3
أنت هتمثل؟.. طيب هي دي التمارين على المسرح

أنت هتمثل؟.. طيب هي دي التمارين على المسرح

تمثيل المسرح ممتع لكن ليه هيبة كده محتاجة تمارين كتير. بس لو عندك موهبة التمثيل وفكرت تمثل على خشبة المسرح يبقى لازم تستعد بالحاجات دي اللي هتخليك مؤهل إنك تكون ممثل مسرحي.  

وفي الموضوع ده المخرج المسرحي زياد المصري بيقولك على مجموعة من التمرينات اللي هتفيدك في بداية التمثيل وبيأكد على إنك لازم تعرف إن المسرح هو أبو الفنون وليه عالم خاص، وعشان تدخل جواه بينصحك إنك يكون عندك 90% استيعاب و10% موهبة.

يعني متعتمدش على موهبتك في التمثيل بس ومتطورش نفسك، واللي لازم تعمله إنك تستوعب 90% من التمارين دي، ومن التعليمات كمان اللي هيقولها ليك مخرج المسرحية فيما بعد عشان تستحق إنك تكون ممثل مسرح.

المراية

التمرين ده هدفه التركيز والتواصل الذهني والبدني، وعشان تعمله بتوقف حد قدامك كأنه مرايتك بالظبط وتبص في عينيه بتركيز شديد عشان يكون فيه تواصل ذهني بينك وبينه وبعدين تبدأ تتحرك وهو بيتحرك معاك خطوة خطوة، والمهم طبعًا محدش منكوا يسبق التاني، وانتوا الإتنين تكونوا بتتحركوا نفس الحركة زي ما هتشوف في الفيديو ده.

3 حيطان

تمرين 3 حيطان غرضه إنك تدرب نفسك على إنك تطلع كمية كبيرة من الإنفعالات والأحاسيس مختلفة، وده هيتعمل بإنك مثلًا تختار أي مكان في البيت عندك وتعتبره إنه خشبة المسرح.

مثلًا لو اخترت أوضتك، هتقف في النص وبعدين تبدأ التمرين بإنك تجري على الحيطة الأولى اللي في اليمين وأنت بتزعق لحد بقوة، وبعد كده تجري على الحيطة التانية اللي في الشمال وتبدأ تعبر عن حبك لبنت بتتخيلها واقفة قدامك.

وبعد كده تجري على الحيطة التالتة وأنت بتعيط بحرقة على حد مات عزيز عليك، وهكذا ابدأ اجري من هنا لهنا وأنت بتعمل انفعالات وأحاسيس مختلفة ما بين الغضب، والفرح، والحزن، والغزل وهكذا.

من بديعة مصابني لكباريهات الهرم.. هذه حكاية المسرح الاستعراضي

آه

تمرين الـ«آه» ده عبارة عن تمرين بيدربك على إن نفسك يكون طويل مش متقطع عشان طبعًا لما تقول مونولوج مسرحي تقولوا بنفس مظبوط مش كأنك قاطع النفس. وبيكون على 3 مرات بأسلوب متدرج، يعني في الأول قولها مثلًا لمدة 5 ثواني، بعدين 10 ثواني، بعدين حاول تبقى 15 ثانية وهكذا.

التحقيق

التمرين ده هدفه هو إنك يكون عندك قدرة على الإرتجال والتركيز وسرعة البديهة، وعشان تعمله هات صاحبك مثلًا واختار المكان اللي حابب تقعد فيه واقفل النور وافتح لمبة متسلطة عليك، زي شكل التحقيق اللي بتشوفوا في الأعمال الفنية. capturekjlkkl

الفردية

الفردية معناها الإرتجال، والممثل لازم يكون عنده قدرة على الإرتجال عشان يكسر خجله ويتعامل بطبيعية، وده هيتم عن طريق إنك تتفق مع صاحبك إنكوا ترتجلوا مشهد مثلًا عن التحرش وتبدأوا تمثلوه وأهم حاجة إنك متمثلش يعني عبر عن الشخصية بطبيعية.

ومتصطنعش أداء أوفر عشان الاصطناع بيقفل الجمهور منك، وكل ما كنت طبيعي هتكون قريب من قلبه وهيصدقك وهيعيط معاك لو مثلت مشهد تراجيدي، وهيضحك من قلبه لو مثلت مشهد كوميدي.

الحكي

برضه تمرين الحكي بيقيس قدرتك على الإرتجال، وبيتم عن طريق إنك تقعد على كرسي وتحكي أكتر موقف أثر عليك في حياتك شبيه بجلسات حكي تجارب الأشخاص مع الإدمان  في مسلسل تحت السيطرة اللي كان كل واحد بيطلع يحكي تجربته فيها.

علي الصوت

في حاجة كدة بيقولوها دايمًا لما تيجي تمثل في المسرح وهي إن فيه ست عجوزة سمعها تقيل قاعدة في أخر المسرح وعايزة تسمع اللي بيحصل على الخشبة، وكانوا بيقولوا كده علشان تدرب نفسك على إن صوتك يسمعه كل الجمهور اللي في الصالة.

وعشان كده فيه تمرين هيفيدك هتجرب فيه طبقات مختلفة من الصوت بشكل تصاعدي عشان تقدر تفتح صوتك. وهتجرب تقول الكلمة اللي اتقالت في الفيديو أو أي كلمة تانية في بيتك  بطبقات مختلفة من الصوت بشكل تصاعدي.

اوردرات مختلفة قي نفس الوقت

التمرين ده بقى بيفيدك من 3 نواحي الناحية الذهنية، والعقلية، والفكرية، وهو إنك بتعمل أوردرات مختلفة في نفس الوقت يعني إيدك تعبر عن الفرح وفي نفس الوقت وشك بيعبر عن الزعل. أو مثلًا تخلي رجلك تعبر عن الغضب ووشك يعبر عن الفرح، وهكذا. https://youtu.be/CdKz-uwKDfQ?t=270

الرياضة

التمارين الرياضية مهمة جدًا إنك تعملها في أي أيروبكس، ولما تروح حرك هناك كل عضلة في جسمك من الراس لحد القدم، وده عشان تكون خفيف على المسرح لو اطلب منك  إنك ترقص على موسيقى أو أغنية ما تكون قادر على ده.

ولو اطلب منك كمان إنك تغني يكون نفسك متظبط مش بتنهج وده لأن الممثل لازم يكون فنان شامل قادر إنه يعمل كل حاجة تبرز الدور اللي بيمثله.

الإيقاعات

تمرين الإيقاعات هو تمرين بيدربك على إنك تكون أذنك موسيقية وده بيتم إنك مثلًا تجيب اتنين من صحابك وتتفق معاهم إنك هتعمل تمرين الإيقاعات وهما هيشاركوك فيه وتبدأ التمرين وتبدأ وبعدين التاني يركب على ايقاعك والتالت وهكذا زي  ما الفيديو ده بيوضح.

الكورة

هدف تمرين الكورة هو إنه يخليك تعرف تركز، وهيتم عن طريق إنك تحدف الكورة لصاحبك، وأنت بتبدأ تحكي قصة، وتقول مثلًا أنا امبارح كنت في الشروق، وصاحبك يكمل القصة ويقول شوفت حادثة كبيرة ويحدفلك الكورة، وتكمل القصة وتحدفله الكورة ويكمل وهكذا. وانتوا بتلعبوا هتكونوا مركزين إنكوا تحكوا الحكاية بدون ما يحصل ليكوا أي تشتت.

لو عايز تمثل.. عناوين مكاتب «كاستينج»

 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»

ميكس ميديا