش من إيديه زي ما هتشوفوا هنا.
من بديعة مصابني لكباريهات الهرم.. هذه حكاية المسرح الاستعراضي
حلي أزمة حبيبك
لو الشخص اللي مرتبطة بيه حصل ليه أزمة معينة سواء كانت مالية أو نفسية على قد ما تقدري حاولي تحليها ليه زي ما فاطمة كشري في المشهد ده، وقفت جنب عبد الغفور البرعي وقلعت ليه صيغتها اللي هو أصلًا جابها ليها وساعدته في إنه يحل الأزمة المالية اللي عنده لأن قد إيه الحاجة دي بتبقى كبيرة قوي في نظره وتطمنه إن لو أي أزمة حصلت ليه هيلاقي حد يتسند عليه ويساعده وده بيحسسوا قد إيه إنه اختار الحبيبة والزوجة الصح.
