إزاي تفاجىء خطيبتك يوم عيد ميلادها؟.. بس بلاش دباديب
كتبت- مي مصطفى:
أغلب الشباب بقوا حريصين دلوقتي على تنظيم حفلات عيد ميلاد مفاجأة لخطيباتهم، خاصة اللي ظروف شغلهم بتمنعهم من الخروج والمقابلات وقت كتير، فبتكون فرصة عيد الميلاد مناسبة جدا لمفاجئة الخطيبة وتعويض كل التقصير.
وطبعا مفاجئتها بوجود احتفال بعيد ميلادها في يوم غير متوقع بتكون أقوى كتير من إنها تبقى عارفة ومستنية، بس السؤال هو: حتقدر تعمل كده إزاي كل مرة من غير ما تتكشف؟
التنسيق
أحسن حل إنك تبلغ أسرة خطيبتك وأصحابها المقربين برغبتك في تنظيم حفل مفاجيء ليها، أولا لأن مفيش حفلة بتتعمل بشخص واحد بس اللي هو أنت، وثانيا لأن دول هم اللي حيساعدوك في تنظيم الخطة أكتر، ولو إنه من الأفضل ما توسعش الدايرة قوي يعني ما تبلغش كل أصحابها ممكن تكتفي في البداية باتنين بس وباقي صديقاتها يتم تبليغهم قبلها بـ 48 ساعة بس، لأن كل ما السر وسع كل ما كانت احتمال إنهم حد فيهم يفتن أكبر.
6 للولاد و6 للبنات.. أصناف الحب «الإثنى عشر»
اختيار يوم مختلف
البنت طبيعي تتوقع إن خطيبها أو صاحباتها حيحتفلوا بعيد ميلادها يوم عيد ميلادها ولو حصل بعد كده دمه مش حيبقى خفيف، فأحسن حل إنك تختار يوم المفاجأة قبل عيد ميلادها بيومين أو تلاتة أو حتى 5، بس ما تزودش عن 5 أيام.
التمهيد
لو خطيبتك من النوع اللي بيتوقع المفاجآت حتكون مهمتك أصعب ومش كفاية بس إنك تكون مختار يوم غير يوم عيد ميلادها، لأ حتحتاج كمان تبعد عن ذهنها بطريق غير مباشر احتمالية إنك حتعملها احتفال أصلا في اليوم اللي أنت اختارته عشان لما ييجي اليوم ده تكون مش متوقعة حاجة.
يعني مثلا من قبل اليوم ده بشهر تقولها إن عندك تسليم شغل أو إنك مسافر يومين تبع شغلك، أو حتى إنك حتكون مشغول في فرح واحد صاحبك، بحيث إنها حتى لو متوقعة إنك حتفاجئها في عيد ميلادها تكون باعدة عن بالها تماما اليوم اللي أنت اختارته.
للولاد.. 5 مقترحات تغنيك عن «الدهب» في الجواز
وضع الخطة
عرفنا إزاي تحدد اليوم، لكن إزاي تحدد مكان الاحتفال، لو حيتعمل في بيت خطيبتك فيكفي التنسيق مع والدتها وأخواتها، ولكن لو برة البيت لازم تستعين بحد من صديقاتها، وساعتها حيكون ليها دور في إنها تقنعها قبلها بأسبوع بأنها عايزة تخرج في اليوم ده لكافيه محدد عايزة تجربه، أو حتى تخترع سبب تاني لاختيار المكان ده وهو إن عندها مقابلة شغل مع حد أو إنهم عايزين يفاجئوا واحدة صاحبتهم تالتة هناك، وكل ما كان السبب مقنع وله مقدمات من قبلها كل ما كانت عملية خداع صاحبة عيد الميلاد أسهل.
اختيار الهدية
طبعا ممكن تكتفي بأنك جيبت تورتة عيد الميلاد أو إنك دفعت فلوس للكافيه، ولكن لو فيه إمكانية إنك تجيب هدية كمان فوق كل دة حيبقى أجمل، وما تقدمهاش في أول اللقاء، الأحسن تقدمها بعد ما تطفي الشمع أو حتى بعد ما تخلص أكل لأن ساعتها حتكون خلاص مش متوقعة إن فيه مفاجآت تانية في اليوم غير إنك موجود وغير إنك محضرلها تورتة وعيد ميلاد، بس الحقيقة إنك أجلت المفاجأة التالتة لوقت متأخر وبكدة حتتفاجيء من جديد، ويفضل تكون الهدية حاجة هي محتاجاها فعلا أو كانت عاجباها قبل كده، وعدم الاستسهال بأنك تجيب قلب أو دبدوب.
