الهستيريا.. صراع الرغبة بين المرفوض والمفروض
بيقولوا على المريض بالهستيريا طفل كبير؛ لأن أفعاله كلها أفعال أطفال صغيرين، من ناحية سطحية المشاعر، والقابلية للتأثير بالإيحاء، وتقلب المزاج، وعدم النضج وعدم قدرته على التحكم في الانفعالات وسذاجته. وده كله ناتج عن خلل في الجهاز العصبي المركزي المسؤول عن التحكم في الانفعالات وإطلاق الأحكام وضبط المشاعر. وبسبب صراع بين الغرائز والمعايير الاجتماعية.
يعني أنت بتكون عاوز حاجة طبقا للغريزة بتاعتك بس معايير المجتمع بتمنع ده.
وليهم سمات تانية زي:
- المبالغة والتهويل والاستغراق في الخيال والتمثيل السلوكي والاستعراض والتكلف والاندفاع والكبت.
وصلت الـ30 ومعملتش حاجة؟.. اقرأ الموضودع ده
الأسباب
أستاذ علم النفس بجامعة الأزهر وعميدة كلية الدراسات الإنسانية سابقا الدكتورة هناء أبو شهدة قالت إن الهستيريا بتكون بسبب صراع نفسي داخلي بين الغرائز والمعايير الاجتماعية، يعني إنك تكون عاوز حاجة بطريقة ملحة بس المعايير الاجتماعية مش سامحة بده.
وأضافت أبو شهدة لـ«شبابيك»، إن الصدمات ممكن تسبب حاجة زي كده، وأضافت«كنت شغالة على حالة قبل كدة عندها عمى في عينيها، استمر لمدة 5 سنين، ومكنش في أي سبب يستدعي وجود العمى، بس بعد ما اتكلمنا معاها عرفنا إنها أصيبت بالعمى بعد ما شافت زوجها بيخونها مع أختها، ومن ساعتها عميت وماتعاجلتش من العمى إلا لما اتطلقت».
الوراثة برضه ليها عامل كبير، وممكن يكون ضعف قشرة الدماغ بسبب الاستعداد الوراثي برضه، لأن الأطباء لاحظوا إن الناس اللي قشرة دماغهم ضعيفة أكتر عرضة للإصابة بالهستيريا. وبرضه لو أحد الوالدين كان مصاب بيها ده بيدي احتمالي أكبر إن الأبناء يصابوا بيها.
احذر.. الأعراض دي بتقول عندك «نوموفوبيا»
الأسباب الشخصية زي عدم النضج العقلي والاجتماعي وعدم القدرة على تحديد هدف واضح من الحياة. والصدمات برضه من الأسباب اللي بتعجل الإصابة بالهستيريا. والتعرض لصدمة عنيفة زي فشل في الحب أو موت حد قريب ليك.
الأعراض
الأعراض بتنقسم لـ3 أنواع من الأعراض:
العرض الحسي: الشكوى من مرض في القلب أو الشلل أو المشكلات الجنسية وفقدان حاسة الشم والتذوق. وآلآم المعدة والتقيؤ. وغالبا ما تكون أعراض غير حقيقية وهو ما يميز الهستيريا عن غيرها، إذ أن المصاب بها يشعر بأعراض المرض العادية غير أنه لا يوجد سبب عضوي لذلك.
الطبيب في أثناء التشخيص بيتأكد الأول إن مفيش مرض عضوي بجد وبعد كده بيشخصها إنها هستيريا.
الدكتورة «أبو شهدة» قالت لـ«شبابيك»: «لو أنت مثلا أجبرت عامل إنه يشتغل في مكان ما بيحبوش ممكن يحصله شلل في إيده، ودا بيختصر الصراع الدائر جواه، والصراع دا بينتج عنه مرض عضوي بيكون سببه نفسي».
الأعراض العقلية: اضطراب في الوعي والسلوك والكلام يصبح كالأطفال.
الأعراض العامة: ردود الفعل المختلفة وغير الناضجة في المواقف المختلفة. وبرضه بيلاحظ زيادتها عند الأطفال مع بداية العام الدراسي وكل ده بيكون بسبب الخوف مش أكتر.
اظبط ساعتك البيولوجية كده.. بس هي فين دي؟
مؤشرات على الإصابة بالهستيريا
- حدوث المرض فجأة وفي صورة درامية.
- الضغط الانفعالي قبل المرض.
- اختلاف شدة الأعراض في فترة صغيرة.
- عدم النضج الانفعالي.
- الاعنزاز بالنفس وحب الظهور.
- الاستعراض وعدم الاستقرار.
- المبالغة في التخيل «أحلام اليقظة».
- حب المجاملة والمواساة وتقلب المزاج.
علاج الهستيريا:
العلاج النفسي، وده بيحاول فيه الطبيب إنه ينمي شخصية المريض ويعرفه الأسباب الحقيقية للأعراض اللي عنده وبيخليه يقدر يوفق بين اللي هو عاوزه وبين اللي ما ينفعش ياخده، او بمعنى أدق بيخليه يعيش الواقع. وممكن يستخدم في المرحلة دي التنويم المغناطيسي.
الطب النفسي يجيب.. لماذا نكره كلمة «مراهق»؟
- العلاج الاجتماعي، وبيتم عن طريق تهيئة البيئة المتواجد بها المريض بحيث ميكونش في ضغوط أو أعباء عليه.
- العلاج الطبي وده بيكون عن طريق الصدمات الكهربائية وممكن برضه يتم استخدام الدواء الوهمي.
وفيه نصيحة للوالدين او الزوجة أو المرافق، إنهم ما يركزوش مع المريض في نوبات الهستيريا فقط لأن ده بيعززها عنده، ولازم توزيع الاهتمام حتى وهو طبيعي.
الدكتورة «أبو شهدة» قالت برضه إن مش كل الناس عرضة لمرض الهستيريا، لأن فه ناس عندها البناء النفسي قوي، بحيث إن مفيش حاجة تأثر فيه بسهولة.
