لو تنسيقك وداكي لمحافظة تانية.. متخفيش ودليلك أهو بالتفصيل
كتبت- مي مصطفى:
لو لسة مخلصة الثانوية عامة والتنسيق هيخليكي تكملي دراستك في محافظة غير محافظتك، متقلقيش، وافتكري إن فيه ملايين الطالبات المغتربات بعضهم سافر برة مصر خالص عشان يكمل دراسته، مش بس برة محافظاتهم.
في التقرير ده من «شبابيك» هنعرض عليكي تجارب زميلاتك اللي درسوا في محافظات تانية، وهتعرفي نصايح تخليكي تعدي فترتك الجامعية بدون قلق.
داخل أولى جامعة؟.. 5 أمور تُزعج «الدكاترة» عليك تجنبها
المدينة الجامعية
المدينة الجامعية أحسن اختيار للمغتربات الجدد، لأن فيه حد تاني مسؤول عن تأمين المكان اللي ساكنة فيه وكمان عن تقديم الوجبات، وده ميزة كبيرة، خاصة في أول قرار سفرك لأنك حتكوني مشغولة بحاجات تانية، مع العلم إن إيجار الشهر في المدينة الجامعية ما بيزيدش عن 90 جنيه بالوجبات، وده معناه توفير كبير لمصاريفك.
تقول رباب أحمد: «أنا من الغربية ودرست في جامعة القاهرة، وقضيت 4 سنين الدراسة في المدينة الجامعية، وكان ليها مميزات زي ما كان ليها عيوب، مميزاتها هي الأجرة البسيطة وكمان الـ3 وجبات المتوفرة، لكن كنا بنلاقي أزمة أيام الامتحانات عشان نركز لأن المدينة زحمة وكل دور فيه 50 أوضة وكل أوضة فيها بنتين فكان صعب الواحد يركز في المذاكرة، وكمان مدينة الطالبات موجودة في منطقة بولاق الدكرور وهي منطقة شعبية وكنا بنتعرض لمضايقات كتير في الطريق».
وده كان نفس رأي ياسمين يونس: «أنا من المنوفية واضطريت أدرس في جامعة أسيوط، وأول ما عيشت في المدينة الجامعية كنت كارهاها لأن أوضها ضيقة والعفش اللي فيها قديم، لكن بمرور الوقت اتعودت عليها، واتفقت مع زميلتي في الأوضة إننا نجملها على طريقتنا بالملايات والستاير وكمان جيبنا مفارش، لحد ما بقت حاجة تانية خالص، وكمان لما بتقدري تكوني صداقات مع زمايلك من الكلية أو من زمايلك في الأوض التانية بتلاقي إن الوقت اللي بتقضيه في المدينة هو أحلى وقت».
في أولى جامعة هتقابل التحديات دي.. وده دليلك للتغلب عليها
سكن خارجي
فيه ناس كتير بتفضل إنها تقعد في بيت خاص للطالبات، أو تأجر شقة مع ناس من زمايلها، على اعتبار إن الحل ده بيحافظ على الخصوصية أكتر وبيدي فرصة أكبر في التأخير بعكس المدينة الجامعية اللي لازم تقفل أبوابها 8 بليل.
وعن التجربة دي بتقول نرمين محمد: «أنا إسكندرانية وكنت بدرس في جامعة القاهرة وكنت مقررة من أول يوم ماسكنش في المدينة الحكومية عشان مستوى النظافة، وفي الأول قعدت في بيت طالبات وكان إيجاره 800 جنيه في الشهر وكان ليا أوضة لوحدي ودي كانت أهم حاجة بالنسبالي، بس الإيجار ده من غير الأكل، كان بيقى فيه بوتاجاز وتلاجة للي عايز يطبخ، بس أنا عن نفسي كنت بكسل وأشتري أكل جاهز، ولما اتخرجت روحت عيشت في شقة مع 2 زمايلي، ولقيت إن الوضع مختلفش كتير».
