هتجيب «هامستر»؟.. طب اعرف هو ايه الأول

مودي سلطان، من مزرعة «سامي» للحيوانات الأليفة بيقول إن الـ«هامستر» حجمه أصغر من الفار، وفيه منه ألوان، وملوش ديل، وبينقسم لنوعين وهما: الـ«هامستر» العادي اللي من أصل سوري، و الـ«هامستر الدوارف» القزم اللي قد عقلة الإصبع واللي أصله روسي.

واللي منتشر في المحلات هو الـ«هامستر» اللي من أصل سوري واللي سعره 35 جنيه. وهو من النوع اللي بيحب ينام أكتر بالنهار ويصحى بالليل.

عمر الـ«هامستر» قصير؛ 3 سنين بس مش أكتر من كده وبيعيش 1000 يوم والأم الـ«هامستر» بيتكاثر في بطنها في المرة الواحدة من 4 لـ 12 «هامسترية».

ولو عايز تجيب «هامستر» واحد مش ولد وبنت يبقى تجيب معاه ألعاب تسليه في القفص. ومتجبش أبدًا ولدين منه مع بعض أو بنتين عشان هتحصل خناقات بينهم وهيضربوا بعض.

وبيكمل «مودي» وبيقول إن أكل الـ«هامستر» عبارة عن مجموعة من البذور وهي اللب السوري، والقمح، والدرة، والشعير، وعلف الأرانب.  ومبياكلش السكريات.

بينصحك «مودي» عشان تتجنب ريحة الـ«هامستر» أنك تجيب لما تشتريه رملة مخصوصة للقطط بتمتص الروايح والسوايل اسمها «الليتر» وتحطها تحته في القفص. والرملة دي مش هتخليك تشم أي روايح كريهة وبتغيرها كل 5 أيام وتحط غيرها. وطبعًا الرملة دي أحسن بكتير من نشارة الخشب لأن النشارة هتحتاج إنك تغيرها كل يوم. و الـ«هامستر» مش بيستحمى خالص لأنه بينضف نفسه بنفسه.

عايز تشتري كلب؟.. فيه حاجات لازم تعرفها الأول

قفص الهامستر قفص الـ«هامستر» بيكون فيه مكان للمية ومكان للأكل زي أي قفص ولازم تحطه في مكان مناسب ميكونش معرض فيه لحرارة الشمس. وطبعًا وجود الـ«هامستر» جوا القفص ده أمان ليك لأن لو سبته برا القفص هيقرقد أي حاجة في البيت بسنانه لأنه من القوارض اللي معروف إن سنانها بتقرقد أي شيء. بس لو عايز تطلعه برا القفص فبينصحك «مودي» إنك تشتري ليه كورة فيها فتحات هوا عشان التنفس من محل الحيوانات وتحطه جواها وتسيبه يتحرك بيها وهيبقى سهل طبعًا إنك تلاقيه عن طريق الكورة بس متسيبوش في الكورة أكتر من 30 دقيقة عشان ممكن يحصل ليه دوخة ويرجع.

الـ«هامستر» بيضايق لو حد مسكه بسرعة وهو نايم، وخضته من المسكة دي بتخليه بحركة لا إرادية منه يعض اللي صحاه ولو حصل وعضك أو عض أي حد حط قطنة بيتادين على مكان العضة وطهر الجرح.

بتطبطب على راسه وضهره، بس تراعي وأنت شايله إنك تكون قاعد لأنه لو نط من إيدك وأنت واقف ووقع على دماغه ممكن يموت لأنه وقع من مسافة عالية. وكمان بيحب يلعب بالمناديل جدًا. يروح الدكتور امتى ودي الـ«هامستر» للدكتور لو حسيت إنه بيتصرف على غير طبيعته. أو تلاقي في جسمه مثلًا تعويرة أو أي حاجة غريبة. وطبعًا متكسلش ومتروحش عشان صحته متدهورش.