خلي بالك في أولى جامعة.. هيتنصب عليك في 5 حاجات
كل مرحلة في حياتنا فيها الحلو والوحش، لكن أحيانا بنثق في إن اللي حوالينا مش ممكن ينصبوا علينا، وده نتاج قلة خبرتنا، وخصوصا في سنة أولى جامعة.
عشان كده لازم نكون حذرين في أول كل مرحلة لأننا لسه بنتأقلم مع الحياة الجديدة، وزي ما بيقولوا «محدش بيتعلم ببلاش».
في مرحلة الجامعة هتلاقي مجتمع كبير أوي، وفيها بتبتدي تعتمد على نفسك في كل حاجة، وبتتعامل مع ناس كتير، ممكن يتنصب عليك منهم من غير ما تاخد بالك، وبعد كده هتندم، علشان كده «شبابيك»، بيقولك خد بالك من الحاجات دي:
6 نصائح ضرورية لطلاب أولى جامعة
السرقة
مواقف السرقة دايما بنتعرض لها في حياتنا، لكن في الجامعة بتكون زيادة وده ناتج عن قلة خبرتنا، بالإضافة للظروف اللي ممكن تزود معدلها معانا.
أميرة محمد بتقول «كنت لسه جاية القاهرة، وعايشة في المدينة، كل اللي يعرف إني كنت من الكويت، يديني الحاجة ضعف تمنها، وأنا مكنتش أعرف، بخلاف طبعا سرقة موبايلي في الجامعة وساعات المحفظة بالفلوس، لأني كنت بسيبها عادي، لكن دلوقتي بقيت حذرة جدا، واتعلمت».
مش لازم تفترض حسن النية من الناس، في معظم المواقف، ولازم تاخد بالك من فلوسك وتليفونك كويس، بالإضافة أنك تسأل عن أسعار الحاجة أكتر من مرة وفي أكتر من مكان، عشان متديش فرصة لحد أنه يسرقك أو يستغلك.
https://www.youtube.com/watch?v=spzuJsSSirc
6 حاجات لازم تتعلمها في أولى جامعة
المواصلات
مع حياتنا الجديدة، بنبتدي نتعرف على الأماكن والمواصلات اللي ممكن نستخدمها، سواء كانت مترو، أو ميكروباصات، أو تاكسي، أو أتوبيسات هيئة النقل العام.
خد بالك من المكان اللي انت رايحه، والمواصلات اللي هتستخدمها، ولازم تعرف الأجرة بتاعة كل حاجة، ولو هتركب تاكسي خليه يشغل العداد لأن ده حقك. وأنت بتدفع فلوس المواصلات احسبها كويس عشان متتسرقش.
محمد أشرف بيقول «كنت في جامعة عين شمس وبنزل المترو، وبدل ما اخد ميكروباص باخد تاكسي وعارف أنه مش هياخد أكتر من 5 جنيه، لكن في ناس كانت بتحاول تنصب في الفلوس وتقولي 10 و15 لكن أنا عارف المشوار ياخد كام».
وينصح محمود أحمد طلاب أولى جامعة بالانتباه الجيد عند دفع الأجرة، قائلا «أول سنة مخدتش بالي من المواصلات، واتنصب عليا في 50 جنيه».
لطلاب أولى جامعة.. دي أفضل طريقة لتكوين صداقات جديدة
السماسرة
من الناس اللي بنتعامل معاهم دايما في سنة أولي، هما السماسرة سواء كانوا من سماسرة الشقق لو أنت طالب مغترب وبتدور على مكان خاص تعيش فيه، أو السماسرة اللي موجودين قدام الجامعات تبع للمراكز ومكاتب التصوير.
النوع ده دايما بيحاولوا يطلع بأكبر قدر من الاستفادة، وغالبا لو هيعملوا خدمة ليك هياخدوا ضعفها مرتين.
سماسرة التنسيق مثلا موجودين من أول يوم، وبياخدوا علشان يسجلوا للناس ويطبعولهم الورقة 50 جنيه، في حين أن مكتب التنسيق بيقدم الخدمة مجانا، هذا ما قاله والد الطالب عمرو أمين.
خد بالك كويس من أن يتنصب عليك من الناس دي، وأسأل أكتر من مكان، وممكن تسأل ناس أكبر منك وهما هيفيدوك أكتر بدل ما يتنصب عليك.
داخل أولى جامعة؟.. 5 نصائح للتعامل مع الدكاترة
السخرية
فيلم صعيدي في الجامعة الأمريكية، هو أول فيلم يجي في بالنا عند الحديث عن الحياة الجامعية، لأنه ناقش نقطة مهمة وحقيقية موجودة بالجامعات المصرية وهي «السخرية من الآخرين»، سواء كان على طريقة اللبس أو الكلام أو التعامل.
ولازم تفرق، في أول أيامك الدراسية بين الجد والهزار، وتعرف أن مينفعش تدي فرصة لحد أنه يتريق عليك لأن ده نوع من أنواع النصب اللي مش شرط يكون في السرقة أو الفلوس، بس لازم تحترم ثقافة الآخرين، ويحترموا أيضا طبيعتك.
حاول أن تتأقلم مع الحياة الجديدة، واعرف إنها مجرد بداية وهتتعلم حاجات وهتتغير، وأنك داخل مجتمع بشخصية، وهتخرج بشخصية تانية خالص.
النصب على المشاعر
أول حاجة بتيجي في بالنا، أننا أول ما ندخل الجامعة لازم نحب ونتحب وندخل في أكتر من علاقة، ونبتدي ندور على فارس أحلامنا، ونلاقي نفسنا في علاقات كتير في الآخر مش حابين نكمل فيها.
وفي نوع تاني، سواء ولاد أو بنات بيلاقوا أن الجامعة فرصة أنهم يضحكوا على بعض باسم الحب، خد بالك كويس ومتدخلش نفسك في علاقة أنت عارف إنها ممكن تفشل.
متستعجلش أنك تحب، لأن استعجالك ده ممكن يكون وسيلة لحد ينصب عليك في مشاعرك ويستغلك.