وأضافت شيماء محمد من المنيا: «أنا جربت أعيش في المدينة الجامعية وقت الدراسة في جامعة القاهرة وبعدها أجرت شقة مع 5 من زمايلي برة، وكل حالة فيهم كان ليها مميزاتها. مميزات المدينة الجامعية هي توافر إقامة بأكل بسعر بسيط وكمان مسؤوليتنا فيها كنت قليلة ولو حصل أي عطل في الكهرباء أو المية فيه عمال بييجوا يصلحوه واحنا مش مطلوب مننا حاجة غير الحفاظ على نظاقة أوضنا وبس، إنما لما عيشنا في شقة لوحدنا كان فيه مزايا تاني زي الخصوصية، ووجود تليفزيون ونت احنا اللي مدخلينهم، مع حرية الكل في أي ميعاد والرجوع للبيت في أي ميعاد، حياة تعتبر مسؤولة أكتر».
وتقول ميرنا رؤوف: «مش صعب إن البنت تعيش في شقة خاصة طالما معاها زمايلها ومش حيلاقوا مضايقات من الجيران ولا حاجة زي ما الدراما بتصور، طالما مش بيعملوا حاجة غلط، إنما أهم نقطة في الخطوة دي هي اختيار زميلات السكن واللي لازم يكونوا بيتحملوا المسؤولية، لأن العيش في شقة معناه توزيع مهام بالعدل بين التنضيف وبين الطبيخ، ولو اللي معاكي مش بيتحملوا مسؤولية أو كسلانين حتتحول شقتكم لكابوس من الخلافات».
خد الخبرة من أهلها.. نصائح الطالبات لبنات أولى مدينة
ودي مجموعة نصايح حطيها حلقة في ودنك لو ناوية تقعدي في المدينة الجامعية:
- لو تقدري تضمي مواعيد محاضراتك في أيام قليلة بحيث تكوني نص الأسبوع في الجامعة والنص التاني تروحي بيتك يبقى أحسن.
- ما تحاوليش تلعبي في مواعيد المدينة سواء في الرجوع أو في تناول الوجبات لأن دة قانون من سنين لكن لو أقلمتي نفسك عليه حترتاحي أكتر.
- الصحبة هي أهم عامل يخليكي تعدي أيام الاغتراب وانتي مرتاحة ومتسلية، وممكن كمان تكوني مبسوطة أكتر ما تبقى قاعدة لوحدك في البيت لأن اللمة ليها حلاوتها برضه، فالمهم تختاري أصدقائك كويس.
- لازم تعرفي إن أوضتك في المدينة مش ملكك لوحدك، وأحسن حل إنك تحطي نظامها وترتيب مواعيد النوم والمذاكرة بالتنسيق مع زميلتك فيها عشان أنتم الاتنين تريحوا بعض.
ولو حتعيشي في بيت طالبات أو شقة خاصة:
- حاولي تختاري شقة مناسبة قرب موقع الجامعة بقدر الإمكان.
- لازم تكوني من النوع اللي يقدر يتحمل مسؤولية بيت ويدبر مصاريفه كاملة.
- لازم تتعاوني مع زميلاتك في مهام الأكل والتنضيف وتكوني واثقة إن هم كمان قد المسؤولية.
- لازم تأكدي على صاحب الشقة إن الشهر التأمين اللي دفعتوه حتاخدوه تاني وأنتم ماشيين في الآخر لأن أغلبهم مش بيرضى يرده بالمخالفة للقانون.
- ما تكتفيش بالتعامل مع البواب أو صاحب العمارة وتقولي الجيران مش مهمين، خلي ليكي تواصل مع جارة على الأقل تتأكدي منها من مصاريف الصيانة اللي بتدفع شهريا للبواب عشان الأسانسير أو المواتير، لأن البواب ممكن يستغلكم.
- ما تعتمديش على الأكل من برة على طول واستغلي الفرصة إنك تتعلمي من زمايلك شغل المطبخ، عشان ما تلاقيش روحك آخر الشهر دافعة مبالغ كبيرة على الفاضي.
المواصلات:
- طالما حفظتي الطريق من محطة القطر أو الموقف لمكان الجامعة ولمكان السكن، فأنتي كدة مش معرضة لأنك تتوهي خلاص ولا تتعبي في مشاويرك.
- ما تتكسفيش تسألي أكتر من شخص على العنوان اللي رايحاه عشان تتأكدي منه.
- قبل ما تركبي أي مواصلة جديدة اتأكدي من حد من أهل البلد الأول من المواصلة ومن الطريق.
