عايزة تتعلمي أي أكلة؟.. 5 مواقع هتفيدك
الطبخ عقدة كتير من البنات خاصة اللي لسه متجوزين جداد ومكنوش بيدخلو مطبخ كتير قبل كده. بس اللي قبلينا قالوا إن كل عقدة وليها ألف حلال.
وعشان كدة حبينا نحل عقدتك وجبنا ليكي 5 مواقع هتفيدك وتخليكي تكملي مسيرة أبلة نظيرة :D
محشي.كوم
«محشي دوت كوم» مش بس مقتصر على إنه يقدملك وصفات الأكل اللي إنتي عايزاها سواء كانت وصفة مكتوبة أو متصورة فيديو، لأ ده كمان بيعرفك أسعار السوق عاملة إزاي عشان الميزانية متخرمش منك في وسط ما إنتي بتشتري وتقدري تظبطيها قبل ما تنزلي من البيت.
وبرضو لو عايزه تسألي عن أي حاجة بخصوص مطبخك هتلاقي الإجابة على طول وكمان مواضيع هتهمك.
بسمتي
وإنتي قاعدة في بيتك «بسمتي» بينقلك لمطابخ العالم عشان لو كنتي حبة تعملي أكلة مغربية ولا هندية ولا أي أكلة جات على بالك كنوع من التغيير ده بجانب طبعًا إنه بيعرفك على كل الوصفات اللي إنت عايزاها بخصوص المطبخ المصري.
ومش بس كدة ده عامل ليكي قسم خاص للريجيم عشان لو حبة تاكلي براحتك بس في نفس الوقت تحافظي على وزنك. كمان عامل قسم خاص للأطفال ووصفات للأكل المناسب ليهم وده هيفيدك في إنك يكون عندك معلومات مفيدة تهم صحة طفلك الغذائية.
شملولة
لو عايزة بقى يكون معاكي كتب طبخ تحطيها في مطبخك وتبتكري أنواع مختلفة من الأكلات موقع «شملولة» بيقدملك قسم خاص فيه مجموعة من الكتب اللي هتفيدك جدًا.
بجانب طبعًا وصفاته المختلفة للأكل اللي إنتي عايزاه سواء أكل حادق أو حلو، وكمان بيقترح عليكي كذا طريقة تعملي بيها الأكلة ديه عشان متزهقيش من كتر ما إنتي بتعملي نفس الصنف.
أطيب طبخة
موقع «أطيب طبخة» بيقدملك كل اللي إنتي عايزاه عشان يكون أكلك أحلى، زي إنه بيقولك كل النصايح اللي هتفيدك وإنتي بتعملي الأكل وكمان المكونات اللي لو استخدمتيها هتخلصك من الدهون الزايدة اللي مضايقاكي.
ده غير كمان إنه بيخليكي تشاركي بوصفتك بأكلة بتحبيها بحيث الناس تستفيد منها وغيرها من الفوايد اللي هتتعرفي عليها لما تدخلي عليه.
نستلة
«نستلة» شركة رائدة في مجال التغذية بقالها 150 سنة زي ماهو معروف، ومن خلال موقعها بتقدملك كل ما يخص مجال التغذية من الألف للياء، وطبعًا كل وصفات الأكل اللي إنتي عايزاها واللي بتقسمهالك نستلة على حسب نوع الطبق، المناسبة، المطبخ إذا كان شامي ولا خليجي، وحسب كمان نوع الطبق إذا كان وجبة رئيسية ولا مقبلات.
وكمان الموقع بيقدملك نصايح تعمليها عشان أكلك يكون صحي ومش بس نصايح لأ ده بيقدملك وصفات أكل كمان. وزي ما الموقع بيقدم كل حاجة تخص طبيخك بيقدم كمان كل حاجة تخص طبيخ طفلك من الألف للياء برضو.
